.അയോദ്ധ്യാ കാണ്ഡം
താര്‍മകള്‍ക്കന്‍‌പുള്ള തത്തേ! വരികെടോ
താമസശീലമകറ്റേണമാശു നീ
ദാമോദരന്‍ പരിതാമൃതമിന്നിയു-
മാമോദമുള്‍ക്കൊണ്ടു ചൊല്ലു സരസമായ്.
എങ്കിലോ കേള്‍പ്പിന്‍ ചുരുക്കി ഞാന്‍ ചൊല്ലുവാന്‍
പങ്കമെല്ലാമകലും പലജാതിയും
സങ്കടമേതും വരികയുമില്ലല്ലോ
പങ്കജനേത്രന്‍‌കഥകള്‍ കേട്ടീടിനാല്‍
ഭാര്‍ഗവിയാകിയ ജാനകിതന്നുടെ
ഭാഗ്യജലനിധിയാകിയ രാഘവന്‍
ഭാര്‍ഗ്ഗവന്‍ തന്നുടെ ദര്‍പ്പം ശമിപ്പിച്ചു 10
മാര്‍ഗ്ഗവും പിന്നിട്ടയോദ്ധ്യാപുരി പുക്കു
താതനോടും നിജ മാതൃജനത്തോടും
ധാതൃസുതനാം ഗുരുവരന്‍ തന്നോടും
ഭ്രാതാക്കളോടും പടയോടുമൊന്നിച്ചു
മേദിനീപുത്രിയാം ഭാമിനിതന്നോടും
വന്നെതിരേറ്റൊരു പൌരജനത്തോടും
ചെന്നു മഹാരാജധാനിയകം‌പുക്കു
വന്നിതു സൌഖ്യം ജഗത്തിനു രാഘവന്‍
തന്നുടെ നാനാഗുണഗണം കാണ്കയാല്‍ 20
രുദ്രന്‍ പരമേശ്വരന്‍ ജഗദീശ്വരന്‍
കദ്രുഗുണഗണഭൂഷണഭൂഷിതന്‍
ചിദ്രുപനദ്വയന്മൃത്യുഞ്ജയന്‍ പരന്‍
ഭദ്രപദന്‍ ഭഗവാന്‍ ഭവഭജ്ഞനന്‍
രുദ്രാണിയായ ദേവിക്കുടന്‍ രാമ-
ഭദ്രകഥാമൃതസാരം കൊടുത്തപ്പോള്‍
വിദ്രുമതുല്യാധരിയായ ഗൌരിയാ-
രുദ്രസുതയുമാനന്ദവിവശയായ്
ഭര്‍ത്തൃപാദ പ്രണാമം ചെയ്തു സമ്പൂര്‍ണ്ണ-
ഭക്തിയോടും പുനരേവമരുള്‍ചെയ്തു 30
“നാരായണന്‍ നളിനായതലോചനന്‍
നാരിജനമനോമോഹനന്‍ മാധവന്‍
നാരദസേവന്‍ നളിനാസനപ്രിയന്‍
നാരകാരാദി നളിനശരഗുരു
നാഥന്‍ നരസഖന്‍ നാനാജഗന്മയന്‍
നാദവിദ്യാത്മകന്‍ നാമസഹസ്രവാന്‍
നാളീകരമൃവദനന്‍ നരകാരി
നാളീകബാന്ധവ വംശസമുദ്ഭവന്‍
ശ്രീരാമദേവന്‍ പരന്‍ പുരുഷോത്തമന്‍
കാരുണ്യവാരിധി കാമഫലപ്രദന്‍ 40
രാക്ഷസവംശവിനാശനകാരണന്‍
സാക്ഷാല്‍ മുകുന്ദനാനന്ദപ്രദന്‍ പുമാന്‍
ഭക്തജനോത്തമഭുക്തിമുക്തിപ്രദന്‍
ശക്തിയുക്തന്‍ ശരണാഗതവത്സലന്‍
വ്യക്തനവ്യക്തനാനന്തനനാമയന്‍
സക്തിവിമുക്തന്‍ വിമുക്തഹൃദിസ്ഥിതന്‍
നക്തഞ്ചരേശ്വരനായ ദശാസ്യനു
മുക്തി കൊടുത്തവന്‍‌തന്‍റെ ചരിത്രങ്ങള്‍
നക്തന്ദിവം ജീവിതാവധി കേള്‍ക്കിലും
തൃപ്തിവരാ മമ വേണ്ടീല മുക്തിയും 50
ഇത്ഥം ഭഗവതി ഗൌരി മഹേശ്വരി
ഭക്ത്യാ പരമേശ്വരനോടു ചൊന്നപ്പോള്‍
മന്ദസ്മിതംചെയ്തു മന്മഥനാശനന്‍
സുന്ദരി കേട്ടുകൊള്‍കെന്നരുളിച്ചെയ്തു.
|
ആത്മീയം 
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്‍റ് ചെയ്യൂ