വെള്ളമടിച്ച് ബഹളം: വിദേശസംഘം കസ്റ്റഡിയില്‍

ആലപ്പുഴ| WEBDUNIA|
വെള്ളമടിച്ചാല്‍ വയറ്റില്‍ കിടക്കണമെന്ന് പറയുന്നത് നമ്മള്‍ മലയാളികളാണ്. എന്നാല്‍ വിദേശികള്‍ക്ക് ഇതൊന്നും ബാധകമല്ല. വെള്ളമടിച്ച് കൂത്താടിയതിന് ആലപ്പുഴയില്‍ വിദേശസംഘത്തെ പൊലീസ് കസ്റ്റഡിയിലെടുത്തു. തുടര്‍ന്ന് ഇവരെ താക്കീത് നല്കി വിട്ടയച്ചു. കഴിഞ്ഞദിവസം രാവിലെ ഫിനിഷിങ് പോയിന്‍റിലായിരുന്നു സംഭവം.

ആലപ്പുഴ കാണാനും ഹൌസ്ബോട്ടില്‍ കറങ്ങാനുമായിട്ടായിരുന്നു പത്തംഗ ലണ്ടന്‍ സംഘം എത്തിയത്. ബുധനാഴ്ച പുന്നമടയില്‍ നിന്നായിരുന്നു സംഘം ഹൌസ്ബോട്ടില്‍ യാത്ര പോയത്. പത്തംഗസംഘത്തിലെ ഏഴുപേരായിരുന്നു ഇന്നലെ രാവിലെയോടെ ഹൌസ് ബോട്ടിനുള്ളില്‍ ബഹളമുണ്ടാക്കിയത്. ബോട്ടില്‍ നിന്ന് ഇറങ്ങാന്‍ സമയമായപ്പോള്‍ ജിവനക്കാര്‍ ബോട്ട് ഫിനിഷിങ് പോയിന്‍റില്‍ അടുപ്പിച്ചു. എന്നാല്‍ ബോട്ടില്‍ നിന്ന് ഇറങ്ങാന്‍ ഇവര്‍ കൂട്ടാക്കിയില്ല. ഇതാണ് പ്രശ്നം കൂടുതല്‍ വഷളാക്കിയത്.

യാത്ര തുടങ്ങിയ ദിവസം തന്നെ ഇവര്‍ തമ്മില്‍ അടിപിടി തുടങ്ങിയിരുന്നു. ഇതേ തുടര്‍ന്ന് സംഘത്തില്‍ നിന്ന് രണ്ടു വനിതകളടക്കം മൂന്നുപേര്‍ വ്യാഴാഴ്ച ബോട്ടില്‍ നിന്ന് ഇറങ്ങിയിരുന്നു. ജോനാ‍ഥന്‍ ഹാക്കറ്റ്, ലണ്ടന്‍ എന്നു മാത്രമായിരുന്നു ഇവര്‍ ഹൌസ്ബോട്ട് രേഖകളില്‍ നല്കിയിരിക്കുന്ന വിലാസം.

ബോട്ടില്‍ നിന്ന് ഇറങ്ങാന്‍ തയ്യാറാകാതിരുന്ന സംഘത്തെ പൊലീസെത്തി ബല പ്രയോഗിച്ച് ഇറക്കുകയായിരുന്നു. ഫോട്ടോഗ്രാഫര്‍മാരുടെ ക്യാമറയ്ക്കു മുന്നില്‍ നൃത്തം ചെയ്ത ശേഷമാണ് ഇവര്‍ പൊലീസ് ജീപ്പില്‍ കയറിയത്. ബോട്ടുയാത്രയ്ക്കിടയില്‍ ഇവര്‍ മദ്യപിക്കുകയും ലഹരിമരുന്ന് ഉപയോഗിക്കുകയും ചെയ്തിരുന്നതായി പൊലീസ് പറഞ്ഞു. സംഭവത്തെ തുടര്‍ന്ന് ഹൌസ് ബോട്ട് അധികൃതര്‍ പരാതി നല്കിയിട്ടുണ്ട്. സംഘത്തെ പിന്നീട് വൈദ്യപരിശോധനയ്ക്ക് വിധേയരാക്കിയിരുന്നു.


ഇതിനെക്കുറിച്ച് കൂടുതല്‍ വായിക്കുക :