വിദ്യാര്ത്ഥികള്ക്ക് യാത്രാസൌജന്യം നല്കില്ലെന്ന തീരുമാനം ബസുടമകള് പിന്വലിച്ചു. സര്ക്കാരുമായി നടത്തിയ ചര്ച്ചയ്ക്ക് ശേഷം ചേര്ന്ന യോഗത്തിലാണ് ഈ തീരുമാനം.
എന്നാല് തങ്ങള് ഉന്നയിച്ച ആവശ്യങ്ങള് സര്ക്കാര് പരിഗണിച്ചില്ലെങ്കില് സെപ്റ്റംബര് ഒന്നു മുതല് അനിശ്ചിതകാല സമരം തുടങ്ങുമെന്നും ബസുടമകള് അറിയിച്ചു. ഈ മാസം 15 മുതല് സംസ്ഥാനത്തെ സ്വകാര്യ ബസുകളില് വിദ്യാര്ത്ഥികള്ക്ക് യാത്രാസൌജന്യം നല്കില്ലെന്ന് ബസുടമകള് നേരത്തെ അറിയിച്ചിരുന്നു.
ഈ തീരുമാനമാണ് ഇപ്പോള് പിന്വലിച്ചിരിക്കുന്നത്. സര്ക്കാരുമായി നടത്തിയ ചര്ച്ചയെ തുടര്ന്നാണ് ഈ തീരുമാനം എടുത്തതെന്ന് ബസുടമകളുടെ കോ-ഓര്ഡിനേഷന് കമ്മിറ്റി വാര്ത്താസമ്മേളനത്തില് അറിയിക്കുകയായിരുന്നു.
ബസ് ഓപ്പറേറ്റേഴ്സ് ഫെഡറേഷന്റെയും ബസ് ഓപ്പറേറ്റേഴ്സ് അസോസിയേഷന്റെയും നേതാക്കളാണ് കോ -ഓര്ഡിനേഷന് കമ്മിറ്റിയിലുള്ളത്. ചര്ച്ചകളിലൂടെ പ്രശ്നങ്ങള് പരിഹരിക്കാമെന്ന് ഗതാഗത മന്ത്രിയും വിദ്യാഭ്യാസ മന്ത്രിയും സര്ക്കാരിന് വേണ്ടി ഉറപ്പ് തന്നിട്ടുണ്ട്.
ഇതിന്റെ അടിസ്ഥാനത്തിലാണ് തങ്ങള് തീരുമാനം പിന്വലിക്കുന്നത്. അല്ലാതെ വിദ്യാര്ത്ഥി സംഘടനകള് തങ്ങളുടെ ഓഫീസുകള് അടിച്ചു തകര്ക്കുമെന്ന ഭയം കൊണ്ടല്ലെന്നും ബസുടമകള് പറഞ്ഞു.
|
വാര്ത്ത 
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്റ് ചെയ്യൂ