ഒരു സംഘം ആളുകള്‍ ചേര്‍ന്ന് പതിനാറുകാരിയുടെ ചെവി മുറിച്ചതിനെ ചൊല്ലി കശ്മീരില്‍
സംഘര്‍ഷം. സംഭവവുമായി ബന്ധപ്പെട്ട് പ്രദേശവാസികളായ ഏഴു പേര്‍ അറസ്റ്റിലായി. പ്രതികള്‍ സഞ്ചരിച്ച വാനും പോലീസ് പിടിച്ചെടുത്തിട്ടുണ്ട്.

ദക്ഷിണ കശ്മീരിലെ വെരിനാഗ് മേഖലയില്‍ ബുധനാഴ്ചയാണ് പെണ്‍കുട്ടിയുടെ ചെവി മുറിച്ചത്. സ്‌കൂളില്‍ നിന്നും വീട്ടിലേക്കു മടങ്ങുന്ന വഴിക്കാണ് പത്താം ക്ലാസ് വിദ്യാര്‍ഥിനിയെ യുവാക്കള്‍ ആക്രമിച്ചത്. പെണ്‍കുട്ടി ശ്രീനഗറിലെ ആശുപത്രിയില്‍ ചികിത്സയിലാണ്.

മൂര്‍ച്ചയേറിയ കത്തി ഉപയോഗിച്ച് അക്രമികള്‍ തന്റെ മകളുടെ കാത് മുറിച്ചതായി കുട്ടിയുടെ പിതാവ് ആരോപിച്ചു. സംഭവത്തില്‍ പെണ്‍കുട്ടി പഠിക്കുന്ന സ്‌കൂളിലെ പ്രിന്‍സിപ്പല്‍ പരാതി നല്‍കിയിട്ടും പോലീസ് ശക്തമായ നിലപാട് സ്വീകരിച്ചില്ലെന്നാണരോപിച്ച് പ്രദേശവാസികള്‍ പ്രക്ഷോഭത്തിലാണ്.

സംഭവം നടന്ന ദിവസം ദൂരുസ്‌റ്റേഷനില്‍ ഡ്യുട്ടിയിലുണ്ടായിരുന്ന ഹൗസ് ഓഫീസറെ സസ്‌പെന്റു ചെയ്തതായും അനന്ദനാഗ് എഎസ്പി തഹീര്‍ ഹുസൈന്‍ അറിയിച്ചു.