അധോലോക സംഘങ്ങളെക്കുറിച്ചും അവയുടെ പ്രവര്ത്തനങ്ങളെക്കുറിച്ചുമൊക്കെ ഏറ്റവും നന്നായി സിനിമയെടുക്കുന്നത് രാം ഗോപാല് വര്മയാണ്. ഇക്കാര്യം വലിയ അധോലോക നായകര് പോലും സമ്മതിച്ചിട്ടുള്ളതാണ്. ചില ഡോണുകള് തങ്ങളുടെ കഥ സിനിമയാക്കാന് രാമുവിനെ സമീപിച്ചതായി വാര്ത്തകള് വന്നിരുന്നതും ഓര്ക്കുക.
സത്യ, കമ്പനി തുടങ്ങി ആര് ജി വി അണിയിച്ചൊരുക്കിയ ഗാംഗ്സ്റ്റര് സിനിമകള് പ്രേക്ഷകര്ക്ക് എന്നും പ്രിയപ്പെട്ടവയാണ്. തനിക്ക് ഏറ്റവും ഇഷ്ടപ്പെട്ട വിഷയമായ അധോലോകത്തെക്കുറിച്ച് വീണ്ടും ഒരു സിനിമയെടുക്കാന് രാമു ഒരുങ്ങുന്നു എന്നതാണ് പുതിയ വാര്ത്ത.
‘ഡിപ്പാര്ട്ടുമെന്റ്’ എന്നാണ് പുതിയ ഗാംഗ്സ്റ്റര് സിനിമയുടെ പേര്. അധോലോകവും പൊലീസും തമ്മിലുള്ള ബന്ധത്തെക്കുറിച്ചും ഗാംഗ് വാറുകളെക്കുറിച്ചുമൊക്കെയാണ് ഈ സിനിമ പറയുന്നത്.
“പൊലീസും അണ്ടര്വേള്ഡും തമ്മിലുള്ള ബന്ധത്തെക്കുറിച്ച് ഇനിയും പറഞ്ഞിട്ടില്ലാത്ത കഥയാണ് ഡിപ്പാര്ട്ടുമെന്റ് പറയുന്നത്. ഞാന് ഇപ്പോള് ഈ സിനിമയുടെ തിരക്കഥാ രചനയിലാണ്. താരങ്ങള് ആരൊക്കെയെന്ന് പിന്നീട് തീരുമാനിക്കും” - രാം ഗോപാല് വര്മ പറയുന്നു.
രാമുവിന് ഏറ്റവും പ്രിയപ്പെട്ട നടനായ മോഹന്ലാല് ഈ ചിത്രത്തില് അഭിനയിക്കുമോ എന്നാണ് സിനിമാലോകം ഉറ്റുനോക്കുന്നത്. ആര് ജി വിയുടെ വിളി വന്നാല് ഡേറ്റ് നല്കാനായി ലാല്ക്യാമ്പും തയ്യാറായിരിക്കുന്നതായി റിപ്പോര്ട്ടുകളുണ്ട്.