ഈസ്റ്റ് സസെക്സില് ഒരു പെണ്കുട്ടിയെ ബലാത്സംഗം ചെയ്തയാളെക്കുറിച്ച് വിവരങ്ങള് നല്കുന്നവര്ക്ക് 500 പൌണ്ട് പാരിതോഷികം നല്കുമെന്ന് ലണ്ടന് പൊലീസ്. ഏപ്രില് 11ന് നടന്ന സംഭവത്തിലെ പ്രതിയെക്കുറിച്ച് ഇതുവരെ വിവരങ്ങളൊന്നും ലഭിക്കാത്തതിനാലാണ് പാരിതോഷികം പ്രഖ്യാപിക്കാന് പൊലീസ് നിര്ബന്ധിതരായത്.
ഏപ്രില് 11ന് പുലര്ച്ചെ ഹേസ്റ്റിംഗ്സിലാണ് 18കാരിയായ പെണ്കുട്ടിയെ അജ്ഞാതന് ബലാത്സംഗം ചെയ്തത്. സെന്റ് ലിയോനാര്ഡ്സ് വാരിയര് സ്ക്വയര് റെയില്വെ സ്റ്റേഷന് സമീപം ഒരു ഇടവഴിയിലാണ് പെണ്കുട്ടി ആക്രമിക്കപ്പെട്ടത്.
ഈ റോഡിന് സമീപം സ്ഥാപിച്ചിരുന്ന ക്ലോസ്ഡ് സര്ക്യൂട്ട് ക്യാമറയില് നിന്നുള്ള ചിത്രങ്ങളില് പ്രതിയുടെ രൂപം ദൃശ്യമാണ്. പെണ്കുട്ടിയുടെ സമീപത്തേക്ക് ഒരാള് വരുന്ന ചിത്രവും, ആക്രമണത്തിന് ശേഷം അയാള് ഓടിപ്പോകുന്ന ചിത്രവും സി സി ടി വിയില് നിന്ന് ലഭിച്ചിട്ടുണ്ട്. എന്നാല് ഇയാള് ആരാണെന്ന് തിരിച്ചറിയാന് കഴിഞ്ഞിട്ടില്ല.
സുഹൃത്തുക്കളെ സന്ദര്ശിക്കാനായാണ് കെന്റിലെ ടണ്ബ്രിഡ്ജ് വെല്സ് സ്വദേശിനിയായ പെണ്കുട്ടി ഹേസ്റ്റിംഗ്സിലെത്തിയത്. സംശയത്തിന്റെ പേരില് ഒരു 29കാരനെ പൊലീസ് അറസ്റ്റ് ചെയ്തെങ്കിലും പിന്നീട് വിട്ടയച്ചിരുന്നു.