മുംബൈ ട്രെയിന്‍ സ്‌ഫോടനത്തിന് ഒരു വയസ്സ്

മുംബൈ നഗരത്തെ നടുക്കിയ പരമ്പര ട്രെയിന്‍ സ്‌ഫോടനം നടന്നിട്ട് ജൂലൈ 11 ബുധനാഴ്ച ഒരു വര്‍ഷം തികയുന്നു. മരിച്ചവരുടെ ബന്ധുക്കള്‍ ഒരിക്കലും മടങ്ങി വരാതെ വിട്ടു പോയവര്‍ക്കായി ആദരാജ്ഞലികള്‍ അര്‍പ്പിച്ചു. നഗരത്തില്‍ കനത്ത സുരക്ഷയാണ് ഒരുക്കിയിരുന്നത്. രാഷ്‌ട്രീയ പാര്‍ട്ടികളും റെയില്‍‌വേയും പ്രത്യേകം അനുസ്‌മരണ ചടങ്ങുകള്‍ ഒരുക്കിയിരുന്നു. സ്‌ഫോടന പരമ്പരയുമായി ബന്ധപ്പെട്ട് 13 പ്രതികളെ മുംബൈ പൊലീസ് അറസ്റ്റു ചെയ്തിട്ടുണ്ട്. എന്നാല്‍, സ്‌ഫോടനം ആസൂത്രണം ചെയ്ത ലക്ഷ്കര്‍ ഇ തൊയിബ നേതാവ് ആസാദിയെ ഇനിയും പിടികിട്ടിയിട്ടില്ല. പിടിയിലായ 13 പ്രതികളുടെ വാദം ജൂലൈ 30 ന് തുടങ്ങുമെന്നാണ് പ്രതീക്ഷിക്കുന്നത്. മുബൈ മെട്രോ ട്രെയിനുകളില്‍ ഏഴു സ്‌ഫോടനങ്ങളായിരുന്നു നടന്നത്. 2006 ജൂലൈ 11 ന് നടന്ന പരമ്പര സ്ഫോടനങ്ങളില്‍ 187 ആളുകളാണ് മരിച്ചത്. 812 ആളുകള്‍ക്ക് പരുക്കേറ്റിരുന്നു.