99% ഹൃദയാഘാതങ്ങളും, പക്ഷാഘാതങ്ങളും നാല് സാധാരണ ആരോഗ്യ പ്രശ്‌നങ്ങളുമായി ബന്ധപ്പെട്ടിരിക്കുന്നുവെന്ന് അന്താരാഷ്ട്ര പഠനം കണ്ടെത്തി. ഉയര്‍ന്ന രക്തസമ്മര്‍ദ്ദം, ഉയര്‍ന്ന കൊളസ്‌ട്രോള്‍, ഉയര്‍ന്ന രക്തത്തിലെ പഞ്ചസാര, പുകയില ഉപയോഗം എന്നിവയാണവ. അമേരിക്കയിലും ദക്ഷിണ കൊറിയയിലുമായി 9 ദശലക്ഷത്തിലധികം മുതിര്‍ന്നവരില്‍ നടത്തിയ പഠനങ്ങളിലാണ് ഗവേഷകര്‍ ഈ നിഗമനത്തിലെത്തിയത്. ഏറ്റവും സമഗ്രമായ പഠനങ്ങളില്‍ ഒന്നായി ഇതിനെ കാണാം.

സാധാരണയായി കുറഞ്ഞ അപകടസാധ്യതയുള്ള 60 വയസ്സിന് താഴെയുള്ള ചെറുപ്പക്കാരായ സ്ത്രീകളില്‍ പോലും 95% ത്തിലധികം ഹൃദയ സംബന്ധമായ അസുഖങ്ങളും ഈ നാല് ഘടകങ്ങളില്‍ ഒന്നോ അതിലധികമോ കാരണമാണ്. ഉയര്‍ന്ന രക്തസമ്മര്‍ദ്ദം (ഹൈപ്പര്‍ടെന്‍ഷന്‍) ഏറ്റവും പ്രധാനപ്പെട്ട കാരണമായി ഉയര്‍ന്നുവന്നു. ഹൃദയാഘാതം, പക്ഷാഘാതം അല്ലെങ്കില്‍ ഹൃദയസ്തംഭനം എന്നിവ അനുഭവിച്ച 93% ല്‍ കൂടുതല്‍ വ്യക്തികളിലും ഇത് കാണപ്പെടുന്നു.

ഭാവിയില്‍ ജീവന്‍ അപകടപ്പെടുത്തുന്ന ഹൃദയ പ്രശ്‌നങ്ങള്‍ തടയുന്നതിന് ഈ സാധാരണ അവസ്ഥകള്‍ നേരത്തെ കണ്ടെത്തുന്നത് വളരെ പ്രധാനമെന്ന് പഠനം പറയുന്നു. പതിവ് സ്‌ക്രീനിംഗ്, രോഗങ്ങളെ നിയന്ത്രിക്കല്‍ എന്നിവയുടെ നിര്‍ണായക ആവശ്യകതയെ കണ്ടെത്തലുകള്‍ എടുത്തുകാണിക്കുന്നു.