മെഗാസ്റ്റാര്‍ മമ്മൂട്ടിക്കും യൂണിവേഴ്സല്‍ സ്റ്റാര്‍ മോഹന്‍ലാലിനും ലക്ഷങ്ങളുടെ നഷ്ടം സംഭവിക്കാന്‍ പോകുന്നു. എങ്ങനെയെന്നല്ലേ? നിര്‍മ്മാതാക്കളുടെ സംഘടനയും താരസംഘടനയായ ‘അമ്മ’യും തമ്മില്‍ നടത്തിയ ചര്‍ച്ചയില്‍ ഉണ്ടായ ധാരണപ്രകാരം മൂന്നു ലക്ഷത്തിനു മേല്‍ പ്രതിഫലം വാങ്ങുന്ന താരങ്ങള്‍ അതില്‍ 25 ശതമാനം കുറവുവരുത്തണം. അങ്ങനെയെങ്കില്‍ മമ്മൂട്ടിക്കും മോഹന്‍ലാലിനും ഓരോ സിനിമയ്ക്കും ഉണ്ടാകുന്ന നഷ്ടം ആലോചിച്ചു നോക്കൂ.
ഒരുകോടിക്ക് മേലെയാണ് ലാലും മമ്മൂട്ടിയും ഓരോ സിനിമയ്ക്കും പ്രതിഫലം വാങ്ങുന്നത്. പ്രതിഫലത്തില്‍ 25 ശതമാനം കുറവു വരുത്തിയാല്‍ ഇരുവര്‍ക്കും കുറഞ്ഞത് 25 ലക്ഷം വീതം നഷ്ടമുണ്ടാകും. അതായത് തങ്ങളുടെ പ്രതിഫലം 75 ലക്ഷമായി അവര്‍ക്ക് ചുരുക്കേണ്ടിവരുമെന്ന് സാരം.
സുരേഷ്ഗോപി, ദിലീപ് എന്നിവര്‍ അമ്പത് ലക്ഷത്തിനു മേലെയാണ് പ്രതിഫലം പറ്റുന്നത്. അവര്‍ക്ക് 20 ലക്ഷത്തോളം രൂപ ഓരോ സിനിമയ്ക്കും വേണ്ടെന്ന് വയ്ക്കേണ്ടി വരും. നാല്‍പ്പത് ലക്ഷം വീതം വാങ്ങുന്ന പൃഥ്വിരാജും ജയറാമും ഇനി മുതല്‍ തങ്ങളുടെ പ്രതിഫലം 30 ലക്ഷത്തിലൊതുക്കണം.
ജയസൂര്യ, ഇന്ദ്രജിത്ത്, നരേന്‍ തുടങ്ങിയവര്‍ക്കും അഞ്ചുലക്ഷത്തോളം രൂപ പ്രതിഫലത്തില്‍ കുറയ്ക്കേണ്ടിവരും. നായികമാരില്‍ ഭാവനയാണ് മലയാളത്തില്‍ ഇപ്പോള്‍ ഏറ്റവുമധികം പ്രതിഫലം പറ്റുന്നത്. ഭാവനയ്ക്ക് നാലുലക്ഷത്തോളം രൂപ തന്‍റെ പ്രതിഫലത്തില്‍ കുറവു വരുത്തേണ്ടി വരും.
ചെറിയതാരങ്ങള്‍ക്കാണ് കൂടുതല്‍ ബുദ്ധിമുട്ട്. മൂന്നു ലക്ഷം രൂപ പ്രതിഫലം വാങ്ങുന്നവര്‍ക്ക് ഇനിമുതല്‍ 75000 രൂപ കുറയ്ക്കേണ്ടിവരും.
