അണ്ടര്‍ 19 വനിതാ ലോകകപ്പില്‍ ഇന്ത്യയുടെ ആദ്യമത്സരം അവസാനിച്ചപ്പോള്‍ മലയാളികള്‍ക്കും അഭിമാനനിമിഷം. വെസ്റ്റിന്‍ഡീസിനെതിരായ പോരാട്ടത്തില്‍ 9 വിക്കറ്റിന്റെ ആധികാരിക വിജയമാണ് ഇന്ത്യന്‍ വനിതകള്‍ നേടിയത്. 2 ഓവറില്‍ 5 റണ്‍സ് മാത്രം വഴങ്ങി 2 വിക്കറ്റ് നേടിയ മലയാളി താരം വി ജെ ജോഷിതയാണ് പ്ലെയര്‍ ഓഫ് ദ മാച്ച് പുരസ്‌കാരം സ്വന്തമാക്കിയത്.

ആദ്യം ബാറ്റ് ചെയ്ത വെസ്റ്റിന്‍ഡീസിനെ 13.2 ഓവറില്‍ വെറും 44 റണ്‍സിന് പുറത്താക്കാന്‍ ഇന്ത്യന്‍ വനിതകള്‍ക്കായിരുന്നു. വിന്‍ഡീസ് നിരയിലെ 5 താരങ്ങളാണ് പൂജ്യത്തിന് പുറത്തായത്. ഇന്ത്യയ്ക്കായി ജോഷിതയ്ക്ക് പുറമെ പാരുണിക സിസോദിയ മൂന്നും ആയുഷി ശുക്ല രണ്ട് വിക്കറ്റും വീഴ്ത്തി. വെറും 4.2 ഓവറില്‍ ഒരു വിക്കറ്റ് നഷ്ടത്തിലാണ് ഇന്ത്യ ലക്ഷ്യം കണ്ടത്. മലേഷ്യയാണ് ഗ്രൂപ്പിലെ രണ്ടാം മത്സരത്തില്‍ ഇന്ത്യയുടെ എതിരാളികള്‍.