ദിലീപ് ക്യാമ്പ് ഉണര്വിലാണ്. ‘പാപ്പീ അപ്പച്ചാ’ എന്ന ഹിറ്റിനു ശേഷം ദിലീപ് മാസങ്ങളോളം ക്യാമറയ്ക്ക് പിന്നിലായിരുന്നു. മലര്വാടി ആര്ട്സ്ക്ലബ്, മെട്രോ എന്നീ സിനിമകളുടെ നിര്മ്മാണപ്രവര്ത്തനങ്ങളിലായിരുന്നു അദ്ദേഹം. അതിനിടെ കാര്യസ്ഥന്, ഫിലിം സ്റ്റാര്, മേരിക്കുണ്ടൊരു കുഞ്ഞാട് തുടങ്ങിയ സിനിമകളില് അഭിനയിക്കുകയും ചെയ്തു. കാര്യസ്ഥന് ഈ വെള്ളിയാഴ്ച നൂറോളം കേന്ദ്രങ്ങളില് പ്രദര്ശനത്തിനെത്തുകയാണ്.
മലയാളത്തിലെ എക്കാലത്തെയും ഹിറ്റ് ചിത്രമായ ‘ട്വന്റി20’യുടെ രണ്ടാം ഭാഗം ദിലീപ് ആലോചിക്കുന്നതായി വാര്ത്തകള് വന്നിരുന്നു. എന്നാല് അങ്ങനെയൊരു ആലോചന ‘ആലോചനമാത്ര’മായി ഒതുങ്ങി എന്നാണ് ദിലീപ് ഇപ്പോള് അറിയിച്ചിരിക്കുന്നത്. എന്നാല് ആവേശകരമായ മറ്റൊരു വാര്ത്ത ദിലീപ് ക്യാമ്പ് പുറത്തുവിട്ടിട്ടുണ്ട്. ദിലീപിന്റെ മെഗാഹിറ്റ് സിനിമയായ ‘പഞ്ചാബി ഹൌസ്’ രണ്ടാം ഭാഗം ഉടന് പ്രതീക്ഷിക്കാം.
പഞ്ചാബി ഹൌസിന്റെ സംവിധായകരായ റാഫി - മെക്കാര്ട്ടിന് ഈ സിനിമയുടെ രണ്ടാം ഭാഗത്തിനായി രണ്ടു കഥകള് ദിലീപിനോട് പറഞ്ഞിട്ടുണ്ട്. അതിലൊന്ന് ഉടന് നിശ്ചയിക്കും. ദിലീപ് ഗ്രീന് സിഗ്നല് നല്കിക്കഴിഞ്ഞാല് റാഫിയും മെക്കാര്ട്ടിനും ‘പഞ്ചാബി ഹൌസ് - 2’ന്റെ രചനാജോലികളിലേക്ക് കടക്കും.
1998 സെപ്റ്റംബര് നാലിന് റിലീസായ പഞ്ചാബി ഹൌസ് മലയാളത്തിലെ ചിരിച്ചിത്രങ്ങളുടെ രാജാവാണ്. ഊമയായി ദിലീപ് നടത്തിയ പ്രകടനങ്ങളും ഹരിശ്രീ അശോകന്, കൊച്ചിന് ഹനീഫ ടീമിന്റെ കോമഡിയും സുരേഷ് പീറ്റേഴ്സിന്റെ ഗാനങ്ങളുമായിരുന്നു ആ സിനിമയുടെ ഹൈലൈറ്റ്.
ഹരികൃഷ്ണന്സ്, സമ്മര് ഇന് ബേത്ലഹേം എന്നീ സിനിമകള്ക്ക് ശേഷം 1998ല് സംഭവിച്ച മൂന്നാമത്തെ മെഗാഹിറ്റായിരുന്നു പഞ്ചാബി ഹൌസ്. 200 ദിവസത്തിലേറെ പ്രദര്ശിപ്പിച്ച സിനിമയ്ക്ക് പത്തുകോടിയിലേറെയാണ് ഗ്രോസ് കളക്ഷന് ലഭിച്ചത്. എന്തായാലും പഞ്ചാബി ഹൌസിന്റെ രണ്ടാം ഭാഗം എത്തുമ്പോള് പൊട്ടിച്ചിരികള്ക്കിടയിലും, കൊച്ചിന് ഹനീഫയുടെ അസാന്നിധ്യം പ്രേക്ഷകരെ വേദനിപ്പിക്കുക തന്നെ ചെയ്യും.