റെയില്വേ ട്രാക്കിന് സമീപം സ്യൂട്ട്കേസിനുള്ളില് 18കാരിയുടെ മൃതദേഹം; അന്വേഷണം ആരംഭിച്ച് പോലീസ്
ര റെയില്വേ പാലത്തിന് സമീപമാണ് സ്യൂട്ട്കേസ് കണ്ടെത്തിയത്.
ബെംഗളൂരു: സൗത്ത് ബെംഗളൂരുവിലെ റെയില്വേ ട്രാക്കിന് സമീപം സ്യൂട്ട്കേസിനുള്ളില് ഒളിപ്പിച്ച നിലയില് 18 വയസ്സുള്ള പെണ്കുട്ടിയുടെ മൃതദേഹം കണ്ടെത്തി. ഹൊസൂര് മെയിന് റോഡിന് സമീപമുള്ള പഴയ ചന്ദപുര റെയില്വേ പാലത്തിന് സമീപമാണ് സ്യൂട്ട്കേസ് കണ്ടെത്തിയത്.പോലീസ് പ്രാഥമിക റിപ്പോര്ട്ടുകള് പ്രകാരം, മൃതദേഹം സ്യൂട്ട്കേസില് പൊതിഞ്ഞ് ഓടുന്ന ട്രെയിനില് നിന്ന് മറ്റൊരു സ്ഥലത്ത് വലിച്ചെറിഞ്ഞിരിക്കാമെന്ന് സംശയിക്കുന്നു.
സാധാരണയായി ഇത്തരം കേസുകള് റെയില്വേ പോലീസിന്റെ അധികാരപരിധിയിലാണ് വരുന്നതെങ്കിലും, സംഭവം നടന്നത് ബെംഗളൂരു റൂറല് പോലീസിന്റെ പരിധിക്കുള്ളിലായതിനാല്, ലോക്കല് പോലീസ് കേസ് രജിസ്റ്റര് ചെയ്ത് അന്വേഷണം ആരംഭിച്ചിട്ടുണ്ടെന്ന് ബെംഗളൂരു റൂറല് പോലീസ് സൂപ്രണ്ട് സി.കെ. ബാബു പറഞ്ഞു. കഴിഞ്ഞ വര്ഷം മെയ് 12 ന് കര്ണാടകയിലെ രാമനഗരയില് 14 വയസ്സുള്ള ബധിരയും മൂകയുമായ ഒരു പെണ്കുട്ടിയുടെ മൃതദേഹം റെയില്വേ ട്രാക്കിന് സമീപം കണ്ടെത്തിയ സംഭവവുമായി ഈ കേസിന് സാമ്യമുണ്ട്. കൊലപാതകത്തിന്റെ കാരണമുള്പ്പെടെ എല്ലാം കണ്ടെത്തുന്നതിനായി പോലീസ് ഊര്ജിതമായി അന്വേഷണം ആരംഭിച്ചു.
