ബോളിവുഡിലെ പ്രിയനടി ശ്രീദേവിയെ യാത്രയാക്കാനുള്ള തയ്യാറെടുപ്പിലാണ് കുടുംബം. ശ്രീദേവിയെ അവസാനമായി ഒരു നോക്ക് കാണുന്നതിനായി ആയിരങ്ങളാണ് മുംബൈയിലെ വസതിയിലേക്ക് ഒഴുകിയെത്തുന്നത്.

സിനിമാ മേഖലയിൽ നിന്നും ഐശ്വര്യ റായ്, കജോൾ, സൽമാൻ ഖാൻ തുടങ്ങി താരങ്ങളെല്ലാം എത്തിക്കൊണ്ടിരിക്കുകയാണ്. ശ്രീദേവിയുടെ മൃതശരീരം അന്ധേരിയിലെ സെലിബ്രേഷന്‍ സ്‌പോര്‍സ് ക്ലബ്ബിൽ പൊതുദര്‍ശനത്തിന് വെച്ചിരിക്കുകയാണ്.

ശ്രീദേവിയോടുള്ള ആദര സൂചകമായി ഇന്ന് റിലീസ് ചെയ്യാനിരുന്ന സിനിമയുടെ റിലീസും മാറ്റി വെച്ചിരിക്കുകയാണ്. അതോടൊപ്പം, മകള്‍ ജാന്‍വിയുടെ ആദ്യ സിനിമയുടെ റിലീസും താമസിക്കും. അനുഷ്‌ക ശര്‍മ്മ നായികയാവുന്ന ഏറ്റവും പുതിയ ചിത്രം പരിയുടെ റിലീസ് ആണ് ഇപ്പോൾ മാറ്റിയിരിക്കുകയാണ്. ഇന്നായിരുന്നു ചിത്രം റിലീസ് ചെയ്യേണ്ടിയിരുന്നത്. ഇക്കാര്യം നിര്‍മാതാവ് തന്നെയാണ് പറഞ്ഞിരിക്കുന്നത്.

മകളുടെ സിനിമയിലേക്കുള്ള അരങ്ങേറ്റം കാണാനുള്ള ഭാഗ്യം ശ്രീദേവിയ്ക്ക് ഉണ്ടായില്ല. അമ്മയുടെ അപ്രതീക്ഷിതമായ മരണം താരപുത്രിയെയും തളര്‍ത്തിയിരിക്കുകയാണ്. കഴിഞ്ഞ വര്‍ഷം ചിത്രീകരണം ആരംഭിച്ച ജാന്‍വിയുടെ സിനിമയും വൈകുമെന്നാണ് റിപ്പോര്‍ട്ടുകള്‍.