ന്യൂഡല്ഹി|
WEBDUNIA|
Last Modified വെള്ളി, 28 ഡിസംബര് 2012 (15:58 IST)
PTI
PTI
ഡല്ഹിയില് ബസില് പാരാമെഡിക്കല് വിദ്യാര്ഥിനി കൂട്ടമാനഭംഗത്തിന് ഇരയായ സംഭവം മാധ്യമങ്ങളിലും സോഷ്യല്നെറ്റ്വര്ക്കിംഗ് സൈറ്റുകളിലും ദിവസങ്ങളായി സജീവ ചര്ച്ചാ വിഷയമാണ്. പെണ്കുട്ടിയുടെ ആരോഗ്യനിലയെക്കുറിച്ചുള്ള എല്ലാ വിവരങ്ങളും പുറത്തുവരുന്നുണ്ടെങ്കിലും ആ പെണ്കുട്ടിയുടെ പേരും മറ്റ് കാര്യങ്ങളും പുറത്തിവിട്ടിട്ടില്ല. പെണ്കുട്ടിയുടെ പേരും വ്യക്തി വിവരങ്ങളും പുറത്തുവിടുന്നത് മാധ്യമധര്മ്മത്തിന് എതിരായതുകൊണ്ട് തന്നെയാണിത്.
ഉത്തര്പ്രദേശിലെ ബല്ലിയ ജില്ലയിലാണ് ഈ പെണ്കുട്ടിയുടെ ജന്മദേശം എന്ന് മാത്രമാണ് പുറത്തുവന്ന വിവരം. പക്ഷേ പെണ്കുട്ടിയ്ക്ക് സാങ്കല്പ്പിക നാമങ്ങള് നല്കാന് മത്സരിക്കുകയാണ് പ്രതിഷേധക്കാരും മാധ്യമങ്ങളും.
പെണ്കുട്ടിയ്ക്ക് പിന്തുണയുമായി തെരുവിലിറങ്ങിയവര് അവളെ ‘ദാമിനി‘ എന്ന് വിളിക്കുന്നു.1993ല് റിലീസ് ചെയ്ത ‘ദാമിനി‘ എന്ന ബോളിവുഡ് സിനിമയില് നിന്ന് പ്രചോദനം ഉള്കൊണ്ടാണ് ഈ പേര് നല്കിയത്. ബലാത്സംഗത്തിനു ശേഷം നീതിക്കു വേണ്ടി പോരാടുന്നവരുടെ കഥ പറയുന്ന ചിത്രമാണത്.
ഒരു പത്രം പെണ്കുട്ടിയ്ക്ക് ‘നിര്ഭയ‘ എന്ന് പേരിട്ടു-നിര്ഭയ എന്നാല് ഭയമില്ലാത്തവള്. മറ്റൊരു ടെലിവിഷന് ചാനല് ആകട്ടെ ‘അമാനത്‘ എന്ന പേരാണ് നല്കിയത്.
സുഹൃത്തിനൊപ്പം സിനിമ കണ്ട് ബസില് മടങ്ങിയ ഏതോ ഒരു പെണ്കുട്ടിയല്ല അവള് ഇന്ന്. ഡിസംബര് 16ന് അവള്ക്ക് നേരിടേണ്ടിവന്ന ദുരന്തത്തില് നടുങ്ങി നില്ക്കുകയാണ് രാജ്യം.