കേരളത്തിന്റെ എഴുപത് വര്ഷത്തെ സാമൂഹിക-രാഷ്ട്രീയ ചരിത്രങ്ങള് ഗൗരിയമ്മയുടെ ജീവിതത്തിലൂടെ പറയുന്ന ഡോക്യുമെന്ററിയുടെ ചിത്രീകരണം തുടങ്ങി.' ഒരു നേര്കണ്ണാടി' എന്ന് പേരിട്ടിരിക്കുന്ന ഡോക്യുമെന്ററിയുടെ ആദ്യഘട്ടം ചിത്രീകരിച്ചത് ഗൗരിയമ്മയുടെ തറവാടായ അന്ധകാരനഴി കളത്തിത്തറയിലും ചാത്തനാട്ടെ വസതിയിലും ആയിരുന്നു. ഗൗരിയമ്മയുടെ കുട്ടിക്കാലവും സമരങ്ങളും വിവിധ രാഷ്ട്രീയ നേതാക്കളുടെ പ്രതികരണങ്ങളും ഉള്പ്പെടുത്തിയാണ് ഒരു മണിക്കൂറുള്ള ഡോക്യുമെന്ററി ഒരുക്കുന്നത്. വര്ക്കല അജയ് വിഷ്വല് ക്രിയേഷനാണ് നേര്കണ്ണാടി ആവിഷ്കരിക്കുന്നത്. നന്ദന് കൊഞ്ചിറയും സലില്മാങ്കുഴിയുമാണ് തിരക്കഥ ഒരുക്കിയത്. ക്യാമറക്കു പിന്നില് ശ്രീകുമാര് വെഞ്ഞാറമൂടിന്റെ നിര്ദേശങ്ങള് പാലിച്ച് ഗൌരിയമ്മ കര്ഷക തൊഴിലാളികളോടൊപ്പം ഉള്ള ഭാഗങ്ങള് ചിത്രീകരിച്ചു. രണ്ടാംഘട്ടത്തില് ഗൗരിയമ്മയുടെ ബാല്യം ഉള്പ്പെടെ ചിത്രീകരിക്കും. ചേര്ത്തല, അമ്പലപ്പുഴ താലൂക്കുകളിലായി ആറ് മാസത്തിനകം ചിത്രീകരണം പൂര്ത്തിയാക്കുമെന്ന് സംവിധായകന് ജെ.ശ്രീകണുനും നിര്മാതാവ് ജനതാ വിജയനും പറഞ്ഞു. പല പ്രമുഖരുടെയും കുടുംബവും രാഷ്ട്രീയവും രണ്ടു വഴികളിലൂടെ പോകുമ്പോഴും കുടുംബം രാഷ്ട്രീയമാക്കിയ കെ.ആര്.ഗൗരിയമ്മയുടെ സ്ത്രീപക്ഷത്തു നിന്നുള്ള ഒരു കാഴ്ച കൂടിയാകും ഡോക്യുമെന്ററി എന്ന് അണിയറ ശില്പികള് പറഞ്ഞു. |
തിരച്ചിലുമായി ബന്ധപ്പെട്ട വിവരങ്ങള് |
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്റ് ചെയ്യൂ
