വ്യാഴാഴ്ചത്തെ വന് തകര്ച്ചയ്ക്ക് ശേഷം വെള്ളിയാഴ്ച ആദ്യ വ്യാപാരത്തില് തന്നെ സെന്സെക്സില് വന് മുന്നേറ്റം. 56 പോയിന്റ് നേട്ടത്തോടെ വ്യാപാരം തുടങ്ങിയ സെന്സെക്സ് പിന്നീട് 160 പോയിന്റോളം ഉയര്ന്ന് 14,456 എന്ന നിലയിലെത്തി. കഴിഞ്ഞ ദിവസം സെന്സെക്സ് 257 പോയിന്റ് ഇടിഞ്ഞ് 14,265 എന്ന നിലയിലാണ് വ്യാപാരം അവസാനിപ്പിച്ചത്. കഴിഞ്ഞ ദിവസം 435 പോയിന്റിന്റെ ഇടിവാണ് സൂചികയില് അനുഭവപ്പെട്ടത്.
അതേസമയം, സെന്സെക്സിലെ മുന്നേറ്റത്തിന് സമാനമായ നേട്ടം ദേശീയ ഓഹരി സൂചികയായ നിഫ്റ്റിയിലും പ്രകടമായി. എന് എസ് ഇയില് തുടക്ക വ്യാപാരത്തില് തന്നെ 59.85 പോയിന്റ് നേട്ടം കൈവരിച്ച് 4,311 എന്ന നിലയിലെത്തി. കഴിഞ്ഞ ദിവസം വിപണി അടയ്ക്കുമ്പോള് ദേശീയ ഓഹരി സൂചികയായ നിഫ്റ്റി 105 പോയന്റ് ഇടിഞ്ഞ് 4,251 എന്ന നിലയിലായിരുന്നു.
ടാറ്റാ മോട്ടോര്സും റിലയന്സ് ഇന്ഫ്രസ്ട്രക്ചറുമാണ് വെള്ളിയാഴ്ച ഏറ്റവും കൂടുതല് നേട്ടം കൈവരിച്ചത്. ടാറ്റാ മോട്ടോര്സ് നാലു ശതമാനം ലാഭം നേടിയപ്പോള് റിലയന്സ് ഇന്ഫ്രാസ്ട്രക്ചര് 4.5 ശതമാനം മുന്നേറ്റം നടത്തി. ടാറ്റാസ്റ്റീല്, സ്റ്റര്ലൈറ്റ്, ഡി എല് എഫ്, റിലയന്സ് കമ്യൂണിക്കേഷന്സ്, എച്ച് ഡി എഫ് സി ബാങ്ക്, ജയപ്രകാശ്, സണ് ഫാര്മ, എസ് ബി ഐ എന്നീ കമ്പനികളുടെ ഓഹരികളും മികച്ച മുന്നേറ്റം നടത്തി. എന്നാല്, ഒ എന് ജി സി, എന് ടി പി സി എന്നീ കമ്പനികളുടെ ഓഹരികള്ക്ക് നേരിയ നഷ്ടം നേരിട്ടു. | 
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്റ് ചെയ്യൂ