മുംബൈ ഭീകരാക്രമണത്തെ കുറിച്ചുള്ള തെളിവുകള് ‘വിവരങ്ങള് ’ മാത്രമാണെന്ന പാകിസ്ഥാന് പ്രധാനമന്ത്രി യൂസുഫ് റാസ ഗിലാനിയുടെ പ്രസ്താവന ഉത്തരവാദിത്വത്തില് നിന്നുള്ള ഒഴിഞ്ഞുമാറലാണെന്ന് വിദേശകാര്യമന്ത്രി പ്രണാബ് മുഖര്ജി. ഇത് പാകിസ്ഥാന്റെ നടപടിയെ കുറിച്ച് ഇന്ത്യയുടെ സംശയം വര്ദ്ധിപ്പിക്കുന്നു എന്നും പ്രണാബ് പറഞ്ഞു.മുംബൈ ഭീകരാക്രമണത്തെ കുറിച്ച് ഇന്ത്യ നല്കിയ തെളിവുകള് ‘വിവരങ്ങള്’ മാത്രമാണെന്ന പ്രസ്താവന പാകിസ്ഥാന് പ്രശ്നത്തെ ഗൌരവതരമായി കാണുന്നില്ല എന്ന ഇന്ത്യയുടെ സംശയം വര്ദ്ധിപ്പിക്കുന്നു. പ്രശ്നത്തില് രാജ്യം ഇതുവരെയായും ഒരു നടപടിയും എടുത്തിട്ടില്ല എന്നും ഇത് വ്യക്തമാക്കുന്നു, പ്രണാബ് മുഖര്ജി പറഞ്ഞു. കഴിഞ്ഞ ദിവസം ഡല്ഹിയില് മാധ്യമ പ്രവര്ത്തകരോട് സംസാരിക്കുകയായിരുന്നു അദ്ദേഹം.പാകിസ്ഥാന് പ്രധാനമന്ത്രി ദേശീയ അസംബ്ലിയില് നടത്തിയ പ്രസംഗത്തിലാണ് ജനുവരി അഞ്ചിന് ഇന്ത്യ കൈമാറിയത് വെറും വിവരങ്ങള് മാത്രമാണെന്നും മറിച്ച് തെളിവുകളല്ല എന്നും പറഞ്ഞത്. ഭീകരര് പാകിസ്ഥാനിലേക്ക് നടത്തിയ സാറ്റലൈറ്റ് ഫോണ് സംഭാഷണ ശകലങ്ങള് ഉള്പ്പെടെയുള്ള തെളിവുകളായിരുന്നു ഇന്ത്യ കൈമാറിയിരുന്നത്.മുംബൈ ഭീകരാക്രമണത്തെ കുറിച്ച് ഇന്ത്യയുമായി ചേര്ന്ന് ഒരു സംയുക്ത അന്വേഷണത്തിന് തയ്യാറെന്ന് പാകിസ്ഥാന് അറിയിച്ചിരുന്നു എങ്കിലും അതിനുള്ള മറുപടി ലഭിച്ചിട്ടില്ല . സ്വന്തം നിലയിലുള്ള അന്വേഷണം നടത്തുകയാണെന്നും യഥാസമയത്ത് അന്വേഷണ വിവരങ്ങള് ഇന്ത്യയെ അറിയിക്കുമെന്നും എന്നും ഗീലാനി പറഞ്ഞിരുന്നു. |
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്റ് ചെയ്യൂ
