ഇംഗ്ലണ്ട് ടീം ക്യാപ്റ്റന് കെവിന് പീറ്റേഴ്സണും കോച്ച് പീറ്റര് മൂര്സുമായുള്ള അഭിപ്രായ വ്യത്യാസം പുതിയ വഴിത്തിരിവില്. തന്നെ ക്യാപ്റ്റനായി വേണമെങ്കില് പീറ്റര് മൂര്സ് രാജി വച്ചൊഴിയണം എന്നാണ് കെവിന് പീറ്റേഴ്സണ് ശഠിക്കുന്നത്. ഡെയ്ലി ടെലഗ്രാഫാണ് ഈ വാര്ത്ത റിപ്പോര്ട്ട് ചെയ്തിരിക്കുന്നത്.
പീറ്റര് മൂര്സ് കോച്ചായി തുടരുന്ന പക്ഷം താന് രാജി വച്ചൊഴിയുമെന്ന് ഇംഗ്ലണ്ട് ക്രിക്കറ്റ് ടീം ഭാരവാഹികളെ കെവിന് പീറ്റേഴ്സണ് അറിയിച്ചിട്ടുണ്ട്. പ്രശ്നവുമായി ബന്ധപ്പെട്ട് ഇംഗ്ലണ്ട് ആന്ഡ് വെയില്സ് ക്രിക്കറ്റ് ബോര്ഡ് ചെയര്മാന് ഗെയില്സ് ക്ലാര്ക്കിനെ പീറ്റേഴ്സണ് കാണുമെന്നറിയുന്നു.
തുടര്ച്ചയായി ഇംഗ്ലണ്ട് തോല്വിയുടെ കയ്പ് രുചിക്കുന്നതാണ് പീറ്റേഴ്സണെ കോപാകുലനാക്കിയത്. കോച്ചിന്റെ പിടിപ്പുകേടാണ് ഇതിന് കാരണമെന്നാണ് ക്യാപ്റ്റന് പറയുന്നത്. ഇന്ത്യക്കെതിരായി കളിച്ച ടെസ്റ്റ് ഏകദിന പരമ്പരകള് ഇംഗ്ലണ്ട് കളഞ്ഞുകുളിച്ചിരുന്നു. ഈ സാഹചര്യത്തില് കോച്ചിനെ മാറ്റിയാലല്ലാതെ ടീമിനെ നന്നാക്കിയെടുക്കാന് പറ്റില്ലെന്ന കര്ശന നിലപാടാണ് പീറ്റേഴ്സണ് എടുത്തിരിക്കുന്നത്. സ്കിപ്പര് മൈക്കേല് വോണിനെ ടീമില് നിന്ന് ഒഴിവാക്കിയതും പീറ്റേഴ്സണെ പ്രകോപിപ്പിച്ചിട്ടുണ്ട്.
ഇംഗ്ലണ്ട് ക്രിക്കറ്റ് ടീം ഭാരവാഹികള് പീറ്റേഴ്സന്റെ രാജി ഭീഷണിയെ പറ്റി പ്രതികരിക്കാന് തയ്യാറായിട്ടില്ല. എന്തായാലും ഇംഗ്ലണ്ട് ടീമിന്റെ മാനേജിംഗ് ഡയറക്ടര് ഹഫ് മോറിസ് ഉടനടി കെവിന് പീറ്റേഴ്സണും കോച്ച് പീറ്റര് മൂര്സുമായി കൂടിക്കാഴ്ച നടത്തുമെന്ന് അറിയുന്നു. | 
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്റ് ചെയ്യൂ