പെണ്ണുങ്ങള് വിചാരിച്ചാല് എന്തൊക്കെ നടക്കും? നടക്കാത്തതായി ഒന്നുമില്ലെന്ന് തെളിയിച്ചിരിക്കുകയാണ് ഉത്തരേന്ത്യക്കാരായ കുറച്ച് ‘പെണ്പുലികള്’. കാലം ഇഷ്ടമുള്ള കോലത്തില് കുതിച്ചു പായുന്ന ഇക്കാലത്ത് കഴിയുന്ന മേഖലകളിലെല്ലാം കൈവെച്ചു നോക്കാന് സുന്ദരിമാര് തയ്യാറാണ്.
ഐ ടിയിലും, സയന്സിലും, സാമൂഹ്യ സേവനങ്ങളിലും വ്യത്യസ്ത രൂപങ്ങളിലും ഭാവങ്ങളിലും സ്ത്രീ എത്തി. പുരുഷന്മാര് കുത്തകയാക്കി വെച്ചിരുന്ന മാധ്യമപ്രവര്ത്തനത്തിലും സ്ത്രീകള് വെന്നിക്കൊടി പാറിച്ചു. എന്നാല്, സ്ത്രീകള് കൂട്ടം ചേര്ന്ന് തുടങ്ങിയ ഒരു പത്രത്തിന് ലോകോത്തര അംഗീകാരം ലഭിച്ചാലോ? അദ്ഭുതപ്പെടേണ്ട. ഉത്തരേന്ത്യയില് നിന്നാണ് ഈ വാര്ത്ത വന്നിരിക്കുന്നത്.
ഉത്തരേന്ത്യന് സംസ്ഥാനമായ ഉത്തര്പ്രദേശില് ദിവസവും ഏതാണ്ട് 20,000 ആളുകള്ക്കിടയില് വിതരണം ചെയ്യുന്ന ‘ഖബര് ലഹാരിയ’ എന്ന പത്രമാണ് ലോകോത്തര അംഗീകാരം നേടി തിളങ്ങി നില്ക്കുന്നത്. യുനെസ്കോയുടെ ഈ വര്ഷത്തെ കിങ് സെ ജോങ് സാക്ഷരതാ പുരസ്ക്കാരമാണ് ‘ഖബര് ലഹാരിയ’ നേടിയത്. ‘സാക്ഷരതയും ശക്തീകരണവും’ ഒത്തു ചേര്ന്നപ്പോള് 20,000 ഡോളറാണ് വിജയികളുടെ പ്രവര്ത്തനങ്ങള്ക്ക് അകമ്പടി സേവിക്കാനെത്തിയത്. സ്ത്രീകളുടെയും മുതിര്ന്നവരുടെയും അവഗണനയനുഭവിക്കുന്നവരുടെയും സാക്ഷരതയ്ക്കായി നടത്തുന്ന പ്രവര്ത്തനങ്ങള്ക്കാണ് അവാര്ഡ് നല്കുന്നത്.