അണ്ണാ ഹസാരെയ്ക്ക് പിന്നാലെ സുരേഷ്ഗോപിയും!

ദുര്‍ബല്‍ കുമാര്‍

തിര‌ുവനന്തപുരം| WEBDUNIA|
PRO
അണ്ണാ ഹസാരെ ഒര‌ു സിനിമയില്‍ പോലും അഭിനയിച്ചിട്ടില്ല. എങ്കിലും അദ്ദേഹം ആര്‍ജിച്ച ജനപ്രീതി ഒര‌ു സൂപ്പര്‍സ്റ്റാറിന്‍റേതിനേക്കാള്‍ എത്രയോ കൂടുതലാണ്. ഇത് കണ്ടിട്ടാവാം, മലയാളത്തിന്‍റെ ആക്ഷന്‍ കിംഗ് സുരേഷ്ഗോപിയും ഉപവാസത്തിന് തയ്യാറെടുക്കുകയാണ്.

ഉപവസിക്കാന്‍ ഒര‌ു ആവശ്യവും അദ്ദേഹം കണ്ടുപിടിച്ചിട്ടുണ്ട്. തിര‌ുവനന്തപുരം ടാഗോര്‍ തിയേറ്റര്‍ സാംസ്കാരിക കേന്ദ്രമാക്കണമെന്ന ആവശ്യമുന്നയിച്ചാണ് ഉപവാസം. ഉപവാസത്തിനു മുന്നോടിയായി ഏവരും ചെയ്യാറുള്ള പതിവ് വാര്‍ത്താ സമ്മേളനവ‌ും അദ്ദേഹം നടത്തിക്കഴിഞ്ഞു.

കുറച്ചുകാലമായി ജനപ്രീതിയില്‍ ഉണ്ടായ ഇടിവ് നികത്താന്‍ ഉപവാസം കൊണ്ട് സാധിക്കുമെങ്കില്‍ എത്ര പട്ടിണി കിടക്കാനും ആരും തയ്യാറാകും. സുരേഷ് ഗോപി ചെയ്യുന്നതും അതുതന്നെയെന്നാണ് അസൂയക്കാര്‍ പ്രചരിപ്പിക്കുന്നത്. ഒക്ടോബര്‍ നാലിനാണ് സുരേഷ് ഗോപിയുടെ നേതൃത്വത്തില്‍ സിനിമാ പ്രവര്‍ത്തകര്‍ തിര‌ുവനന്തപുരത്ത് ഉപവസിക്കുന്നത്.

ടാഗോര്‍ തിയേറ്റര്‍ വെറും തിയേറ്റര്‍ കോംപ്ലക്സ് എന്ന നിലയില്‍ മാത്രം നിലനിര്‍ത്തിയാല്‍ പോരെന്ന് സുരേഷ്ഗോപി വാര്‍ത്താ സമ്മേളനത്തില്‍ അറിയിച്ചു. ഇക്കാര്യത്തില്‍ ഇടതുപക്ഷത്തുള്ളവര്‍ക്ക‌ും വലതുപക്ഷത്തുള്ളവര്‍ക്കും താല്പര്യമുണ്ട്. എന്നാല്‍ ചില തല്പരകക്ഷികള്‍ ഇതിന് തടസ്സം നില്‍ക്ക‌ുകയാണെന്നും സുരേഷ്ഗോപി പറഞ്ഞു. അവര്‍ക്കെതിരെയാണ് സമരമെന്നും അദ്ദേഹം കൂട്ടിച്ചേര്‍ത്തു.

നാലാം തീയതിയിലെ ഉപവാസം സൂചനാ സമരം മാത്രമാണെന്നും തങ്ങളുടെ ആവശ്യങ്ങള്‍ പരിഗണിച്ചില്ലെങ്കില്‍ താന്‍ അനിശ്ചിതകാല ഉപവാസം ആരംഭിക്കുമെന്നുമാണ് ആക്ഷന്‍ ഹീറോയുടെ ഭീഷണി. അണ്ണാ ഹസാരെയും രാംദേവും നരേന്ദ്രമോഡിയും സുരേഷ്ഗോപിയും എന്ന് കൂട്ടിവായിക്കുമ്പോള്‍ ജനങ്ങള്‍ അനുഭവിക്കുന്ന ആനന്ദം പറഞ്ഞറിയിക്കാനാവുമോ? ഉപവാസക്കാരുടെ എണ്ണം ഇനിയും കൂടട്ടേ എന്നേ പറയാനുള്ളൂ.


ഇതിനെക്കുറിച്ച് കൂടുതല്‍ വായിക്കുക :