സ്വവര്ഗ രതി നിയമാനുസൃതമാണെന്ന് ഡല്ഹി ഹൈക്കോടതി വിധിച്ചു. നാസ് ഫൌണ്ടേഷന് നല്കിയ ഹര്ജിയിലാണ് കോടതി വിധി.
ഇന്ത്യന് ശിക്ഷാ നിയമത്തിലെ 377 ആം വകുപ്പില് സ്വവര്ഗ രതി നിയമവിരുദ്ധമായി പ്രഖ്യാപിക്കുന്ന നിയമം റദ്ദാക്കാന് കോടതി നിര്ദ്ദേശിച്ചു. ഒരേ ലിംഗത്തിലുള്ള പ്രായപൂര്ത്തിയായവര്ക്ക് ഉഭയകക്ഷി സമ്മതത്തോടെ ശാരീരിക ബന്ധം പുലര്ത്താമെന്നും കോടതി പറഞ്ഞു.
സ്വവര്ഗ രതിയെ ക്രിമിനല് കുറ്റമായി കാണുന്നത് മൌലികാവകാശ ലംഘനമാണെന്നും കോടതി നിരീക്ഷിച്ചു. 377 ആം വകുപ്പ് ഭേദഗതി നടത്തിയില്ല എങ്കില് അത് ജീവിക്കാനുള്ള അവകാശത്തിനും നിയമത്തിനു മുന്നിലും എല്ലാവര്ക്കും സമത്വം ഉറപ്പ് നല്കുന്ന ഭരണഘടനയുടെ 21 ആം വകുപ്പിന്റെ ലംഘനമായിരിക്കുമെന്നും കേസ് പരിഗണിച്ച ചീഫ് ജസ്റ്റിസ് അജിത് പ്രകാശ് ഷാ, ജസ്റ്റിസ് എസ് മുരളീധര് എന്നിവരടങ്ങുന്ന ബഞ്ച് നിരീക്ഷണം നടത്തി.
ബ്രിട്ടീഷ് ഭരണകാലത്ത് നിലവില് വന്ന 377 ആം വകുപ്പ് പ്രകാരം സ്വവര്ഗരതി പിടിക്കപ്പെട്ടാല് ജീവപര്യന്തം തടവ് വരെ ലഭിക്കാവുന്ന കുറ്റമാണ്. ഇനിമുതല് ഉഭയകക്ഷി സമ്മതമില്ലാതെയുള്ള സ്വവര്ഗരതി തടയുന്നതിനു മാത്രമായിരിക്കും 377 ആം വകുപ്പ് പ്രാബല്യത്തിലുണ്ടാവുക.
സ്വവര്ഗ രതി ഇന്ത്യന് സമൂഹം സ്വീകരിക്കില്ല എന്ന നിലപാടിലായിരുന്നു ആഭ്യന്തരമന്ത്രാലയം. എന്നാല്, ഇത്തരക്കാര്ക്ക് എച്ച് ഐ വി അണുബാധ ഉണ്ടാവാന് സാധ്യത കൂടുതലായതിനാല് അവര്ക്കെതിരെയുള്ള വിവേചനം അവസാനിപ്പിക്കണം എന്നാണ് ആരോഗ്യമന്ത്രാലയം വാദിച്ചിരുന്നത്. നിലവില് ആഭ്യന്തരമന്ത്രാലയവും സ്വവര്ഗ രതി നിയമാനുസൃതമാക്കണം എന്ന നിലപാടില് ആയിരുന്നു. | 
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്റ് ചെയ്യൂ