മുംബൈ ഭീകരാക്രമണം സംബന്ധിച്ച് ഇന്ത്യ കൈമാറിയ തെളിവുകളെ കുറിച്ചുള്ള പാക് പ്രതികരണം ജനുവരി 29 ന് ഉണ്ടായേക്കും. ജനുവരി 28 ന് മറുപടി നല്കാനായിരുന്നു പാകിസ്ഥാന്റെ തീരുമാനം.
പത്ത് ദിവസത്തിനുള്ളില് പ്രാഥമിക അന്വേഷണം പൂര്ത്തിയാക്കാനായിരുന്നു പാകിസ്ഥാന് തീരുമാനം. എന്നാല്, അന്വേഷണം പൂര്ത്തിയാക്കാന് സാധിക്കാത്തതുകാരണമാണ് പ്രതികരണം രണ്ട് ദിവസങ്ങള് കൂടി നീട്ടിയതെന്ന് പാക് ചാനലായ ‘ഡോണ്’ റിപ്പോര്ട്ട് ചെയ്യുന്നു. അന്വേഷണ പുരോഗതി വിലയിരുത്താന് പാക് പ്രധാനമന്ത്രിയുടെ ആഭ്യന്തരകാര്യ ഉപദേഷ്ടാവ് റഹ്മാന് മാലിക് ഒരു യോഗം വിളിച്ചു ചേര്ത്തിരുന്നു. എന്നാല്, ഇതെ കുറിച്ച് ഔദ്യോഗിക വിശദീകരണമൊന്നും ഉണ്ടായിട്ടില്ല.
ഇന്ത്യ കൈമാറിയ തെളിവുകളെ കുറിച്ച് പഠിക്കാന് മൂന്നംഗ സമിതിയെ നിയോഗിച്ചിട്ടുണ്ട് എന്നും പത്ത് ദിവസത്തിനുള്ളില് പ്രാഥമിക കണ്ടെത്തലുകള് സമര്പ്പിക്കുമെന്നും റഹ്മാന് മാലിക് ജനുവരി 17 ന് പറഞ്ഞിരുന്നു.
അന്വേഷണം ഏകദേശം പൂര്ത്തിയായിട്ടുണ്ട് എന്നും ഇന്ത്യ നല്കിയ തെളിവുകളുടെ ഏതാനും വശങ്ങള് മാത്രമേ ഇനി വിശകലനം ചെയ്യാനുള്ളൂ എന്നും ഡോണ് റിപ്പോര്ട്ട് ചെയ്യുന്നു.
ജനുവരി അഞ്ചിനാണ് ഇന്ത്യ മുംബൈ ഭീകരാക്രമണത്തെ കുറിച്ചുള്ള തെളിവുകള് പാകിസ്ഥാന് കൈമാറിയത്. ഇതിനു ശേഷമാണ്, ആക്രമണത്തെ തുടര്ന്ന് ജീവനോടെ പിടികൂടാന് സാധിച്ച ഏക ഭികരന്, അജ്മല് അമിന് കസബ് സ്വന്തം പൌരനാണെന്ന് പാകിസ്ഥാന് അംഗീകരിച്ചത്.
| 
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്റ് ചെയ്യൂ