മമ്മൂട്ടി-പാര്‍വതി ടീം ഒന്നിക്കുന്ന ഏറ്റവും പുതിയ ചിത്രമാണ് പുഴു. വനിതാദിനത്തോടനുബന്ധിച്ച് പുറത്തിറക്കിയ ടൈറ്റില്‍ കൊണ്ട് തന്നെ സിനിമ ഏറെ ശ്രദ്ധ നേടി. അതിനാല്‍ തന്നെ 'പുഴു'വിനെ കുറിച്ചുള്ള ഓരോ വിശേഷങ്ങള്‍ അറിയുവാനായി കാത്തിരിക്കുകയാണ് ആരാധകര്‍. ഇപ്പോഴിതാ പുതിയ വിവരങ്ങള്‍ പുറത്തുവന്നിരിക്കുകയാണ്. നടി പാര്‍വതി തന്നെയാണ് വിശേഷങ്ങള്‍ ആരാധകരുമായി പങ്കുവച്ചത്.

മമ്മൂട്ടി ഇതുവരെ ചെയ്യാത്ത ഒരു കഥാപാത്രത്തെ ആയിരിക്കും ചിത്രത്തില്‍ അവതരിപ്പിക്കുകയെന്ന് പാര്‍വതി പറഞ്ഞു. ഈ കഥാപാത്രത്തെ കണ്ട് പ്രേക്ഷകര്‍ ഞെട്ടിപ്പോകുമെന്ന് നടി അഭിപ്രായപ്പെട്ടു.2021 പകുതിയോടെ ചിത്രീകരണം ആരംഭിക്കാനാണ് പദ്ധതിയിടുന്നത്. രാഷ്ട്രീയപരമായി തനിക്കേറെ ഇഷ്ടപ്പെട്ട കണ്ടന്റ് ആണ് ചിത്രത്തില്‍ ഉള്ളതെന്ന് പാര്‍വ്വതി നേരത്തെ പറഞ്ഞിരുന്നു.

ഹര്‍ഷദിന്റെയാണ് കഥ. ഹര്‍ഷാദ്, സുഹാസ്, ഷാര്‍ഫു എന്നിവര്‍ ചേര്‍ന്നാണ് തിരക്കഥ ഒരുക്കിയിരിക്കുന്നത്. നിരവധി തമിഴ് ചിത്രങ്ങള്‍ക്ക് ക്യാമറ കൈകാര്യം ചെയ്ത തേനി ഈശ്വര്‍ ഈ ചിത്രത്തിലൂടെ മലയാളത്തിലേക്ക് അരങ്ങേറ്റംകുറിക്കുന്നു.ജെയ്ക്‌സ് ബിജോയ് ചിത്രത്തിനായി സംഗീതം ഒരുക്കുന്നു. ദീപു ജോസഫ് എഡിറ്റിംഗ് നിര്‍വഹിക്കുന്നു.എസ് ജോര്‍ജ്ജിന്റെ സിന്‍-സെല്‍ സെല്ലുലോയിഡും ദുല്‍ഖര്‍ സല്‍മാന്റെ വേഫറെര്‍ ഫിലിംസും ചേര്‍ന്നാണ് ചിത്രം നിര്‍മ്മിക്കുന്നത്.