സംസ്ഥാനത്തെ ദുരിതാശ്വാസ ക്യാമ്പുകളിൽ കഴിയുന്നവർക്ക് സഹായഹസ്തവുമായി വീണ്ടും താരങ്ങൾ. ചലച്ചിത്രതാരങ്ങളായ ഉണ്ണി മുകുന്ദൻ, അമല പോൾ, ദിലീപ്, ടൊവിനോ എന്നിവരാണ് വീണ്ടും സഹായവുമായി രംഗത്തെത്തിയിരിക്കുന്നത്.

ദുരിതം അനുഭവിക്കുന്നവർക്ക് വസ്ത്രങ്ങളെത്തിക്കാനുള്ള ശ്രമങ്ങൾ ഏകോപിപ്പിക്കുകയാണ് നടൻ ദിലീപ്. പ്രളയം ഏറ്റവും അധികം നാശം വിതച്ച സ്ഥലങ്ങളിൽ ഒന്നാണ് ദിലീപിന്റെ സ്വദേശമായ ആലുവ. ലയൺസ് ക്ലബ് അംഗങ്ങൾക്കൊപ്പമാണ് ഉണ്ണി മുകുന്ദൻ ദുരിതാശ്വാസ ക്യാമ്പിലെത്തിയത്. വസ്ത്രങ്ങളും മറ്റ് ആവശ്യ സാധനങ്ങളും താരം വിതരണം ചെയ്തു.

ഷൂട്ടിങ്ങിനിടെ കൈയ്ക്ക് സംഭവിച്ച പരുക്ക് വകവയ്ക്കാതെയാണ് അമല പോൾ രംഗത്തിറങ്ങിയിരിക്കുന്നത്. രണ്ട് തവണ താരം ദുരിതമനുഭവിക്കുന്നവർക്കായി സാധനങ്ങൾ വാങ്ങി നൽകി. നേരത്തെ കടവന്ത്രയിലെ റീജണൽ സ്പോർട്സ് സെന്റർ കേന്ദ്രീകരിച്ച് പൂർണിമയുടെ നേതൃത്വത്തിൽ ദുരിതാശ്വാസ ക്യാമ്പിലേക്ക് സഹായങ്ങൾ എത്തിയിരുന്നു.

മഞ്ജു വാര്യർ, റിമ കല്ലിങ്കൽ, പാർവതി, ഗീതു മോഹൻദാസ്, ഇന്ദ്രജിത്ത് തുടങ്ങിയവർ പ്രവർത്തനങ്ങളിൽ പങ്കാളികളായി. കൊച്ചിയിലെ തമ്മനം കേന്ദ്രീകരിച്ച് ജയസൂര്യ, ആസിഫ് അലി, അജു വർഗീസ് എന്നിവരും ദുരിതാശ്വാസ കേന്ദ്രങ്ങളിലേക്ക് സാധനങ്ങൾ എത്തിക്കാനുള്ള നെട്ടോട്ടത്തിലാണ്.

എന്നാൽ, നടൻ ടൊവിനോ തോമസ് ഇവരിൽ നിന്നെല്ലാം വ്യത്യസ്തനായിരുന്നു. ഒറ്റയ്ക്കായിരുന്നു താരം സഹായങ്ങൾ നൽകിയിരുന്നത്. പ്രളയം ആരംഭിച്ചതിന്റെ രണ്ടാമത്തെ ദിവസം തന്നെ ടൊവിനോ നിരത്തിലിറങ്ങി. ആവശ്യമായ സാധനങ്ങളുമായി ആദ്യം മുന്നിട്ടിറങ്ങിയത് ടൊവിനോ തന്നെയായിരുന്നു. തുടക്കം മുതൽ ഇപ്പോഴും പ്രളയബാധിതർക്കൊപ്പമാണ് ടൊവിനോ.