ഗുരുജി ശതാബ്ദി

ഗുരു ഗോപിനാഥ് - ജീവിതരേഖ

Thu, 26 Jun 2008 18:39:25 +0530

ഗുരു ഗോപിനാഥ് (ചമ്പക്കുളം ഗോപിനാഥ പിള്ള)
ജനന ദിവസം :
1908 ജൂണ്‍ 24
ജന്മസ്ഥലം :
ആലപ്പുഴ ജില്ലയിലെ കുട്ടനാട്ടില്‍ അമിച്ചകരിയിലെ ചമ്പക്കുളത്ത്.
നക്ഷത്രം :
മിഥുനത്തിലെ പൂയ്യം
അച്ഛന്‍ :
കൈപ്പള്ളി വീട്ടില്‍ ശങ്കരപ്പിള്ള
അമ്മ: :
പെരുമാനൂര്‍ വീട്ടില്‍ മാധവി അമ്മ
പിതാമഹന്‍ :
കൊട്ടാരം കഥകളി നടന്‍ ഭീമന്‍ (അമ്മയുടെ അച്ഛന്‍)
സഹോദരങ്ങള്‍ :
കഥകളി ആചാര്യന്‍ ചമ്പക്കുളം പാച്ചുപിള്ള അടക്കം നാലു പേര്‍
ഗുരുനാഥന്‍മാര്‍ :
ചമ്പക്കുളം പരമുപിള്ള മാത്തൂര്‍ കുഞ്ഞുപിള്ള പണിക്കര്‍, തകഴി കേശവ പണിക്കര്‍, ഗുരുകുഞ്ചുക്കുറുപ്പ്,കവളപ്പാറ നാരായണന്‍ നായര്‍, ഗുരു ചെങ്ങന്നൂര്‍ രാമന്‍ പിള്ള
വിദ്യാഭ്യാസം :
അഞ്ചാം ക്ളാസ്സ്, പിന്നെ കഥകളി തെക്കന്‍ ചിട്ട 9 കൊല്ലം, കലമണ്ഡലതില്‍ 2 കൊല്ലം വടക്കന്‍ ചിട്ട
അരങ്ങേറ്റം :
ചമ്പക്കുളത്തെ പടിപ്പുരയ്ക്കല്‍ ക്ഷേത്രം
കലാമണ്ഡലത്തിലെ സഹപാഠികള്‍ :
ആനന്ദ ശിവറാം , മാധവന്‍ , കേളുനായര്‍ ,കലാമണ്ഡലം കൃഷ്ണന്‍ നായര്‍

(വീഡിയോ :ജീവിത നൌക എന്ന ((പഴയ മലയാള സിനിമയില്‍ ഗുരു ഗോപിനാഥ് യേശുക്രിസ്തുവിന്‍റെ വേഷത്തില്‍)

സഹനര്‍ത്തകിമാര്‍ :
രാഗിണി ദേവി (എസ്തര്‍ ഹെര്‍മാന്‍- പ്രമുഖ നര്‍ത്തകി ഇന്ദ്രാണി റഹ് മാന്‍റെ അമ്മ ), തങ്കമണി
വിവാഹം :
1936ല്‍
ഭാര്യ :
കുന്ദംകുളം മങ്ങാട് മുളയ്ക്കല്‍ വീട്ടില്‍ തങ്കമണി. കലാമണ്ഡലം തുടങ്ങിയപ്പോള്‍ അവിടെ മോഹിനിയാട്ടം പഠിക്കാനുണ്ടായിരുന്നത് തങ്കമണി മാത്രമായിരുന്നു. അവിടത്തെ ആദ്യത്തെ മോഹിനിയാട്ടം വിദ്യാര്‍ഥിനി. വിവാഹത്തിനു ശേഷം കേരളനടനം വിദഗ്ധയും പരിശീലകയും ഗുരു ഗോപിനാഥിന്‍റെ സഹനര്‍ത്തകിയും ആയി.
മക്കള്‍ :
വാസന്തി ജയ്സ്വാള്‍, ജി.വേണുഗോപാല്‍, വിലാസിനി രാമചന്ദ്രന്‍, വിനോദിനി ശശിമോഹന്‍

മരണം:

1987 ഒക്ടോബര്‍ 9 ന് - എറണാകുളത്ത് കേരള ഫൈന്‍ ആര്‍ട്സ് സൊസൈറ്റിയുടെ ഭാരതകലോത്സവത്തിന്‍റെ അരങ്ങില്‍ അന്ത്യം.(സ്വഛന്ദ മൃത്യു- രാമായണം ബലേയില്‍ ദശരഥന്‍റെ വേഷം അഭിനയിക്കുമ്പോള്‍ അരങ്ങത്ത് തന്നെ മരണം)

അച്ഛന്‍: മധുരമായ ഒരോര്‍മ്മ

Thu, 26 Jun 2008 18:36:01 +0530

ജീവിച്ചിരുന്നെങ്കില്‍ അച്ഛന് ഇന്ന് 100 വയസ്സാകുമായിരുന്നു. എന്നാല്‍ എന്‍റെ മനസ്സില്‍ അച്ഛന് അത്രക്കൊന്നും വയസ്സായിട്ടുഇല്ല.ചുരുണ്ട നീളന്‍ മുടിയും സമൃദ്ധമായ താടിയും,നെറ്റിയില്‍ കുറിയും, മുഖത്ത് സദാ പ്രസാദവും,ചുണ്ടില്‍ ചെറു ചിരുമുള്ള അച്ഛനാണെന്‍റെ ഓര്‍മ്മയില്‍ എന്നും.

കലാകാരന്‍ എന്ന നിലയില്‍ അച്ഛനന്‍റെ ഏറ്റവും വലിയ ഗുണം സമര്‍പ്പണവും പൂര്‍ണ്ണതക്കുവേണ്ടിയുള്ള കഠിന തപവുമാണ്. സിദ്ധികകളെ സാധനയും ഉപാസനയും കൊണ്ട് ഉദാത്തമക്കാന്‍ അച്ഛനു കഴിഞ്ഞു. നൃത്തം പഠിപ്പിക്കുന്ന കാര്യത്തിലും അച്ഛന്‍ ഒരു വിട്ടുവീഴ്ചക്കും ഒരുക്കമല്ലായിരുന്നു.

വിചാരിച്ച മട്ടില്‍ നന്നായി, തികവോടെ വരുന്നതു വരെ പരിശീലനം തുടരും. നന്നയിലെങ്കില്‍ പെട്ടെന്നു ദേഷ്യം വരും. ചില ശിഷ്യര്‍ക്ക് നല്ല തല്ല് കീട്ടിയിരുന്നതായി കേട്ടിട്ടുണ്ട്. അവരെല്ലാം മികച്ച നര്‍ത്തകരായി പിന്നീട് അറിയപ്പെടുകയും ചെയ്തു

നിഷ്കാമിയായിരുന്നു അച്ഛന്‍.നൃത്തസപര്യയിലൂടെ എന്തെങ്കിലും പ്രതിഫലമോ നേട്ടമോ ഉണ്ടാകണമെന്ന് ആഗ്രഹിച്ചിട്ടില്ല.അന്‍പതോളം കലാകാരന്മാര്‍ പങ്കെടുത്ത രാമായണം ബാലെ അവതരിപ്പിച്ച് കിട്ടുന്ന പണം പങ്കു വെച്ച് കഴിയുമ്പോല്‍ അച്ഛന് അമ്പതോ നൂറോ കിട്ടിയാലായി .കര്‍മ്മം ചെയ്യുക -- നൃത്തം അവതരിപ്പിക്കുക- - അതു മാത്രമായിരുന്നു അച്ഛന്‍റെ ആനന്ദം.. സംതൃപ്തി.

( തമിഴ് സിനിമയായ മായാബാസാറില്‍ ഗുരു ഗോപിനാഥ് പകെടുത്ത ഭസ്മാസുരമോഹിനി നൃത്തം. ബ്ഭസ്മാസുരനായി ഗുരുഗോപിനാഥ്. ശിവനായി ഗുരു ഗോപാലകൃഷ്ണന്‍, മോഹിനിയായി ശാന്താറാവു )

അതുകൊണ്ടാണ് മരിച്ചദിവസം തീരെ സുഖമില്ലാഞ്ഞിട്ടും രാമായണം അവതരിപ്പിക്കാന്‍ ഏറണാകുളത്തേക്ക് പോയത്.കര്‍ട്ടനുയരുമ്പോള്‍ സ്റ്റേജിനുമുന്നിലുള്ള പുരുഷാരം എന്നും അച്ഛനേ സന്തോഷിപ്പിച്ചിരുന്നു

അച്ഛന്‍റെ ചെറിയകണ്ണൂകള്‍ ഭാവസാഗരമാഉയിരുന്നു; വിരലുകള്‍ വാചാലമായിരുന്നു. ആ മുഖത്ത് വിടരുന്നതുപോലെ ഭാവദീപ്തി മറ്റെങ്ങും ഞാന്‍ കണ്ടിട്ടില്ല. അച്ഛന്‍റെ മുദ്രാപ്രകടനത്തിന്‍റെ സൌകുമാര്യവും അനായാസതയും അനന്യമായിരുന്നു.

അച്ഛന്‍റെ ശരീര ഭാഷയ്ക്കുമുണ്ടായിരുന്നു സവിശേഷതകള്‍.ഏതു വേഷത്തോടും കതാപാത്രത്തോടും അച്ഛന്‍ ശരീരികമായി പൊരുത്തപ്പെട്ടിരുന്നു.അശോകകവനിയിലെ ഹനൂമാനും രാവണസ്ദഭയിലെ ഹനൂമാനും ആകാരത്തില്‍ വ്യത്യാസമുള്ളതായി തോന്നിക്കാന്‍ ആയിരുന്നു. അതു പോലെ ഭഗവ്ദ് ഗീതയില്‍ രഥവേഗം നടിച്ച് വരുമ്പോഴും,വിശ്വരൂപം പ്രാപിക്കുമ്പോഴും അഭിനയിത്തിന്‍റെ ഈ മാത്രിക സിദ്ധി അച്ഛന്‍ അനുഭവപ്പെടുത്താറുണ്ട്.

മുന്‍ശുണ്ഠിക്ക്കാരനായിരുന്നുവെങ്കിലും അച്ഛന്‍ എന്നോട്‌ ഒരിക്കലും ദേഷ്യപ്പെട്ടിട്ടില്ല.കൊച്ചുനാളില്‍ എന്‍റെ കുസൃതികളില്‍ സരസമായി പങ്കുകൊണ്ടിരുന്നു താനും. ഞാനും ചേചിയും ( വിലാസിനി ) അച്ഛനുറങ്ങുമ്പോള്‍ മുടി പിടിച്ച് പിരിച്ചു കെട്ടി വെക്കും ചിലപ്പോല്‍ ഞങ്ങളുടെ വക മുഖത്ത് മെയ്ക്കപ്പും ഇട്ടു കൊടുക്കും . അപ്പോഴെന്തേ അച്ഛന്‍ ദേഷ്യപ്പെടാതിരുന്നത് എന്ന് ഞാന്‍ ആലോചിച്ചിട്ടുണ്ട്.

അക്കാലത്തൊരിക്കല്‍ അച്ഛന്‍ എന്നോടു ചോദിച്ചു ‘മോളു വലുതായി കല്യാണം കഴിച്ചു അച്ഛനേയും അമ്മയേയും വിട്ടു പോവില്ലേ“ എന്ന് .എനിക്ക് സങ്കടം വന്നു. അന്നു ഞാന്‍ പറഞ്ഞു “ ഇല്ല ഞാന്‍ കൂടെത്തന്നെ താമസിക്കും “ എന്ന്എനിക്കത് പാലിക്കാന്‍ കഴിഞ്ഞു. വയസ്സുകാലത്ത് അവരോടൊപ്പം താമസിക്കാന്‍ മക്കളില്‍ എനിക്കു മാത്രമേ സാധിച്ചുള്ളൂ .

പക്ഷേ ഞാന്‍ ദൂര യാത്ര പോയപ്പോഴായിരുന്നു അച്ഛന്‍ ഞങ്ങളെ വിട്ടു പിരിഞ്ഞത് . ആ സമയം കൂടെ ഉണ്ടായില്ലല്ലോ എന്നോര്‍ത്ത് ഞാന്‍ വിഷമിച്ചിട്ടുണ്ട്.കൂടെ ഉണ്ടായിരുന്നെങ്കിലും മരണസമയത്ത് എനിക്ക് അച്ഛനോടൊപ്പം ഉണ്ടാവാന്‍ കഴിയുമായിരുന്നില്ല . ആഗ്രഹിച്ചതുപോലെ അരങ്ങില്‍ തന്നെ ആയിരുന്ന്അല്ലോ അന്ത്യം.നൂപുരങ്ങളോടെയും, ചമയങ്ങളോടെയും, ആടയാഭരങ്ങളോടെയും വേദിയില്‍ തന്നെ മരിക്കാന്‍ അച്ഛനു കഴിഞ്ഞത് കര്‍മ്മ ശുദ്ദ്ധി കൊണ്ടും പ്രാര്‍ഥന കൊണ്ടുമാണ്.

മൂകാംബികാ ഭക്തനായിരുന്നു അച്ഛന്‍. സകല ശ്രേയസ്സിനും കാരണം ദേവിയാണെന്ന് അടിയുറച്ച് വിശ്വസിച്ചു. മരിക്കുന്നതിനു തൊട്ടു മുന്‍പ് നവരാത്രി പൂജക്കായി മൂകാംബികയില്‍ പോയിരുന്നു. ഏന്നും വീട്ടില്‍ ഒരുമണിക്കൂര്‍ നീളുന്ന പൂജ ഉണ്ടായിരുന്നു അച്ഛന്‍റെ ദിന ചര്യയുടെ ശ്രേഷ്ഠമായ ഭാഗമായിരുന്നു അത്. വീട്ടു വളപ്പില്‍ല്‍ നട്ടു വളര്‍ത്തിയ പൂക്കളും തുളസിയും ഉപയോഗിച്ച് മാലകെട്ടിയായിരുന്നു പൂജ.

ഭക്തനായിരുന്നു വെങ്കിലും അച്ഛനൊരിക്കലും ആള്‍ദൈവളുടെ പുറകെപോയിയിരുന്നില്ല, . ഭക്തി കലാജീവിതത്തിനല്‍ മാത്രമല്ല വ്യക്തി ജീവിതത്തിലും വിശുദ്ധി കാത്തു സൂക്ഷിക്കാന്‍ സഹായിച്ചു . അടിമുടി മാന്യമായി ആര്‍ജ്ജവത്തോടെ വിനയത്തോടെ ജീവിക്കാന്‍ അച്ഛനായി.

ഒട്ടേറെ പാവപ്പെട്ട കുട്ടികളെ അച്ഛന്‍ ഫീ‍സില്ലാതെ പഠിപ്പിച്ചു.മദ്രാസിലും തിരുവനന്തപുരത്തും എല്ലാം... വട്ടിയൂര്‍ക്കവിനു ചുറ്റും വിശ്വകലാകെന്ദ്രത്തില്‍ വന്ന് കുട്ടികള്‍ പഠിക്കാത്ത വീടുകളുണ്ടാവില്ല എന്നു പറഞ്ഞാല്‍ അതിശയോക്തിയല്ല.. അച്ഛനീടാക്കിയിരുന്ന ഫീസ് ഇന്നത്തെ നൃത്താധ്യാപകരുടെ ഫീസുമായി തട്ടിച്ചു നോക്കിയാല്‍ ഒന്നുമല്ലയിരുന്നു .

തെറ്റു കണ്ടാല്‍ സ്വന്തം അഭിപ്രായം പറയുമായിരുന്നുവെങ്കിലും, മറ്റു കലാകാരന്മാരെ അംഗീകരിക്കുന്നതില്‍ അച്ഛന്ന് ഒരു മടിയുമില്ലായിരുന്നു. അതു പ്രായത്തില്‍ ചെറിയ ആളാണെങ്കില്‍ പോലും. കേരള നടനം രൂപപ്പെടുത്താന്‍ പ്രേര്രകമായത് അമേരിക്കന്‍ നര്‍ത്തകി രാഗിണീ ദേവി ആയിരുന്നു എന്ന് അച്ഛന്‍ ആത്മകഥയില്‍ എഴുതിയിട്ടുണ്ട്.

UNI

സ്വന്തം ജീവിതത്തിലൂടെ അച്ഛന്‍ ഞങ്ങള്‍ക്കു കാണിച്ചു തതന്ന വലിയൊരു മാതൃക ചിട്ടയുള്‍ല ലളിത ജീവിതമാണ്. എല്ലാ സൌഭാഗ്യങ്ങളും ഉണ്ടായിരുന്നപ്പോഴും സാധാരണക്കാരനായ കുട്ടനാട്ടുകാരനെപ്പോലെ ജീവിക്കാന്‍ അച്ഛനു കഴിഞ്ഞു.

കലയോറ്റൊപ്പം കൃഷിയും അച്ഛന്‍ നോക്കിയിരുന്നു. കൃഷിയില്‍ നല്ല കൈപ്പുണ്യം ഉണ്ടായിരുന്നു ഏന്തു നട്ടാലും പിടിക്കും; ന്നിറയെ കായ്ക്കുകയും ചെയ്യും. ഡാന്‍സ് ക്ലാസോ മറ്റു പരിപാടികളൊ ഇലീങ്കില്‍ ആചനെ കാണുക പറമ്പിലായിരിക്കും.

കൃഷിക്കാ‍ാര്യത്തില്‍ അച്ഛനും അമ്മയും തമ്മില്‍ ഒരു ഡിവിഷന്‍ ഓഫ് ലേബര്‍ ഉണ്ടായിരുന്നു.അവര്‍ താമസിച്ച എല്ലയിടത്തും പ്ശുക്കളുണ്ടായിരുന്നു. പശു കോഴി വളര്‍ത്തലും കറവയും നെല്‍കൃഷിയും എല്ലാം അമ്മയുടെ മേല്‍നൊട്ടത്തിലായിരുന്നു .

അതില്‍ അച്ഛന്‍റെ നോട്ടം നിത്യം ഒരു പുഴുങ്ങിയ മുട്ടയും ശുദ്ധമായ ഒരു ഗ്ലാസ്സ് പാലും മാത്രം. വളമുണ്ടാക്കല്‍ വളമിടല്‍ ചാരമുണ്ടാക്കല്‍ പ്രറമ്പില്‍ വാഴയും മരച്ചീനിയും മറ്റും നടല്‍ എന്നിവയെല്ലം അച്ഛന്‍റെ ഉത്തരവാദിത്തമായിരുന്നു. അച്ഛന്‍ നട്ട തെങ്ങും മാവും ജാതിയും ഗ്രാമ്പൂവുംസപ്പൊട്ടയുമെല്ലാം ഇന്നും ഞങ്ങളുടെ പറമ്പിലുണ്ട്.

ഭക്ഷണ കാര്യത്തില്‍ വലിയ നിര്‍ബന്ധമൊന്നും ഇല്ലയിരുന്നെങ്കിലും, ഊണിനു നല്ല തുണ്ടം മീന്‍ ഉണ്ടെങ്കില്‍ കുശാലായി . ഭസ്മവും ചന്ദനപ്പൊട്ടും കണ്ട് പലരുമ്ം അച്ഛന്‍ സസ്യഭുക്കാണെന്നു തെറ്റിധരിച്ചിട്ടുണ്ട്. ചില ദിവസം അമ്മ അടുക്കളക്കര്യങ്ങള്‍ ശ്ലോകത്തില്‍ കഴിക്കും അന്നുണ്ടാവുക ‘മുളകുഷ്യം’ ആയിരിക്കും. അപ്പോള്‍ അച്ഛന്‍റെ വകയുടാവുന്ന കമന്‍റ് ഞാനോര്‍ക്കുന്നു. “ ഇന്നെന്താ തങ്കമണീ മുളക് ലോഷനാനോ?”
.

അമ്മ തങ്കമണി ( കാര്‍ത്യായനി) എല്ലാ അര്‍ഥത്തിലും വ്യാപ്തിയിലും അച്ഛന്‍റെ ‘സഹധര്‍മ്മിണി‘ ആയിരുന്നു. അച്ഛന്‍റെ നേട്ടങ്ങളുടെ പകുതി അമ്മയ്ക്ക് അവകാശപ്പെട്ടതാണ്. കേരള നടനം ഉണ്ടാക്കിയതും , വളര്‍ത്തിയതും , പരിശീലിപ്പിച്ചതും, ഇരുവരും ഒന്നിച്ചായിരുന്നു.

ഒരുരുകാലത്ത് ഗോപിനാത്തഥ് തങ്കമണി ജോഡി ഇന്ത്യയിലെ ഏറ്റവും അറിയപ്പെടുന്ന നര്‍ത്തന ദമ്പതിമാരായിരുന്നു,.പ്രകൃതിയും പുരുഷനും പോലെ അവര്‍ പരസ്പര പൂരകങ്ങള്‍ ആരിരുന്നു - കര്‍മ്മത്തിലും ധര്‍മ്മത്തിലും.

കണക്കിലും സംഗീതത്തിലും അച്ഛന്‍ നല്ല വാസനയുണ്ടായിരുന്നു. കാര്യങ്ങള്‍ നീട്ടി വെയ്ക്കുക, അനാവശ്യമായി ചെലവാക്കുക, കടം വാങ്ങുക മറ്റുള്ളവരെ ഇകഴ്ത്തി സംസാരിക്കുക ഇതൊന്നും ഇഷ്ടമല്ലായിരുന്നു. വരവുചെലവുകളുടെയും കണക്കിന്‍റെയും കാര്യത്തില്‍ വലിയ കണിശക്കാരനായിരുന്നു. പതിവായി ഡയറി കുറിപ്പുകള്‍ സൂക്ഷിച്ചു. ഓരോ ദിവസത്തേയും ‘അണ പൈ‘ വച്ചുള്ള കണക്കുകള്‍ എഴുതി. . മരിക്കുന്നതിനു തലേന്നു വരെയുള്ള കണക്കുകള്‍ അച്ഛന്‍ എഴുതി വച്ചിരുന്നു.

വേനലവധിയായാള്‍ അച്ഛന്‍ എനിക്ക് എന്നും കണക്കിട്ടു തരുമായിരുന്നു. അതിനായി ഒരുവശം ഉപയോഗിച്ച പേപ്പറുകള്‍ തുന്നികെട്ടി അച്ഛന്‍ തന്നെ പുസ്തകങ്ങളും തയാറക്കി വെക്കുമായിരുന്നു. മലയാളം പഠിപ്പിക്കനും ഒന്നു ശ്രമിച്ചു നോക്കിയതാണ്. പക്ഷെ ഞാന്‍ സൂത്രത്തില്‍ രകഷപ്പെട്ടു കളഞ്ഞു.

എന്നെ ചില ഡാന്‍-സുകളില്‍ അച്ഛന്‍ പങ്കെടുപ്പിച്ചിരുന്നു . നല്ല തിളങ്ങുന്ന ഡ്രസ്സ് വേണമെന്ന് ഞാന്‍ നിര്‍ബന്ധം പിടിക്കും അപ്പോല്ള്‍ അച്ഛന്‍ കളിയാക്കി പറയും. ‘തങ്കമണീ ഇവളെ സ്റ്റേജില്‍ കയറ്റിയാല്‍ ഞാന്‍ തറവാട് വില്‍ക്കേണ്ടി വരും ‘ എന്ന്

മക്കളെല്ലവരും ഉയര്‍ന്ന നിലയില്‍ പഠിക്കണമെന്ന് അച്ഛന്‍ ആശിച്ചിരുന്നു . കഴിയുമെങ്കില്‍ എന്തെങ്കിലും സ്പെഷലിസേഷന്‍ വേണമെന്നും പറയുമായിരുന്നു. ആരേയും പക്ഷേ ഒന്നും നിര്‍ബന്ധിച്ച് പഠിപ്പിച്ചില്ല- ; നൃത്തം പോലും. അച്ഛന്‍റെ പെണ്മക്കളെല്ലാം റാങ്കുനേടിയാണ് ബിരുരുദാനന്തര പരീക്ഷ പാസായത് .

ചേച്ചി വിലാസിനി ഐ എ എസ് പരീക്ഷയില്‍ ജയിച്ചപ്പോല്‍ അച്ഛന്‍ പതിവില്‍ കൂടുത്തല്‍ ആഹ്ലാദിച്ചതുപോലെ എനിക്കു തോന്നിയിരുന്നു.മക്കളുടെ ഒരാഗ്രത്തിനും അച്ഛന്‍ എതിരു നിന്നിട്ടില്ലെ. എന്‍റെ വിവാഹകാര്യത്തില്‍ പോലും എന്‍റെ ഇഷ്ടമായിരുന്നു അച്ഛന്‍റെയും ഇഷ്ടം

അച്ഛന്‍റെ നാമ ജപം ഞങ്ങളുടെ ജീവിതത്തിലെ നിത്യ സൌഭാഗ്യമായിരുന്നു. അതു കേള്‍ക്കുന്നതുപോലെ ഇമ്പമുള്ള മറ്റൊന്നില്ലായിരുന്നു. മൂകാംബികാ സ്തുതികളും കാളിദാസന്‍റ് ശ്യാമളാ ദണ്ഡകവും ശനീശ്വര മന്ത്രവും എല്ലാം കേള്‍ക്കുന്ന ആ ഒരു മണിക്കൂര്‍ സുഖദമായ അനുഭവമായിരുന്നു, ഞങ്ങളത് ടെയ്പ്പ് ചെത് സൂക്ഷിച്ചിട്ടുണ്ട് ...അച്ഛന്‍റെ ഓര്‍മ്മക്കായി

മനുഷ്യ ജീവിതത്തില്‍ വേണ്ടതെല്ലാം അച്ഛനു ക്ട്ടിയിട്ടുണ്ടെങ്കിലും അര്‍ഹിച്ചിരുന്ന പലതും അവസാന കാലത്ത് കിട്ടാതെ പോയി എന്നെനിക്കു തോന്നിയിട്ടുണ്ട്.പെട്ടെന്ന് ഓര്‍ക്കുന്ന ഒരു കാര്യം മരിച്ചപ്പോല്‍ സംസ്കാരം സംസ്ഥാന ബഹുമതികളോടെ നടക്കതെ പോയതാണ്‍്.

മരണാനന്തരം കൂടുതല്‍ അവഗണന ഉണ്ടായി. അച്ഛന്‍റെ കേരള നടനം യുവജനോത്സവത്തില്‍ ഉള്‍പ്പെടുത്തി.പക്ഷേ അതു പേരില്‍ മാത്രമൊതുങ്ങി. കാണിക്കുന്നത് മറ്റെന്തൊക്കെയോ ആണ് കേരള നടനത്തെ കുറിച്ച് തയ്യറാക്കിയ മാന്വല്‍ പോലും തെറ്റാണ് .ഇന്നു പഠിപ്പിക്കുന്നതും കുട്ടികള്‍ പഠിക്കുന്നതും ഗുരു ഗോപിനാഥിന്‍റെ കേരള നടനമല്ല.

ഈ തെറ്റു തിരുത്താനായാല്‍ ജന്മശതാബ്ദി വര്‍ഷത്തില്‍ അച്ഛനോടു കാട്ടുന്ന ഏറ്റവും വലിയ ആദരവായിരിക്കു അത്.

ഗുരുഗോപിനാഥിന്‍റെ നവരസാഭിനയം

Mon, 23 Jun 2008 22:15:09 +0530

നവരസങ്ങള്‍ അഭിനയിക്കുക ഏതു നര്‍ത്തകനും ചെയ്യുന്ന കാര്യമാണ്. എന്നാല്‍ ഒരു നൃത്ത ഇനമായി നവരസങ്ങള്‍ അഭിനയിച്ചാലോ?

പ്രമുഖ നൃത്താചാര്യനും നര്‍ത്തകനുമായ ഗുരുഗോപിനാഥാണ് നവരസങ്ങള്‍ ആദ്യം നൃത്തരൂപത്തില്‍ അവതരിപ്പിച്ചത്.

ശൃംഗാരം , വീരം തുടങ്ങി ശാന്തം വരെയുള്ള ഒമ്പത് രസങ്ങള്‍ അവയുടെ സ്ഥായി- സഞ്ചാരീ ഭാവങ്ങള്‍ മുഖരാഗം എന്നിവ തെല്ലും ഏറ്റകുറച്ചിലില്ലാതെയും അനൗചിത്യമില്ലാതെയും അവതരിപ്പിക്കുക ശ്രമകരമായ കാര്യമാണ്.

നവരസങ്ങള്‍ കാണികള്‍ക്ക് ഹൃദ്യമാകണമെങ്കില്‍ അത് സൗന്ദര്യാത്മകവും ശാസ്ത്രനിഷ്ഠവും അതേപോലെ സംവേദനക്ഷമവുമാകണം. ഗുരുഗോപിനാഥിന്‍റെ നവരസപ്രകടനത്തിന് ഈ ഗുണങ്ങളെല്ലാം ഉണ്ടായിരുന്നു.

ഗുരുഗോപിനാഥിനെപ്പോലെ നവരസങ്ങളും ഭാവങ്ങളും സമര്‍ത്ഥവും സൗന്ദര്യാത്മകവുമായി അവതരിപ്പിക്കാന്‍ കഴിവുള്ള ഒരു കലാകാരനും 20-ാം നൂറ്റാണ്ടില്‍ ഇന്ത്യയില്‍ ഉണ്ടായിട്ടില്ല.

ഇതു പറയുന്നത് പ്രമുഖ നൃത്ത ഗവേഷകനും പണ്ഡിതനും നൃത്ത സംബന്ധിയായ ഏറ്റവും വലിയ വസ്തുശേഖരത്തിന്‍റെ ഉടമയുമായിരുന്ന പ്രഫ.മോഹന്‍ ഖോകര്‍.

1920 മുതല്‍ 1998 വരെയുള്ള പ്രമുഖ ഇന്ത്യന്‍ നര്‍ത്തകരുമായി വ്യക്തിപരമായ അടുപ്പവും ബന്ധവും ഉണ്ടായിരുന്ന മോഹന്‍ ഖോകറിന്‍റെ ഈ അഭിപ്രായത്തിന് വളരെയേറെ പ്രസക്തിയുണ്ട്. ആധികാരികവും അനിഷേധ്യവുമാണ് ഈ അഭിപ്രായ പ്രകടനം.

ഗുരു ഗോപിനാഥുമായി ഉണ്ടായിരുന്ന 50 കൊല്ലത്തെ പരിചയം വച്ച്, ഇന്ത്യയിലെ മറ്റു പ്രമുഖരായ നര്‍ത്തകരുമായി താരതമ്യം ചെയ്തുമാണ് മോഹന്‍ഖോക്കര്‍ സുചിന്തിതമായ ഈ അഭിപ്രായം പറയുന്നത്.

ഓട്ടേറെ വീഡിയോ ക്ളിപ്പുകളുടെയും ഫോട്ടോകളുടെയും പിന്‍ബലവും ഈ അഭിപ്രായ പ്രകടനത്തിനുണ്ട്.

മറ്റാരും ശ്രദ്ധിച്ചിട്ടില്ലാത്ത അനന്യമായ ഒരു സിദ്ധികൂടി ഗുരു ഗോപിനാഥിനുണ്ടായിരുന്നു. മുഖത്തിന്‍റെ ഒരു പാതിയില്‍ ഒരു രസവും മറുപാതിയില്‍ മറ്റൊരു രസവും കാണിക്കാനുള്ള കഴിവ്. ഇതിന്‍റെ തെളിവും മോഹന്‍ ഖോകറിന്‍റെ ഫോട്ടോ ശേഖരത്തിലുണ്ട്.

മിതവും സാരവുമാണ് ഗുരുഗോപിനാഥിന്‍റെ നവരസാഭിനയം. കഥകളിക്കാരന്‍റേതുപോലെ അമിത പ്രകടനമോ ലാസ്യ നൃത്തത്തിലെപ്പോലെ ലളിതവത്കരണമോ അല്ലാതെ രസങ്ങള്‍ വേണ്ട തോതതില്‍ ഉചിതമായി അവതരിപ്പിച്ച മറ്റൊരാചാര്യന്‍ ഉണ്ടായിട്ടില്ല.

യൗവനം തീരും മുമ്പെ ഗുരുഗോപിനഥ് അവതരിപ്പിച്ച നവരസങ്ങള്‍ അക്കാലത്ത് ലോക ശ്രദ്ധ പിടിച്ചു പറ്റിയിരുന്നു. ഫ്രാന്‍സ്, ജര്‍മ്മനി, അമേരിക്ക തുടങ്ങിയ സ്ഥലങ്ങളിലെ പല വിഖ്യാത കലാ, നൃത്ത മ്യൂസിയങ്ങളിലും ഈ നവരസപ്രകടനം ഫോട്ടോകളില്‍ പ്രദര്‍ശിപ്പിച്ചിട്ടുണ്ട്.

നവരസങ്ങള്‍ ഒരു നൃത്ത ഇനമായി ആദ്യം അരങ്ങില്‍ അവതരിപ്പിച്ച നര്‍ത്തകന്‍ ഗുരുഗോപിനാഥാണ്.

നവരസങ്ങളും ഭാവങ്ങളും മുഖരാഗങ്ങളും തമ്മിലുള്ള ബന്ധം, ഓരോ രസങ്ങളും അവതരിപ്പിക്കേണ്ട വിധം, രസങ്ങള്‍ക്ക് അനുയോജ്യമായ കാര്യങ്ങള്‍, കഥാപാത്രങ്ങള്‍, ജീവിത മുഹൂര്‍ത്തങ്ങള്‍ എന്നിവ കോര്‍ത്തിണക്കി ഗുരുഗോോപിനാഥ് അവതരിപ്പിച്ചിരുന്ന നവരസാഭിനയം അവിസ്മരണീയമായ അനുഭവമെന്നാണ് കലാനിരൂപകര്‍ വാഴ്ത്തിയത്.

വളരെപ്പേര്‍ നിര്‍ബന്ധിച്ചിട്ടും പ്രായമേറിയപ്പോള്‍ ഗുരുഗോപിനാഥ് നവരസാഭിനയം നടത്തിയില്ല. പ്രായമായി.... മുഖത്തെ മാംസപേശികള്‍ പറഞ്ഞാല്‍ കേള്‍ക്കാതെയായി..... അതുകൊണ്ട് ഉദ്ദേശിച്ച രീതിയില്‍ രസങ്ങള്‍ പ്രകടിപ്പിക്കാന്‍ പറ്റാതെ വരും അതുകൊണ്ടതിന് മുതിരുന്നില്ല എന്നു പറഞ്ഞ് ഗുരുജി സ്വയം പിന്മാറുകയായിരുന്നു ചെയ്തത്.

ഗുരുഗോപിനാഥിന്‍റെ ജന്മ ശതാബ്ദി

Mon, 23 Jun 2008 22:12:27 +0530

2008 ജൂണ്‍ 24- ഗുരുഗോപിനാഥ് ജന്മ ശതാബ്ദി.

കഴിഞ്ഞ നൂറ്റാണ്ടിലെ പ്രതിഭാധനരായ ഇന്ത്യന്‍ നര്‍ത്തകരില്‍ ഒരാളായിരുന്നു ഗുരുഗോപിനാഥ്. കഥകളിയുടെയും ഭാരതീയ നൃത്തകലയുടെയും യശസ്സ് നാടെങ്ങും പരത്തിയത് ഗുരുഗോപിനാഥിനെപോലുള്ള അപ്പര്‍ണബോധമുള്ള നര്‍ത്തകരായിരുന്നു.

ചുറ്റും വെള്ളം നിറഞ്ഞ കുട്ടനാട്ടിലെ സാധാരണ കാര്‍ഷിക കുടംബത്തില്‍ ജനിച്ച് വെറും അഞ്ചാം ക്ളാസു വരെ പഠിച്ച് കഥകളി നര്‍ത്തകനായ ചമ്പക്കുളം ഗോപിനാഥപിള്ള , ഗുരുഗോപിനാഥായി മാറിയത് സ്വന്തം പ്രയത്നം കൊണ്ടും ദൈവികമായ സിദ്ധികൊണ്ടുമായിരുന്നു. സിദ്ധിയും സാധനയും, ബുദ്ധിയും പ്രവര്‍ത്തിയും അദ്ദേഹം ഏകോകിപ്പിച്ചു.

ക്രാന്തദര്‍ശിത്വം, വ്യക്തിജീവിതത്തിന്‍റെ ശുദ്ധി, തികഞ്ഞ ഭക്തി, എളിമ, പൂര്‍ണതയുള്ള പ്രയത്നം എന്നിവ ഗുരുജിയുടെ ഗുണങ്ങളായിരുന്നു. കുട്ടനാട്ടുകാരനു ചേരുന്ന ചെറിയൊരു പിശുക്ക്, മുന്‍ശുണ്ഠി എന്നീ ചെറിയ ദോഷങ്ങള്‍ ഉണ്ടായിരുന്നെങ്കിലും അതുമദ്ദേഹത്തിന്‍റെ അലങ്കാരമായി മാറുകയാണുണ്ടായത്.

വരുംകാലത്തെ മുന്‍കൂട്ടി കാണാനുള്ള കഴിവാണ് ഗുരുഗോപിനാഥിന്‍റെ ഉയര്‍ച്ചയ്ക്കും പ്രശസ്തിക്കും നിദാനമായത്. സര്‍ഗാത്മകതയുടെ മികവു കൂടിയായാപ്പോള്‍ അതിന് തിളക്കമേറി.

കഥകളിയും കേരള കലകള്‍ക്കു ഒരിരുണ്ട കാലഘട്ടമുണ്ടായിരുന്നു. അതിന്‍റെ ഫലമായാണ് കലകളിയെ ഉദ്ധരിക്കാന്‍ മുകുന്ദ രാജാവിന്‍റെയും വള്ളത്തോളിന്‍റെയും നേതൃത്വത്തില്‍ കലാമണ്ഡലമുണ്ടായത്.

അവിടെ വടക്കന്‍ ചിട്ട പഠിക്കാനായി മുതിര്‍ന്ന വിദ്യാര്‍ത്ഥിയായി എത്തിയ ഗോപിനാഥ് എന്ന യുവാവ്, അവിടെ കഥകളിയെ പറ്റി പഠിക്കാനെത്തിയ രാഗിണിദേവിയുടെ സഹനര്‍ത്തകനായി ബോംബെയ്ക്ക് പോയതൊടെയാണ് സ്വന്തം കഴിവുകള്‍ തിരിച്ചറിഞ്ഞത്.

നേരം പുലരുവോളവും, മൂന്നു ദിവസം തുടരുന്നതുമായ നീണ്ട കഥകളി കാണാന്‍, അനുശീലനം സിദ്ധിച്ച കഥകളി ഭ്രാന്തന്മാര്‍ മാത്രമേ ഉണ്ടാവൂ. ചെറിയ ചെറിയ പ്രകടനങ്ങളായി കഥകളി അവതരിപ്പിച്ചാല്‍ വന്‍നഗരങ്ങളില്‍ പോലും അതിനാസ്വാദകരുണ്ടാവും എന്ന ആശയം രാഗിണിദേവിയുടേതായിരുന്നു.

ആധുനിക തീയേറ്റര്‍ സങ്കല്പത്തില്‍ അനുസൃതമായി, ഒന്നോ രണ്ടോ മണിക്കൂര്‍ നേരത്തെ ലഘുപ്രകടനങ്ങളാക്കി കഥകളിയേയും അതിലെ കഥാസന്ദര്‍ഭങ്ങളേയും മെരിക്കിയെടുത്തത് ഗോപിനാഥും. ഇങ്ങിനെയാണ് കഥകളിനൃത്തം എന്ന പേരിലൊരു നൃത്തശൈലി രൂപപ്പെടുന്നത്. പിന്നീടത് കേരള നടനം എന്ന പേരില്‍ പ്രസിദ്ധമാവുകയും ചെയ്തു

കഥകളിയെ തിരുത്തുകയോ പരിഷ്കരിക്കുകയോ ചെയ്യാതെ, അതിന്‍റെ സത്ത ഉള്‍ക്കൊണ്ട് തികച്ചും ശാസ്ത്രീയമായ നൃത്തരൂപം ഉണ്ടാക്കിയെടുത്തതാണ് ഗുരുഗോപിനാഥിന്‍റെ പ്രധാന നേട്ടം.

കഥകളി നമസ്കൃതമായിരുന്ന അക്കാലത്ത് ഗോപിനാഥും രാഗിണിദേവിയും പിന്നീട് ഗോപിനാഥ് തങ്കമണി ട്രൂപ്പായും ഇന്ത്യയൊട്ടക്കും നടത്തിയ കഥകളി നൃത്തപ്രകടനങ്ങളാണ് കേരളത്തിലെ കഥകളിയുടെ കേളികൊട്ടു ലോകത്തിന് കേള്‍പ്പിച്ചത്.

പന്ത്രണ്ട് കൊല്ലം കഥകളി പഠിക്കുകയും ആറേഴുകൊല്ലം കഥകളിയിലെ എല്ലാത്തരം വേഷങ്ങളും അരങ്ങിലവതരിപ്പിക്കുകയും ചെയ്തു

കേരളത്തിലും ഇന്ത്യയിലും നൃത്തതരംഗമുണ്ടാക്കാന്‍ ഗോപിനാഥിന് കഴിഞ്ഞു. ക്ഷേത്രങ്ങളുടേയും കൊട്ടരങ്ങളുടേയും മതില്‍ക്കെട്ടിനകത്തു കഴിഞ്ഞ നൃത്തകലയെ ജനകീയമാക്കാനും കഴിഞ്ഞു.

വട്ടിയൂര്‍ക്കാവിലെ ഗുരു ഗോപിനാഥ് നടനഗ്രാമത്തില്‍ 2005 ജൂണ്‍ 24 ന് ദേശീയ ഡാന്‍സ് മ്യൂസിയത്തിന് മുഖ്യമന്ത്രി ഉമ്മന്‍ ചാണ്ടി തറക്കല്ലിട്ടിരുന്നു.വിശ്വകലാകേന്ദ്രമാണ് മ്യൂസിയത്തിന് ആവശ്യമായ സ്ഥലം സര്‍ക്കാരിന് കൈമാറിയത. നൃത്തമ്യൂസിയം പക്ഷേ ഇതുവരെ യാഥാര്‍ഥ്യമായില്ല.

ഗുരു ഗോപിനാഥ്: സ്ഥാനങ്ങള്‍, പദവികള്‍ :

Mon, 23 Jun 2008 22:03:18 +0530

വ ശ്രീചിത്ര നര്‍ത്തകാലയം പ്രിന്‍സിപ്പാള്‍
വ തിരുവിതാംകൂര്‍ രാജ്യത്തെ കൊട്ടാരം നര്‍ത്തകന്‍
വ ദില്ലി കേരള കലാകേന്ദ്രത്തിന്‍റെ പ്രിന്‍സിപ്പാള്‍
വ മദ്രാസ് നടനനികേതനം ഡയറക്ടര്‍
വ ദില്ലി രാംലീലയുടെ സംവിധായകന്‍
വ മദ്രാസ് സംഗീത നാടക അക്കാദമി അംഗം
വ കേന്ദ്ര സംഗീത നാടക അക്കാദമി അംഗം
വ 1954 ല്‍ ഇന്ത്യയില്‍ നിന്നും സോവിയറ്റ് യൂണിയനിലേക്കു പോയ ആദ്യത്തെ സാംസ്കാരിക പ്രതിനിധിസംഘത്തിലെ അംഗം
വ 1961 ല്‍ ഫിന്‍ലന്‍ഡിലെ ഹെല്‍സിങ്കിയില്‍ നടന്ന ലോക യുവജനോത്സവത്തിലെ ശാസ്ത്രീയ നൃത്തങ്ങളുടെ വിധികര്‍ത്താവ്
വ തിരുവനന്തപുരം വിശ്വകലാകേന്ദ്രം സ്ഥാപകന്‍, ചീഫ് അഡ്മിനിസ്ട്രേറ്റീവ് ഓഫീസര്‍
കേരള കലാമണ്ഡലം, കുഞ്ചന്‍ സ്മാരകം, കേരള ലളിതകലാ അക്കാദമി, ജവഹര്‍ബാലഭവന്‍, ശ്രീചിത്തിര തിരുനാള്‍ സംഗീത കോളജ് ഉപദേശകസമിതി തുടങ്ങി ഒട്ടേറെ സമിതികളില്‍ അംഗം

ഗുരു ഗോപിനാഥ്: പ്രധാന സംഭാവനകള്‍

Mon, 23 Jun 2008 22:02:23 +0530

ജീവിതരേഖ-പ്രധാന സംഭാവനകള്‍

വ നൃത്തത്തെ ജനകീയമാക്കി
വ കഥകളിയെ ഇന്ത്യയിലും പുറത്തും അറിയപ്പെടുന്നതാക്കി
വ കേരളത്തിലും ഇന്ത്യയിലും നൃത്ത തരംഗം ഉണ്ടാക്കി
വ കഥകളിയെ അടിസ്ഥാനപ്പെടുത്തി ആധുനികകാലത്തിനും തിയേറ്റര്‍ സങ്കല്പത്തിനും ഇണങ്ങുന്ന കേരള നടനം എന്ന പുതിയ നൃത്ത രൂപം ഉണ്ടാക്കി
വ മികച്ചനര്‍ത്തകന്‍, പ്രതിഭാശാലിയായ നൃത്ത സംവിധായകന്‍, കിടയറ്റ നൃത്താചാര്യന്‍ എന്നിനിലകളില്‍ ഇരുപതാം നൂറ്റാണ്ടിലെ വിസ്മയങ്ങളിലൊന്നായി മാറി
വ കഥകളിയുടെ പന്ത്രണ്ട് കൊല്ലത്തെ അഭ്യാസക്രമവും പാഠ്യപദ്ധതിയും പരിഷ്കരിച്ച് നവീകരിച്ച് ആറ് കൊല്ലത്തേതാക്കി ചുരുക്കി കേരള നടനം അഭ്യാസക്രമവും സിലബസും തയ്യാറക്കി - ഇതൊരു ചരിത്ര ദൗത്യമാണ്
വ ഇന്ത്യയിലെ നൃത്തരൂപങ്ങള്‍ കൂട്ടിയിണക്കി ദില്ലിയിലെ പ്രസിദ്ധമായ രാം ലീല പുനസ്സംവിധാനം ചെയ്തു - നൃത്തത്തിലൂടെ ഇന്ത്യയുടെ ആത്മാവ് കണ്ടെത്തുന്ന ഭഗീരഥ പ്രയത്നമായിരുന്നു അത്.

ഗുരു ഗോപിനാഥ്- പുരസ്കാരങ്ങള്‍ ബഹുമതികള്‍

Mon, 23 Jun 2008 22:01:17 +0530

പ്രധാന പുരസ്കാരങ്ങള്‍ ബഹുമതികള്‍ :

1934 അഭിനവ നടരാജന്‍ (ബംഗാള്‍ പണ്ഡിറ്റ് കോണ്‍ഫറന്‍സ്, കല്‍ക്കത്ത)
വീരശൃംഖല (.തിരുവിതാംകൂര്‍ മഹാരാജാവ്)
1936 : പാലസ് ഡാന്‍സര്‍(തിരുവിതാംകൂര്‍ മഹാരാജാവ്)
നടന കലാനിധി ((കേരള സമാഹത്തിന്‍റെ ഓള്‍ മലയാള കോണ്‍ഫറന്‍സ്)

1948 : ഗുരു (ഇന്ത്യന്‍ പീപ്പിള്‍സ് തിയേറ്റര്‍ കോണ്‍ഫറന്‍സ്, ന്യൂഡല്‍ഹി)

1968 : കലാതിലകം (ഗുരുവായൂര്‍ ദേവസ്വം)
കേരള സംഗീത നാടക അക്കാദമി അവാര്‍ഡ്

1972 : കലാരത്നം (തിരുവിതാംകൂര്‍ ദേവസ്വം ബോര്‍ഡ്)

1973 : ഫെലോഷിപ്പ് (കേരള സംഗീത നാടക അക്കാദമി)
കേന്ദ്ര സംഗീത നാടക അക്കാദമി അവാര്‍ഡ്

1977: ഡി ലിറ്റ് (കൊല്‍ക്കത്തയിലെ രബീന്ദ്ര ഭാരതി സര്‍വകലാശാല)

പത്മശ്രീ നിരസിച്ചു.

ഗുരു ഗോപിനാഥ്‌ പ്രധാന സംഭവങ്ങള്‍

Mon, 23 Jun 2008 22:00:12 +0530

ഗുരു ഗോപിനഥ്:പ്രധാന സംഭവങ്ങള്‍

12-ാം വയസില്‍ അരങ്ങേറ്റം തുടങ്ങുകയായിരുന്നു. കഥകളി കാണാന്‍ കൂടെ പോയിരുന്ന കുഞ്ഞായിരുന്ന ഗോപിനാഥിനെ വലിയച്ഛനും ഗുരുകുഞ്ചുക്കുറുപ്പിന്‍റെ മൂത്ത സഹോദരനുമായ ശങ്കരകുറുപ്പ് ഉറക്കത്ത് നിന്ന് വിളിച്ചുണര്‍ത്തി ശിവന്‍റെ വേഷം കെട്ടിച്ച് അരങ്ങിലിരിത്തുകയായിരുന്നു

19-ാം വയസ്സില്‍ കൊല്ലൂര്‍ മൂകാംബികാ ക്ഷേത്രത്തില്‍ കാല്‍നടയായി ചെന്നു ദര്‍ശനം നടത്തി. അതില്‍പ്പിന്നെ തികഞ്ഞ ദേവിഭക്തന്‍.

വളളത്തോളിന്‍റെ ക്ഷണമനുസരിച്ച് കഥകളി വടക്കന്‍ചിട്ട പഠിക്കാന്‍ കലാമണ്ഡലത്തിലെത്തി.

23-ാംവയസ്സില്‍ അമേരിക്കന്‍ നര്‍ത്തകിയായ രാഗിണിയോടൊപ്പം നൃത്ത സംഘമുണ്ടാക്കാന്‍ ബോംബെക്കുപോയി. പിന്നീട് ഭാരതപര്യടനം .

ഇതാണ് " കേരളനടനം' എന്ന നൃത്തരൂപം ആവിഷ്ക്കരിക്കാന്‍ ഗുരുഗോപിനാഥിനെ പ്രാപ്തനാക്കിയ കാലഘട്ടം.

മയൂരനൃത്തം അവതരിപ്പിച്ചു. തിരുവിതാംകൂര്‍ മഹാരാജാവില്‍ നിന്നും വീരശൃംഖല

1935 ല്‍ ടാഗോറില്‍ നിന്നും പ്രശംസ

1936 ല്‍ വിവാഹം. കലാമണ്ഡലത്തിലെ ആദ്യത്തെ മോഹിനിയാട്ടം വിദ്യാര്‍ത്ഥിയായിരുന്ന കുന്നംകുളം മങ്ങാട്ടുമുളക്കല്‍ തങ്കമണിയാണ് ഭാര്യ. ഗോപിനാഥ് തങ്കമണി ട്രൂപ്പ് ഇന്ത്യയിലും വിദേശത്തും നൃത്തപരിപാടികള്‍അവതരിപ്പിച്ച് പുരസ്കാരങ്ങളും പ്രശസ്തിയും നേടി.

തിരുവിതാംകൂറിലെ പാലസ് ഡാന്‍സറായി നിയമിതനായി.

1938 ല്‍ ചെന്നൈയില?ത്തി " നടനനികേതന്‍' സ്ഥാപിച്ചു.

മലയാളത്തിലെ മൂന്നാമത്തെ സിനിമയായ പ്രഹ്ളാദനില്‍ ഹിരണ്യകശ്യപുവായി അഭിനയിച്ചു (തങ്കമണിയായിരുന്നു കയാതു).

" ജീവിതനൗക'യില്‍ യേശുക്രിസ്തുവായി അഭിനയിച്ചു. തമിഴ് തെലുങ്ക് സിനിമകളില്‍ നൃത്തപ്രധാനമായ വേഷങ്ങള്‍..

1954 ല്‍ പ്രധാനമന്ത്രി നെഹ്റുവിന്‍റെ ക്ഷണപ്രകാരം റഷ്യയിലേക്കുളള ആദ്യത്തെ ഇന്ത്യന്‍ സാംസ്കാരിക സംഘത്തില്‍ അംഗമായി വിദേശയാത്രകള്‍ നടത്തി.

1959 ല്‍ ദില്ലിയിലെ ഭാരതീയ കലാ കേന്ദ്രത്തിന്‍റെ "രാംലീല'യുടെ ഡയറക്ടറായി. ഇന്നു കാണുന്നമട്ടില്‍ വിവിധ ഭാരതീയ നൃത്തങ്ങളുടെ കഥകളിയും സമന്വയിപ്പിച്ച് രാംലീലക്ക് ശാസ്ത്രീയ അടിത്തറയുണ്ടാക്കി ചിട്ടപ്പെടുത്തിയത് ഗുരുഗോപിനാഥായിരുന്നു.

ദില്ലിയില്‍ കഥകളി കേന്ദ്രം സ്ഥാപിച്ചു.പിന്നീടത് ഇന്‍റര്‍ നാഷണല്‍ കഥകളി സെന്‍ററായി മാറി.

ആയിരത്തോളം വേദികളില്‍ അവതരിപ്പിച്ച രാമായണം ബാലെ സംവിധാനം ചെയ്തു.

1961 ല്‍ എറണാകുളത്ത് "വിശ്വകലാകേന്ദ്രം' സ്ഥാപിച്ചു . 63 ല്‍ അത് തിരുവനന്തപുരത്ത് വട്ടിയൂര്‍കാവിലേക്ക് മാറ്റി.

ഗുരു ഗോപിനാഥ് -സംവിധാനം ചെയ്ത പ്രധാന നൃത്തങ്ങള്‍

Mon, 23 Jun 2008 21:58:27 +0530

ഗുരു ഗോപിനാഥ് 200 ല്‍ ഏറെ നൃത്തങ്ങള്‍ സംവിധാനം ചെയ്തിട്ടുണ്ട്. ഡില്ലിയിലെ രാം ലീല പുനസ്സംവിധാനം ചെയ്യുകയും ചെയ്തു.

1.ഏകാംഗ നൃത്തം

മയൂര നൃത്തം, ശിവതാണ്ഡവം, ഗരുഡ നൃത്തം, നവരസാഭിനയം, വേട നൃത്തം, കാളിയമര്‍ദ്ദനം
മാനവജീവിതം, ഭക്തിയും വിഭക്തിയും, നരസിംഹാവതാരം

2. യുഗ്മനൃത്തം

ശിവപാര്‍വതി നൃത്തം, രാധാകൃഷ്ണ നൃത്തം, ലക്ഷ്മീനാരായണ നൃത്തം, രതിമന്‍മഥ നൃത്തം

3.സംഘനൃത്തം :

പുറപ്പാട്, തോടയം, സാരീനൃത്തം, കുമ്മി, പൂജനൃത്തം, പതംഗനൃത്തം,, രാസക്രീഡ, കനകച്ചിലങ്ക
തിങ്കളും തളിരൊളിയും

4.നാടക നടനം :

ഗീതോപദേശം,, ചണ്ഡാലഭിക്ഷുകി, നവ കേരളം, ഗാന്ധിസൂക്തം, സിസ്റ്റര്‍ നിവേദിത, അംഗുലീയ ചൂഡാമണി, സീതാപഹരണം, അമുതാപഹരണം, വള്ളീപരിണയം, പാരിജാതപുഷ്പാപഹരണം

5.ബാലെ :

രാമായണം ബാലെ, മഹാഭാരതം ബാലെ, ( കഥകളി) ശ്രീയേശുനാഥ വിജയം ബാലെ,ശ്രീബുദ്ധ ചരിതം ബാലെ

കേരള നടനം-ആദ്യത്തെ അവതരണം

Mon, 23 Jun 2008 21:53:28 +0530

1931.
ഡിസംബര്‍ 12ലെ തണുത്ത സായാഹ്നം...
മുംബൈയിലെ ഓപറ ഹൗസില്‍ നിറഞ്ഞ സദസ്സ്.
ആറര മണി കഴിഞ്ഞ് അഞ്ചാറു നിമിഷങ്ങള്‍ കടന്നു പോയി....
ഹര്‍ഷാരവത്തോടെ തിരശ്ശീല ഉയര്‍ന്നു !

രംഗത്ത് ശ്രീകൃഷ്ണന്‍!
ചൈതന്യവും ഓജസ്സും നിറഞ്ഞ മുഖം...
പീതാംബരം, തലയിലെ കിരീടത്തിന്‍റെ ഉച്ചിയില്‍ മയില്‍പീലി,
വനമാല, മുത്തും സ്വര്‍ണവും വിളങ്ങുന്ന മാലകള്‍, ആഭരണങ്ങള്‍...
ചുണ്ടോടടുപ്പിച്ച ഓടക്കുഴലിന്‍റെ മുദ്ര കൈകളില്‍.
കാലുകള്‍ പിണച്ച് സുസ്മേരവദനനായി നില്‍ക്കുന്ന ശ്രീകൃഷ്ണന്‍റെ ഇമ്പമാര്‍ന്ന രൂപം..

ദര്‍ശനത്തിന്‍റെ മാസ്മരികതയില്‍ മയങ്ങിയ ജനങ്ങള്‍...
ശില്‍പമോ ?... അതോ വരച്ചുവച്ച ചിത്രമോ ?

നിശ്ശബ്ദതയെ കുളിരണിയിച്ച് ഓടക്കുഴലില്‍ ബിലഹാരിയുടെ ഹൃദ്യത ഒഴുകിയെത്തി.
അതുവരെ കാണാത്ത മട്ടില്‍ ഭാഗവദ് ദര്‍ശനത്തിന്‍റെ ആനന്ദാതിരേകം... നീണ്ട കൈയടിയായി സദസ്സില്‍ നിറഞ്ഞു.

മോടിയില്‍ വസ്ത്രമണിഞ്ഞ്, ആഭരണ വിഭൂഷിതയായി, ലജ്ജാവതിയായി രാധ രംഗത്തെത്തുന്നു.

ബാലഗോപാലയാശുമാം... എന്ന പ്രസിദ്ധമായ ദീക്ഷിതര്‍ കൃതിക്ക് ഒപ്പം രാധ ചുവടുകള്‍ വച്ചു.
ലാസ്യ ലാവണ്യത്തിന്‍റെ നിശ്ശബ്ദത പരന്നു.

പുഞ്ചിരി തൂകി നിന്ന് ശ്രീകൃഷ്ണനും പിന്നീട് .... ലോലനായി. ഗീതാഗോവിന്ദത്തിലെ ''കിസലയ...'' എന്ന പദത്തിനൊപ്പം ചാരുതയാര്‍ന്ന മുദ്രകളും ഹൃദയഹാരിയായ അഭിനയവും. കൃഷ്ണന്‍ രാധയുടെ മനം കവര്‍ന്നു. കാണികളുടേയും.

പിന്നെ രാധയും കൃഷ്ണനും ചേര്‍ന്ന് ദേവാധി ദേവനേ എന്ന് അകുമ്മി. തിരശ്ശീല പതുക്കെ താഴുമ്പോള്‍ കനത്ത കരഘോഷം.

അതുവരെയില്ലാത്ത ഇമ്പമാര്‍ന്ന അനുഭവം. അനിതരസാധാരനമായ നൃത്ത രൂപം..... കാണികളുടെ മനസ്സിനെ നേരിട്ടു സ്പര്‍ശിക്കുന്ന നടന കൗതുകം.

പില്‍ക്കാലത്ത് ശ്രദ്ധേയമായി മാറിയ നൃത്ത ശൈലിയുടെ കന്നി പ്രകടനമായിരുന്നു അത്. ഭാരതീയ നൃത്ത ചാരിത്രത്തിലെ ഒരു സുവര്‍ണ ഏട്.

കഥകളി നടനം എന്ന നൃത്തത്തിന്‍റെ പരീക്ഷണാടിസ്ഥാനത്തിലുള്ള ആദ്യത്തെ അവതരണമായിരുന്നു അത്. ഇതാണ് കേരള നടനം എന്ന നൃത്ത രൂപമായി വളര്‍ന്നത്.

കൃഷ്ണനായത്, അന്ന് 23 വയസ്സു മാത്രമുണ്ടായിരുന്ന ഗുരു ഗോപിനാഥ്. രാധയായത് അമേരിക്കന്‍ നര്‍ത്തകിയായ രാഗിണീദേവി. (എസ്തര്‍ ഷെര്‍മാന്‍ എന്ന രാഗിണിദേവി പ്രമുഖ നര്‍ത്തകിയായ ഇന്ദ്രാണി റഹ് മാന്‍റെ അമ്മയാണ്).

ഈ രംഗത്തിന്‍റെ അനുസ്മരണം നമ്മെ മറ്റൊരു കാര്യം ഓര്‍മ്മിപ്പിക്കുന്നു. കേരള നടനത്തിന് എഴുപത് കഴിഞ്ഞിരിക്കുന്നു. 1931 അവസാനത്തിലെ ഈ പരീക്ഷണ നൃത്തം 1932 ല്‍ ഇന്ത്യയില്‍ പലയിടത്തും അവതരിപ്പിച്ചു. ഇക്കൊല്ലമാണ് സവിശേഷമായ നൃത്തരൂപമെന്ന നിലയില്‍ കേരള നടനം (കഥകളി നടനം) ലബ്ധപ്രതിഷ്ഠമായത്.

നഗരത്തിലെ തിയേറ്ററുകളില്‍ അവതരിപ്പിക്കാന്‍ പാകത്തിന് കഥകളിയെ മെരുക്കിയെടുക്കുക എന്ന ഉദ്ദേശ്യത്തോടെ രാഗിണിദേവി, കലാമണ്ഡലത്തിലെ മുതിര്‍ന്ന വിദ്യാര്‍ത്ഥിയായ ചമ്പക്കുളം ഗോപിനാഥ പിള്ള എന്ന ഗുരുഗോപിനാഥിനെ സഹനര്‍ത്തകനായും ആശാനുമായി സ്വീകരിച്ച് കേരളത്തില്‍ നിന്നും ബോംബെയ്ക്ക് വണ്ടികയറിയതാണ് കേരള നടനത്തിന്‍റെ പിറവിക്ക് നാന്ദി കുറിച്ചത്

യുവജനോത്സവത്തിലേത് കേരളനടനമല്ല

Mon, 23 Jun 2008 21:46:14 +0530

സര്‍ഗ്ഗാത്മകം - ശാസ്ത്രീയം

കേരള നടനം ഒരര്‍ത്ഥത്തില്‍ സര്‍ഗ്ഗാത്മക നൃത്തമാണ്. ഗുരു ഗോപിനാഥിന്‍റെയും തങ്കമണി ഗോപിനാഥിന്‍റെയും സര്‍ഗ്ഗപ്രതിഭയാണ്. കഥകളി നടനത്തെ കേരള നടനമാക്കി വളര്‍ത്തിയത്. എന്നാല്‍ ശാസ്ത്രീയമായ ഒരേയൊരു സര്‍ഗ്ഗാത്മക നൃത്തം കേരള നടനം മാത്രമായിരിക്കും.

ഗുരു ഗോപിനാഥും തങ്കമണിയും ഉണ്ടാക്കിയെടുത്ത നൃത്തരൂപമാണെങ്കിലും അത് അവരോടുകൂടി അവസാനിക്കാതെ പോയത് ഇന്ത്യന്‍ നൃത്തകലയുടെ ക്ളാസ്സിക്കല്‍ പാരമ്പര്യത്തില്‍ അത് ഉറച്ചു നില്‍ക്കുന്നു എന്നതു കൊണ്ടാണ്.

കേരള നടനം ശരിക്കു പഠിക്കാത്തവരും അതെന്തെന്ന് അറിയാത്തവരുമായ ഒരു കൂട്ടം നൃത്താധ്യാപകരാണ് കേരള നടനത്തെ തിരുവാതിരകളിയും തുമ്പിതുള്ളലും ഓട്ടന്‍ തുള്ളലും എല്ലാം ചേര്‍ത്ത് അവിയല്‍ പരുവമാക്കി യുവജനോത്സവ വേദികളില്‍ അവതരിപ്പിക്കുന്നത്. കാര്യമറിയാതെ സര്‍ക്കാരും ഇതിന് കൂട്ടുനില്‍ക്കുന്നു.

യുവജനോത്സവങ്ങളില്‍ ഇന്നു കാണുന്ന കേരള നടനത്തിന്‍റെ വേഷം പോലും ഗുരു ഗോപിനാഥ് ഉണ്ടാക്കിയതല്ല. അങ്ങനെയൊരു വേഷം കേരള നടനത്തിനില്ല. ഇപ്പോഴത്തെ വേഷം മോഹിനിയാട്ടത്തിന്‍റെ വികൃതമായ അനുകരണമാണു താനും.

കേരള നടനം ആവിഷ്കരിച്ചത് ഗുരു ഗോപിനാഥാണെങ്കിലും അദ്ദേഹം സംവിധാനം ചെയ്ത ഒരിനം പോലും യുവജനോത്സവ വേദികളില്‍ മിക്കപ്പോഴും കാണാറില്ല. പലപ്പോഴും മാന്വലിലെ തെറ്റ് ഉള്‍ക്കൊള്ളാന്‍ തയാറാവാത്തതു മൂലം ഗുരുഗോപിനാഥിന്‍റെ ഇനങ്ങള്‍ക്ക് അവതരണാനുമതി കിട്ടാതെ പോകുന്നു.

യുവജനോത്സവ വേഷം കെട്ടി ചെയ്താല്‍ ഗുരുഗോപിനാഥ് ഉദ്ദേശിച്ച ''ഏതു സാധാരണക്കാരനും മനസ്സിലാവുക'' എന്ന ദൗത്യം നിര്‍വഹിക്കപ്പെടാതെ പോവും. ഏതു കഥാപാത്രമാണോ അവതരിപ്പിക്കുന്നത് അതിനു ചേരുന്ന വേഷം എന്നതായിരുന്നു ഗുരു ഗോപിനാഥിന്‍റെ ശൈലി ; കേരള നടനത്തിന്‍റേയും.

നൃത്തത്തിന്‍റെ സാര്‍വലൗകിക ഭാഷ

കേരള നടനം ഇന്ത്യയ്ക്കും പുറത്തുമുള്ള കലാസ്വാദകര്‍ക്ക് കാണിച്ചു കൊടുത്തത് ഇന്ത്യന്‍ നൃത്തകലയുടെ മാനവിക മുഖമാണ് , സാര്‍വലൗകിക ഭാഷയാണ്.

ഹൈന്ദവ പുരാണേതിഹാസങ്ങള്‍ മാത്രമല്ല, മനുഷ്യനെക്കുറിക്കുന്ന, സമൂഹത്തെ കുറിക്കുന്ന ഏതു വിഷയവും ഇന്ത്യന്‍ നൃത്തകലയ്ക്ക് വഴങ്ങും എന്ന് ആദ്യമായി തെളിയിച്ചത് , ലോകത്തിനു ആദ്യമായി കാണിച്ചു കൊടുത്തത് ഗുരു ഗോപിനാഥും അദ്ദേഹമുണ്ടാക്കിയ കേരള നടനവുമാണ്.

നവകേരളം, ഗാന്ധിസൂക്തം, ചണ്ഡാലഭിക്ഷുകി, ചീതയും തമ്പുരാട്ടിയും, സിസ്റ്റര്‍ നിവേദിത എന്നിവ ആധുനികമായ സാമ ം ൂഹിക പ്രമേയങ്ങളാണ് കൈകാര്യം ചെയ്യുന്നത്.
''ശ്രീയേശുനാഥ വിജയം'' ബാലെ, ''ദിവ്യനാദം, മഗ്ദലനമറിയം എന്നിവയില്‍ ക്രിസ്തീയ പ്രമേയങ്ങളാണ് നൃത്തരൂപത്തിലാക്കിയത്.

ഈ പരീക്ഷണങ്ങളിലൂടെ ഭാരതീയ നൃത്തകലയുടെ, മുദ്രകളുടെ അനന്തസാദ്ധ്യതകളെ ഗുരു ഗോപിനാഥ് തുറന്നു കാട്ടി.

(തിരുവനന്തപുരത്തെ വട്ടിയൂര്‍ക്കാവില്‍, ഗുരു ഗോപിനാഥ് സ്ഥാപിച്ച വിശ്വ കലാ കേന്ദ്രത്തിന്‍റെ ചീഫ് അഡ്മിനിസ്ട്രേറ്റീവ് ഓഫീസറും, ഗുരു ഗോപിനാഥിന്‍റെ ഇളയ മകളുമാണ് വിനോദിനി )

കേരളനടനത്തിന്‍റെ സവിശേഷതകള്‍

Mon, 23 Jun 2008 21:45:17 +0530

PRO

ഒരു കാലത്ത് വരേണ്യ വര്‍ഗ്ഗത്തിന്‍റേയും ക്ഷേത്രങ്ങളുടേയും അകത്തളങ്ങളില്‍ മാത്രം ദരിദ്രമായി ജീവിച്ചു പോന്ന നൃത്തകലയെ ജനകീയമാക്കിയതും കേരളത്തില്‍ നൃത്തതരംഗം ഉണ്ടാക്കിയതും ഗുരു ഗോപിനാഥായിരുന്നു.

ഒരേ സമയം സര്‍ഗ്ഗാത്മകവും ശാസ്ത്രീയവും( ക്ളാസിക്കല്‍) ആയ നൃത്തരൂപമാണ് കേരളനടനംനിശ്ചിതമായ വേഷ സങ്കല്പമില്ലത്തതു കൊണ്ട് സമാന്യജനങ്ങള്‍ക്ക് എളുപ്പത്തില്‍ മനസ്സിലാവും; നൃത്തം അറിയുന്നവര്‍ക്കും പഠിച്ചവര്‍ക്കും മാത്രമല്ല, സാധാരണക്കാരനും ആസ്വദിക്കാന്‍ കഴിയും എന്നതാണ് ഈ നൃത്ത വിശേഷത്തിന്‍റെ പ്രധാന സവിശേഷത.

അദ്ദേഹത്തിന്‍റെ നവരസാഭിനയവും, രാമായണം ബാലേയും പാരിജാത പുഷ്പാപഹരണവും ഐക്യ കേരളവും, ശ്രീ യേശുനാഥ വിജയവും ചണ്ഡാല ഭിക്ഷുകിയുമെല്ലാം ജനങ്ങള്‍ നെഞ്ചേറ്റി ലാളിച്ചത് അതവര്‍ക്ക് ഹൃദ്യവും പ്രിയതരവും ആയതുകൊണ്ടായിരുന്നു.

ഹിന്ദു പുരാണേതിഹാസങ്ങള്‍ മാത്രമല്ല ക്രിസ്തീയവും ഇസ്ളാമികവും സമൂഹികവും, കാലികവുമായ വിഷയങ്ങളും കേരള നടനത്തിന് വഴങ്ങും . നിശ്ഛിത വേഷമില്ല എന്നത് ഇതിനും സഹായകമാണ് സ്റ്റേജില്‍ അവതരിപ്പിക്കാന്‍ പാകത്തിലാണ് കേരള നടനത്തിന്‍റെ അവതരണശൈലി.

കേരള നടനത്തിന്‍റെ സവിശേഷതകളും കഥകളിയില്‍ നിന്നുള്ള പ്രധാന മറ്റങ്ങളും ഇവയാണ്

വ ചുവടുകള്‍, മുദ്രകള്‍ അഭിനയം :

കഥകളിയിലെ സാത്വിക , ആംഗികാഭിനയ രീതികള്‍ ഏതാണ്ടതേപടി സ്വീകരിച്ച് , ശൈലീ പരമയാ മാറ്റം വരുത്തി. ഹസ്തലക്ഷണ ദീപിക പ്രകാരമുള്ള മുദ്രകളും നാട്യശാസ്ത്രപ്രകാരമുള്ള അഭിനയ വിധങ്ങളും ചുവടുകളും, കലാശങ്ങളും തീരുമാനങ്ങളുമെല്ലാം കഥകളിയിലുണ്ട്.

തോടയം, പുറപ്പാട് എന്നിവ അവതരണശൈലിയില്‍ മാറ്റം വരുത്തി കേരള നടനത്തിനു പറ്റിയ മട്ടിലാക്കിയിട്ടുണ്ട്.

വ പ്രത്യേകം വേഷമില്ല :

കഥകളിയിലെ ആഹാര്യാഭിനയ രീതി തീര്‍ത്തും ഉപേക്ഷിച്ചു. നൃത്തത്തെ സാമാന്യ ജനങ്ങള്‍ക്ക് മനസ്സിലാവാനായി കഥാപാത്രങ്ങള്‍ക്ക്, അവരെ ആളുകള്‍ക്ക് തിരിച്ചറിയാന്‍ പാകത്തിലുള്ള വേഷഭൂഷാദികള്‍ നല്‍കി .

എന്നു മാത്രമല്ല കേരള നടനത്തിന് നിയതമായ വേഷം വേണ്ടെന്നും വച്ചു.
രാജാവിന് രാജാവിന്‍റെ വേഷം, താപസിക്ക് താപസിയുടെ വേഷം, ഭിക്ഷുവിന് അതിനു ചേര്‍ന്ന വേഷം, ശ്രീകൃഷ്ണന് കൃഷ്ണന്‍റെ വേഷം, എന്നിങ്ങനെ.

അല്ലാതെ അവതരിപ്പിക്കുന്നത് ഏത് കഥാപാത്രമായാലും നിശ്ഛിത വേഷത്തില്‍ ചെയ്യുക എന്ന ഭരതനാട്യം, മോഹിനിയാട്ടം, ഒഡീസ്സി തുടങ്ങിയ നൃത്തങ്ങളുടെ രീതിയല്ല കേരള നടനം പിന്‍തുടരുന്നത്.

വ കഥകളിയെപ്പോലെ നാട്യപ്രധാനം:

ഇതിനു മറ്റൊരു പ്രധാന കാരണം കഥകളിയെപ്പോലെ നാട്യപ്രധാനമാണ് കേരള നടനവും. കഥ അഭിനയിച്ചു കാണിക്കുകയാണ് ചെയുന്നത്. നൃത്ത നൃത്യ രീതികള്‍ കേരള നടനത്തില്‍ ഇല്ലെന്നല്ല. അടിസ്ഥാനപരമായി നാട്യാംശം മുന്തിനില്‍ക്കുന്നു എന്നു മാത്രം.

വ അഞ്ച് വിധം അവതരണം:

ഏകാംഗ നൃത്തം, യുഗ്മ നൃത്തം, സംഘ നൃത്തം, നാടക നടനം, ബാലെ എന്നിങ്ങനെ അഞ്ച് പ്രധാന രീതികളിലാണ് കേരള നടനം അവതരിപ്പിക്കാറ്.

കാളിയ മര്‍ദ്ദനം, ഗരുഢ നൃത്തം, ശിവതാണ്ഡവം, പൂതനാ മോക്ഷം, വേട നൃത്തം മയൂര നൃത്തം, ഭക്തിയും വിഭകതിയും എന്നിവ ഏകാങ്ക നൃത്തത്തിന് ഉദാഹരണം.

യുഗ്മ നൃത്തം ശിവപാര്‍വതി, രാധാകൃഷ്ണ, രതിമന്മഥ നൃത്തങ്ങള്‍ യുഗ്മനൃത്തത്തിനുദാഹരണം.

സംഘ നൃത്തം തോടയം, പുറപ്പാട്, പൂജാ നൃത്തങ്ങള്‍ കൊയ്ത്തു നൃത്തം തുടങ്ങിയവ സംഘനൃത്തത്തിന് ഉദാഹരണം

നാടക നടനം ഭഗവദ്ഗീത , മഗ്ദലന മറിയം, ചണ്ഡാല ഭിക്ഷുകി ,ചീതയും തമ്പുരാട്ടിയും, ഭസ്മാസുര മോഹിനി, സീതാപഹരണം, പാരിജാത പുഷ്പാപഹരണം, തുടങ്ങിയവ നാടക നടനത്തിന് ഉദാഹരണം.

ബാലേകള്‍: ള്‍ഗുരുഗോപിനാഥ് സംവിധാനം ചെയ്ത രാമായണം, ശ്രീയേശുനാഥ വിജയം, മഹാഭാരതം ഐക്യ കേരളം സിസ്റ്റര്‍ നിവേദിത നാരായണീയം എന്നി ബാലേകളും നാടകനടനത്തിന്‍റെ ഉദാഹരണങ്ങളിലാണ്.

അവയില്‍ ചിലയിടത്ത് മറ്റു നൃത്ത ശൈലികളും ഉള്‍ക്കൊള്ളിച്ചിട്ടുണ്ട്. ഉദാഹരണം ദേവസദസ്സിലെ നൃത്തം. ഇവിടെ മോഹിനിയാട്ടം, ഭരതനാട്യം, ഒഡീസ്സി, കുച്ചുപ്പുടി എന്നിവ കൂട്ടിച്ചേര്‍ത്തിരിക്കുന്നു.

ഇതിനര്‍ത്ഥം കേരള നടനം ഇവയെല്ലാം ചേര്‍ന്നതാണ് എന്നല്ല. കേരളത്തിലെ വിവിധ നൃത്തങ്ങള്‍ കൂട്ടിച്ചേര്‍ത്തുണ്ടാക്കിയ അവിയലാണ് കേരള നടനമെന്ന ധാരണയും - യുവജനോത്സവ മാന്വലിലെ നിര്‍വചനവും തെറ്റാണ്.

വ കര്‍ണ്ണാടക സംഗീതം, കേരളീയ വാദ്യങ്ങള്‍:

മറ്റൊരു പ്രധാന മാറ്റം വാചികാഭിനയത്തിലാണ്. പ്രത്യേകിച്ച് സംഗീതത്തില്‍. കഥകളിയിലെ സോപാന രീതിക്കു പകരം പ്രധാനമായും കര്‍ണ്ണാടക സംഗീത രീതിയാണ് കേരള നടനത്തിലുള്ളത്.

ആളുകള്‍ക്ക് മനസ്സിലാവാന്‍ അതാണല്ലോ എളുപ്പം. എന്നാല്‍ ചെണ്ട, മദ്ദളം, ഇലത്താളം തുടങ്ങിയ വാദ്യോപകരണങ്ങള്‍ കേരള നടനത്തിന് അനുപേക്ഷണീയമാണ്.

ഇടക്ക, പുല്ലാങ്കുഴല്‍, വയലിന്‍, മൃദംഗം എന്നിവയും ഹാര്‍മോണിയം, സിതര്‍, സാരംഗി തുടങ്ങിയ ഉത്തരേന്ത്യന്‍ സംഗീതോപകരണങ്ങളും കേരള നടനത്തില്‍ ഉപയോഗിക്കാറുണ്ട് .പ്രധാനമായും കേരളീയ വാദ്യങ്ങളാണ് ഉപയോഗിക്കാറ് എന്ന് സാമാന്യമായി പറയാം.

കേരള നടനം- ആധര്‍മ്മണ്യം കഥകളിയോട്

Mon, 23 Jun 2008 21:43:23 +0530

കഥകളിയില്‍ നിന്ന് ഗുരു ഗോപിനാഥ് ഉണ്ടാക്കിയ നവീന നൃത്തരൂപമാണ് കേരള നടനം. കഥകളിയല്ലാതെ മറ്റൊരു നൃത്തരൂപവും കേരള നടനത്തിലില്ല .

ലളിതമാക്കിയ കഥകളി എന്നതിനെ വിളിച്ചാല്‍ തെറ്റാവും . ജനകീയമാക്കിയ കഥകളി എന്ന് വിളിക്കുന്നതാണ് അതിലും ഭേദം. കഥകളിയുടെ പന്ത്രണ്ട് കൊല്ലത്തെ അഭ്യാസം ഗുരു ഗോപിനാഥ് ആറ് കൊല്ലത്തേതാക്കി ചുരുക്കി. ചവിട്ടി ഉഴിച്ചില്‍ പോലുള്ള ചിട്ടകള്‍ വേണ്ടെന്നു വച്ചു

പക്ഷെ മെയ്യഭ്യാസങ്ങളും മുഖം കണ്ണ് കരചരണാങ്ങള്‍ എന്നിവയുടെ അഭ്യാസവും അതേപടി നിലനിര്‍ത്തി.കേരള നടനം ഒരുവിധം പഠിച്ചെടുക്കണമെങ്കില്‍ ചുരുങ്ങിയത് നാല് കൊല്ലത്തെ നിരന്തരമായ പരിശീലനം വേണം.

"കഥകളി എന്ന ക്ളാസിക് കലാരൂപത്തില്‍ നിന്ന് സാധാരണക്കാരന് ആസ്വദിക്കാന്‍ എളുപ്പമായ ലളിതാത്മകമായ ഒരു നൃത്ത സമ്പ്രദായം ആവിഷ്കരിക്കുകയും പ്രചാരപ്പെടുത്തുകയും ചെയ്തവരില്‍ പ്രമുഖനായിരുന്നു ഗുരു ഗോപിനാഥ് " എന്ന് മനോരമയുടെ ശതാബ്ദിപതിപ്പിലെ മരണം വരെ കലലാപാസന എന്ന കുറിപ്പില്‍ ഗുരു ഗോപിനാഥിനെ വിശേഷിപ്പി ക്കുന്നു .

''ക്ഷേത്രകലയും ഗ്രാമീണകലയുമായ കഥകളിയെ ഒന്നോ രണ്ടോ മണിക്കൂറുകൊണ്ടവതരിപ്പിക്കുന്ന പ്രകടനങ്ങള്‍ക്കായി മെരുക്കിയെടുത്തതാണ് ഗുരു ഗോപിനാഥിന്‍റെ നേട്ടം''. ഗുരു ഗോപിനാഥിന്‍റെ സംഭാവനകളെക്കുറിച്ച് എന്‍.വി.കൃഷ്ണവാരിയര്‍ പറയുന്നു.

കഥകളിയുടെ 12 കൊല്ലത്തെ അഭ്യാസക്രമത്തെ ആറു കൊല്ലത്തേക്ക് ചുരുക്കിയെടുക്കാനും ഗുരു ഗോപിനാഥിനു കഴിഞ്ഞു. 'കേരളത്തിലെ പ്രാത:സ്മരണീയരായ നാട്യാചാര്യന്മാര്‍ക്കിടയില്‍ സമുന്നതമായ സ്ഥാനത്തിന് അര്‍ഹത അദ്ദേഹത്തിന് കൈവന്നത് ഇതുമൂലമാണ്'' എന്നുമദ്ദേഹം എഴുതിയിരിക്കുന്നു.

കേരള നടനം നിര്‍വചനം

കേരള നടനം നൃത്ത ശൈലിയെക്കുറിച്ച് (സ്വന്തം നൃത്തശൈലിയെക്കുറിച്ച്) 'നടന കൈരളി 'എന്ന കൃതിയുടെ അവതാരികയില്‍ ഗുരു ഗോപിനാഥ് നല്‍കിയ നിര്‍വചനം ശ്രദ്ധിക്കുക

''...... കേരളത്തില്‍ ഉപയോഗിച്ചു വരുന്ന ചര്‍മ്മവാദ്യ താള മേള ക്രമമനുസരിച്ച് , ആംഗിക വാചിക ആഹാര്യ സാത്വികാദി അഭിനയ വിധങ്ങളും നൃത്തനൃത്യനാട്യങ്ങളും ഉള്‍ക്കൊള്ളുന്നതു ം , കഥകളിയില്‍ നിന്ന് ഉണ്ടായിട്ടുള്ളതുമായ ഒരു നവീന കലാരൂപമാണ് 'കേരള നടനം' അഥവാ 'കേരള ഡാന്‍സ് ""(നടന കൈരളി - ഗുരു ഗോപിനാഥ് 1970).

ഗുരു ഗോപിനാഥിന്‍റെ കേരള നടനം

Mon, 23 Jun 2008 21:42:04 +0530

കഴിഞ്ഞ നൂറ്റാണ്ടിലെ ഭാരതീയ നര്‍ത്തകരിലും നടന ആചാര്യന്മാരിലും പ്രതിഭ കൊണ്ടും സിദ്ധികൊണ്ടും അഗ്രിമനായ ഗുരു ഗോപിനാഥ് , ഭാരതീയ ശാസ്ത്രീയ നൃത്തകലയ്ക്ക് നല്‍കിയ സംഭാവനയാണ് ''കേരള നടനം'' എന്ന നൃത്തവിശേഷം.

ഗുരുജിയുടെ അറുപതു കൊല്ലത്തെ നൃത്ത സപര്യയുടെ ഹോമാഗ്നിയില്‍ നിന്നുമുള്ള 'പുരോഢാശം' എന്നതിനെ വിളിക്കാം. ഭാര്യ തങ്കമണി, ശിഷ്യന്മാരായ ഗുരു ഗോപാലകൃഷ്ണന്‍, കേശവദാസ്, ഡാന്‍സര്‍ തങ്കപ്പന്‍, ഡാന്‍സര്‍ ചെല്ലപ്പന്‍, ഭവാനി ചെല്ലപ്പന്‍, ഗുരു ചന്ദ്രശേഖര്‍, പ്രൊഫ.ശങ്കരന്‍ കുട്ടി തുടങ്ങി ഒട്ടേറെ പേരുടെ പ്രയത്നവും കേരള നടനത്തിന്‍റെ വളര്‍ച്ചയ്ക്ക് സഹായകമായിട്ടുണ്ട്.

ഇന്ന് കേരള നടനത്തിനു പറ്റിയ കുഴപ്പം അത് യുവജനോത്സവത്തിലെ മത്സര ഇനമായി ഉള്‍പ്പെടുത്തിയതാണ്. ഗുരു ഗോപിനാഥ് ഉണ്ടാക്കിയെടുത്ത കേരള നടനമല്ല ഇന്നു കുട്ടികള്‍ പഠിക്കുന്നതും അവതരിപ്പിക്കുന്നതും.

ഗുരു ഗോപിനാഥിന്‍റെ പേരില്‍ പലരും കാട്ടുന്നത് ശൂദ്ധ അസംബന്ധമാണ്.കേരളനടനം നന്നയി പഠിച്ചവരല്ല മിക്ക കേരള നടനം അധ്യാപകരും. ഇപ്പോഴത്തെ കേരള നടനം കാണുമ്പോള്‍ പലര്‍ക്കും പുച്ഛമാണ്. വിധികര്‍ത്താക്കളായി വരുന്നവരില്‍ പലരും ഒരിക്കല്‍ പോലും കേരള നടനം കാണുക പോലും ചെയ്യാത്തവരാണ്.

നാല്‍പ്പതുകളിലും അന്‍പതുകളിലും ഇന്ത്യയൊട്ടാകെ ആവേശമായിരുന്ന ഈ നൃത്തരൂപത്തിന്‍റെ ഇന്നത്ത അവസ്ഥ ശോചനീയമാണ്.ഫലത്തിലിത് ഗുരു ഗോപിനാഥിന്‍റെ യശസ്സിനു കളങ്കമേല്‍പ്പിക്കുന്നു.

തുടക്കം

മുപ്പതുകളുടെ തുടക്കം ....അന്ന് കഥകളിക്ക് വലിയ പേരില്ലായിരുന്നു. കഥകളിക്കാര്‍ അവഗണനയിലായിരുന്നു.

അമേരിക്കന്‍ നര്‍ത്തകിയായ ഇസ്തര്‍ ഷെര്‍മാന്‍ എന്ന രാഗിണി ദേവി (പ്രമുഖ നര്‍ത്തകി ഇന്ദ്രാണീ റഹ്മാന്‍റെ അമ്മ) യാണ് കേരള നടനത്തിന്‍റെ പിറവിക്ക് ആധാരമായ ആശയം മുന്നോട്ട് വച്ചത് . 1931 ല്‍.

മണിക്കൂറുകളും ദിവസങ്ങളും നീളു ന്ന കഥകളിയെ ഒന്നോ രണ്ടോ മണിക്കൂറില്‍ ഒരുക്കി വന്‍ നഗരങ്ങളില്‍ അവതരിപ്പിക്കാനാവുമോ എന്നതായിരുന്നു അവരുടെ ശ്രമം. അതിന് സഹായിയായി അവര്‍ക്ക് ലഭിച്ചത് കലാമണ്ഡലത്തില്‍ കഥകളി വടക്കന്‍ ചിട്ടയില്‍ ഉപരിപഠനം നടത്തുകയായിരുന്ന കപ്ളിങ്ങാടന്‍ ചിട്ടക്കരനായ കഥകളിക്കാരന്‍ ചമ്പക്കുളം ഗോപിനാഥപിള്ള എന്ന ഗുരു ഗോപിനാഥായിരുന്നു.

1931 ഡിസംബറില്‍ ബോംബെ ഓപ്പറാ ഹാളില്‍ രാഗിണി ദേവിയു ം ഗോപിനാഥും ചേര്‍ന്ന് കഥകളിനൃത്തം എന്ന പേരില്‍ പരീക്ഷിച്ചുനോക്കിയ നൃത്ത പ്രകടനത്തില്‍ നിന്നാണ് കേരള നടനത്തിന്‍റെ തുടക്കം.

രാഗിണി ദേവിയില്‍ നിന്നും ആധുനിക തിയേറ്റര്‍ സങ്കല്‍പത്തെക്കുറിച്ച് കിട്ടിയ ധാരണകളും പാഠങ്ങളും ഉള്‍ക്കൊണ്ടാണ് , കഥകളിയിലെ ശാസ്ത്രീയത ചോര്‍ന്നുപോകാത്ത പുതിയൊരു നൃത്തരൂപം ഉണ്ടാക്കാന്‍ തനിക്കു കഴിഞ്ഞതെന്ന് ഗുരു ഗോപിനാഥ് 'എന്‍റെ ജീവിത സ്മരണകള്‍' എന്ന ആത്മകഥയില്‍ പറയുന്നുണ്ട്.

ഗുരുഗോപിനാഥ് ജന്മശതാബ്ദി ആഘോഷിച്ചു

Sun, 08 Jun 2008 09:45:59 +0530

പ്രസിദ്ധ നര്‍ത്തകനും നൃത്താചാര്യനുമായ ഗുരുഗോപിനാഥിന്‍റെ ജന്മശതാബ്ദി അക്മിയുടെ (കലാദര്‍പ്പണം) ആഭിമുഖ്യത്തില്‍ എറണാകുളത്ത് ആഘോഷിച്ചു. ജന്മശതാബ്ദി സമ്മേളനം, പുസ്തക പ്രകാശനം, ഗുരുജി അനുസ്മരണ സമ്മേളനം, കേരള നടനം അവതരണം എന്നിവയായിരുന്നു പ്രധാന പരിപാടികള്‍.

പ്രമുഖ ചിത്രകാരനും സാംസ്കാരിക നായകനുമായ എം.വി.ദേവനാണ് ജന്മശതാബ്ദി സമ്മേളനം ഉദ്ഘാടനം ചെയ്തത്.

പ്രതിഭയുടേയും കഠിന പ്രയത്നത്തിന്‍റെയും മികവു കൊണ്ടാണ് ഗുരുഗോപിനാഥിനെ പോലുള്ള ഒരു മഹാ ആചാര്യന്‍ ഈ ലോകത്തില്‍ ഉണ്ടായതെന്നും അദ്ദേഹം നല്‍കിയ അമൂല്യമായ സംഭാവനകളെ കുറിച്ച് ഇനിയും ഗൌരവതരമായി വിലയിരുത്തപ്പെടേണ്ടതുണ്ടെന്നും ദേവന്‍ പറഞ്ഞു.

തൃപ്പൂണിത്തുറ എം.എല്‍.എ ബാബു ചടങ്ങില്‍ അധ്യക്ഷനായിരുന്നു. ഡോ.വി.എസ്.ശര്‍മ്മ മുഖ്യ പ്രഭാഷണം നടത്തി. കലാദര്‍പ്പണം രവീന്ദ്രനാഥ്, ഗുരു ഗോപാലകൃഷ്ണന്‍, ലക്ഷ്മി കുമാരി, ദൂരദര്‍ശന്‍ കേന്ദ്ര തൃശൂര്‍ നിലയം ഡയറക്‍ടര്‍ രാഘവന്‍, പ്രൊഫ.സുകുമാരന്‍, ടി.ശശിമോഹന്‍ എന്നിവര്‍ സംസാരിച്ചു.

ഗുരുഗോപാലകൃഷ്ണന്‍റെ ഗുരുപൂജയോടെയായിരുന്നു ചടങ്ങുകളുടെ തുടക്കം. പി.ഭാസ്കരന്‍ എഴുതിയ ഗുരുചരണപൂജ എന്ന് തുടങ്ങുന്ന ഗാനത്തിന്‍റെ പശ്ചാത്തലത്തിലായിരുന്നു ഗുരുപൂജ.

തൈപ്പറമ്പില്‍ ഗോപാലന്‍ കുട്ടി മേനോന്‍ ഗുരുവിനെ കുറിച്ചെഴുതിയ കവിത അവതരിപ്പിച്ച് കാവ്യാഞ്ജലി നടത്തി.

കുസുമം ഗോപാലകൃഷ്ണന്‍ ഇംഗ്ലീഷിലും മലയാളത്തിലും രചിച്ച കേരള നടനം എന്ന പുസ്തകങ്ങളുടെ പ്രകാശനമായിരുന്നു ചടങ്ങിലെ പ്രധാന ഇനം. മലയാള പുസ്തകം കന്യാകുമാരി വിവേകാനന്ദ കേന്ദ്രം മുന്‍ ഡയറക്‍ടര്‍ ലക്ഷ്മി കുമാരിയില്‍ നിന്നും ഗുരുജിയുടെ ഇളയമകള്‍ വിനോദിനി ശശിമോഹന്‍ ഏറ്റുവാങ്ങി. ഇംഗ്ലീഷ് പുസ്തകം ദൂരദര്‍ശന്‍ ഡയറക്‍ടര്‍ രാഘവനില്‍ നിന്ന് പ്രൊഫ.സുകുമാരന്‍ ഏറ്റുവാങ്ങി.

ഉച്ചയ്ക്ക് ശേഷം നടന്ന ഗുരു അനുസ്മരണ സമ്മേളനം കാര്‍ട്ടൂണിസ്റ്റ് യേശുദാസന്‍ ഉദ്ഘാടനം ചെയ്തു. പ്രമുഖ ഗാന്ധിയന്‍ .... മാരാര്‍ അധ്യക്ഷനായിരുന്നു. ചേറ്റൂര്‍ രാധാകൃഷ്ണന്‍, ഭവാനി ചെല്ലപ്പന്‍, കലാമണ്ഡലം പ്രഭാകരന്‍, മണ്ണഞ്ചേരി ദാസന്‍, ത്രിപുരസുന്ദരി, ഗോപിനാഥ്, മധുസൂദനന്‍ എന്നിവര്‍ സംസാരിച്ചു.

മധുസൂദനന്‍റെ നേതൃത്വത്തില്‍ കോഴിക്കോട്ടുനിന്നെത്തിയ സംഘത്തിന്‍റെ കേരള നടനവും മണ്ണഞ്ചേരി ദാസന്‍റെ ഓട്ടന്‍‌തുള്ളലും ഉണ്ടായിരുന്നു.

ഗുരു ഗോപിനാഥ്; ശിഷ്യന്‍മാര്‍

Fri, 09 May 2008 18:16:14 +0530

നാട്യാചാര്യനായ ഗുരു ഗോപിനാഥിന് ഇന്ത്യക്ക് അകത്തും പുറത്തുമായി ഒട്ടേരെ ശിഷ്യന്മാരുണ്ട് അവരില്‍ മിക്കവരും കാലയവനികക്കുള്‍ലില്‍ മറഞ്ഞു. സേഷിക്കുന്ന പലരും നൃത്തരംഗത്തില്ല .

ശ്രദ്ധേയരായ ചില ശിഷ്യന്മാരുടെ പേരു വിവരം

ചിത്രസേന (ശ്രീലങ്ക)
കേശവദാസ്,
ഗുരു ചന്ദ്രശേഖര്‍,
ലളിത, പത്മിനി രാഗിണിമാര്‍,
ഗുരു ഗോപാലകൃഷ്ണന്‍,
ഡാന്‍സര്‍ തങ്കപ്പന്‍(കമല ഹാസന്‍റെ ഗുരു),
ഡാന്‍സര്‍ സുന്ദരം (പ്രഭുദേവയുടെ അച്ഛന്‍),
യാമിനി കൃഷ്ണമൂര്‍ത്തി,
പി ടി കെ മേനോന്‍ ,
വേണുജി,
ഡാന്‍സര്‍ ശങ്കരന്‍ കുട്ടി,
ചെല്ലപ്പന്‍, ഭവാനി ചെല്ലപ്പന്‍,
വത്മീകി ബാനര്‍ജി (ദില്ലി)
ബാലന്‍ മേനോന്‍, ( കൊല്‍ക്കത്ത)
കെ.പി.ഭാസ്കര്‍ (സിംഗപ്പൂര്‍),
വാസു, രഘുറാം (ചെന്നൈ),
ഹെയ്ഡി ബ്രൂഡര്‍ (സ്വിറ്റ് സര്‍ലാണ്ട്),
രഞ്ജന.(അമേരിക്ക),
വേലാനന്തന്‍, സൂ.പ്പയ്യ , വസന്തസേന, (എല്ലാവരും ശ്രീലങ്ക)

ചിത്രസേന : ഒരു ശ്രീലങ്കന്‍ നടന വിസ്മയം

Fri, 09 May 2008 15:31:58 +0530

ശ്രീലങ്കയിലെ നടനവേദികള്‍ ഈ മനുഷ്യനോട് കടപ്പെട്ടിരിക്കുന്നു. നര്‍ത്തകനായും നൃത്തസംവിധായകനായും ലോകോത്തരമായ സംഭാവനകള്‍ നല്‍കിയ ചിത്രസേന. ശ്രീലങ്കയുടെ കലാ-സാംസ്കാരിക രംഗം ചിത്രസേനയെ വിശേഷിപ്പിക്കുന്നത് "കലാരംഗത്തെ അഗ്രഗാമി' എന്നാണ്.

രാജ്യമാകെ കലാരംഗത്ത് പുതിയപാതകളുടെ വെളിച്ചം തേടിയവര്‍ക്ക് വഴികാട്ടിയാകുവാന്‍ ചിത്രസേനയ്ക്ക് കഴിഞ്ഞു. പരമ്പരാഗത കലകളിലും അനുഷ് ഠാന കലകളിലും വ്യത്യസ്തതയുടെ നിലാവുപരത്താന്‍ അദ്ദേഹത്തിനായി. 1985 ല്‍ അന്തരിച്ചു.

ചിത്രസേനയുടെ പിതാവ് ഡീബര്‍ത് ദയസ് ഷേക്സ്പീയര്‍ നാടകങ്ങളിലൂടെ അറിയപ്പെടുന്ന നടനും, സംവിധായകനും നിര്‍മ്മാതാവുമായിരുന്നു. ചിത്രസേനയുടെ കഴിവുകല്‍ ചെറുപ്പത്തിലേ തിരിച്ചറിഞ്ഞ ദയസ് അദ്ദേഹത്തെ കലാപഠനത്തിനായി ഇന്ത്യയിലേക്കയച്ചു. ഇന്ത്യയില്‍ നിന്ന്കഥകളി, ടാഗൂറിന്‍റെ നൃത്തനാടകങ്ങള്‍, ഉദയ് ശങ്കറിന്‍റെ കലകള്‍ ഇവയില്‍ പരിചയം നേടി.

ശ്രീലങ്കന്‍ നൃത്തരൂപങ്ങളിലെ വേര്‍തിരിവുകളില്‍ നിന്ന് വേറിട്ട് ഇന്ത്യന്‍ നൃത്തരൂപങ്ങളെപ്പറ്റി കൂടുതലായി പഠിക്കുവാന്‍ ചിത്രസേന ഇന്ത്യയിലെത്തി.

ഗുരുഗോപിനാഥിന്‍റെ ശിഷ്യനായി ചിത്രോദയാ നൃത്തവിദ്യാലയത്തില്‍ ചേര്‍ന്ന അദ്ദേഹം കഥകളിയിലും നൃത്തനാടക രംഗത്തും പ്രാവീണ്യം നേടി. ചിത്രോദയയിലെ പഠനശേഷം ചിത്രസേനയെപ്പറ്റി ഗുരുഗോപിനാഥിന്‍റെ വാക്കുകള്‍ ഇങ്ങനെയായിരുന്നു .

""ചിത്രസേന ഒരു വലിയ നര്‍ത്തകനാകും. എതിരാളികളില്ലാത്ത നര്‍ത്തകന്‍''. അദ്ദേഹത്തിന്‍റെ വാക്കുകള്‍ അന്വര്‍ത്ഥമായി. എതിരാളികളില്ലാത്ത നര്‍ത്തകനായി ചിത്രസേന തുടര്‍ ന്നു മരണം വരെ

ശ്രീലങ്കയില്‍ പരമ്പരാഗതമായ നൃത്തരൂപങ്ങളില്‍ ചിത്രസേന കാലികമായ മാറ്റങ്ങള്‍ കുറിച്ചു. ശബ്ദ സംവിധാനത്തിലും, രംഗവിതാനത്തിലും നൂതനമായ പരിഷ്കാരങ്ങള്‍ വരുത്തി പരമ്പരാഗത കലകളെ കൂടുതല്‍ സംവേദനക്ഷമമാക്കി.

എത്ര പരിഷ്കാരങ്ങള്‍ വരുത്തിയാലും പരമ്പരാഗത നൃത്തരൂപങ്ങളുടെ തനതായ ഭാവം നിലനിര്‍ത്തുവാന്‍ തുടര്‍ച്ച മാത്രമാണ്. സിംഹള ബാലെ നൃത്തത്തില്‍ കലാപരമായ പരീക്ഷണങ്ങള്‍ക്ക് ചിത്രസേന മുതിര്‍ന്നു.

ചിത്രസേന രൂപം കൊടുത്ത "ചിത്രസേന ഡാന്‍സ് കമ്പനി ഓഫ് ശ്രീലങ്ക' നിരവധി വിദേശ രാജ്യങ്ങളില്‍ കലാപരിപാടികള്‍ അവതരിപ്പിച്ചു. യൂറോപ്പ്, റഷ്യ, കാനഡ, ഓസ്ട്രേലിയ, ന്യൂസിലാന്‍ഡ്, ജപ്പാന്‍, സിംഗപ്പൂര്‍, മലേഷ്യ, ഇന്ത്യ, ബംഗ്ളാദേശ് തുടങ്ങിയ രാജ്യങ്ങള്‍ ചിത്രസേനയുടെ കലയെ അടുത്തറിഞ്ഞു. ശ്രീലങ്കന്‍ പുരാണങ്ങളുടെ ചിത്രീകരണവും പ്രാദേശിക മിത്തുകളും ചിത്രസേനയുടെ സൗന്ദര്യ വ്യാപാരത്തിന് വിഷയങ്ങളായി.

1944 ല്‍ ശ്രീലങ്കന്‍ തലസ്ഥാനമായ കൊളംബോയില്‍ ആദ്യ നൃത്തവിദ്യാലയമായ "ചിത്രസേന സ്കൂള്‍ ഓഫ് ഡാന്‍സ്' ആരംഭിച്ചു. പരമ്പരാഗത ചട്ടക്കൂടില്‍ നിന്ന് വേറിട്ട് നില്‍ക്കുന്ന ഒരു നൃത്ത സംസ്കാരം രൂപപ്പെടുത്തുന്നതില്‍ ഈ വിദ്യാലയം വഹിച്ച പങ്ക് ശ്ളാഘനീയമാണ്.

ഭാരതീയ സംസ്കാരവും കലകളും എന്നും ചിത്രസേനയെ ആകര്‍ഷിച്ചിരുന്നു. രവീന്ദ്രനാഥ ടാഗോറിന്‍റെ ശ്രീലങ്കന്‍ സന്ദര്‍ശന വേളയില്‍ ചെയ്ത പ്രസംഗങ്ങള്‍ അന്ന് വിദ്യാര്‍ത്ഥിയായിരുന്ന ചിത്രസേനയെ പ്രചോദിപ്പിച്ചു. വിദ്യാസമ്പന്നരായ സ്ത്രീ പുരുഷന്മാര്‍ കലാരംഗത്തേയ്ക്കു വരണമെന്ന ആശയത്തിലൂടെ വിപ്ളവകരമായ മാറ്റം കുറിക്കാന്‍ ടാഗൂറിന് കഴിഞ്ഞു.

രാംഗോപാലിന്‍റെ ഭരതനാട്യവും ഉദയശങ്കറിന്‍റെ കലകളും ചന്ദ്രസേനയുടെ ചേതനയെ പരിപോഷിപ്പിച്ചു. കാന്‍ഡിയന്‍ നൃത്തത്തിനുവേണ്ടി പാര്‍ലര്‍ പിയാനോ പോലുള്ള സംഗീതോപകരണങ്ങള്‍ ആ സമയത്ത് ശ്രീലങ്കയില്‍ നിരോധിച്ചു.

ചിത്രസേനയുടെ അറുപതു വര്‍ഷം നൃത്ത ജീവിതത്തിലൂടെ വ്യക്തിപരമായ നേട്ടത്തേക്കാള്‍ ശ്രീലങ്കയുടെ നവസമ്സ്കാര സൃഷ്ടിക്ക് നല്‍കിയ സംഭാവനകളെയാണ് ഭാവി തലമുറ ഓര്‍മ്മിക്കുക. സൗന്ദര്യപരവും കലാത്മകവുമായ അറുപതു വര്‍ഷങ്ങളായി ശ്രീലങ്കയുടെ സാംസ്കാരിക ചരിത്രത്തില്‍ ചിത്രസേന എഴുതപ്പെടും.

ചിത്രസേനയുടെ 82 ാം പിറന്നാള്‍ "ചിത്രസേനയുടെയും നൃത്തവിദ്യാലയത്തിന്‍റെയും ചരിത്ര'മായി ശ്രീലങ്കയില്‍ ആഘോഷിക്കുകയുണ്ടായി. 50 വര്‍ഷത്തെ ചിത്രസേനയുടെ നൃത്ത ജീവിതത്തെപ്പറ്റി "നൃത്തപൂജ' എന്ന പുസ്തകം പ്രസിദ്ധീകരിച്ചു.