ഓസ്കാര്‍

അപൂര്‍വ്വസഹോദരങ്ങള്‍

Mon, 25 Feb 2008 15:41:18 +0530

PRO

1980ല്‍ പടിഞ്ഞാറന്‍ ടെക്സാസിലെ മയക്കുമരുന്ന് കള്ളക്കടത്തിനെയും ഇതുമായി ബന്ധപ്പെട്ട് നടക്കുന്ന സംഘര്‍ഷങ്ങളുടെയും കഥ പറഞ്ഞ ‘നോ കണ്‍‌ട്രി ഫോര്‍ ഓള്‍ഡ് മെന്‍‘ സംവിധാനം ചെയ്ത സഹോദരങ്ങള്‍ - ജോയല്‍ കോയനും എഥാന്‍ കോയനും - ഇത്തവണ ഓസ്കാറില്‍ ഒരു മാജിക് കാണിച്ചു. മികച്ച ചിത്രം, മികച്ച സംവിധാനം, മികച്ച തിരക്കഥ, മികച്ച സഹനടന്‍ എന്നീ അവാര്‍ഡുകളാണ് ഇവരുടെ സിനിമ നേടിയത്. അങ്ങനെ ഇവരുടെ ഒരു പരീക്ഷണം കൂടി വിജയിച്ചിരിക്കുകയാണ്. സിനിമാ വ്യാകരണങ്ങള്‍ തകര്‍ക്കുന്ന ആഖ്യാന ശൈലിയിലൂടെ മുന്‍പും ഈ സഹോദരന്‍‌മാര്‍ വിസ്മയം സൃഷ്ടിച്ചിരുന്നു.

ജോയല്‍ കോയന്‍ മിനസോട്ടയില്‍ 1954ലും എഥാന്‍ കോയന്‍ 57ലുമാണ് ജനിച്ചത്. ഇരുവരുടെയും പന്ത്രണ്ടാമത്തെ ചിത്രമാണ്‌ നോ കണ്‍ട്രി ഫോര്‍ ഓള്‍ഡ്‌ മെന്‍. സംവിധാനം, തിരക്കഥ, എഡിറ്റിംഗ് തുടങ്ങിയ മേഖലകളിലെല്ലാം ഒരുമിച്ചായിരുന്നു കോയന്‍ സഹോദരന്‍‌മാരുടെ പ്രവര്‍ത്തനം. 1984ല്‍ ‘ബ്ലഡ് സിമ്പിള്‍‘ എന്ന ചിത്രവുമായാണ് ഇവര്‍ സിനിമാ രംഗത്ത് തുടക്കം കുറിക്കുന്നത്. കഥയും തിരക്കഥയും എഡിറ്റിംഗും നിര്‍മ്മാണവും എല്ലാം ഇവര്‍ തന്നെയായിരുന്നു. ആദ്യ ചിത്രത്തിന്‍റെ ക്രെഡിറ്റ് കാര്‍ഡില്‍ സംവിധാനം ജോയലും നിര്‍മ്മാണം എഥാനുമായിരുന്നു. ആദ്യ ചിത്രം തന്നെ ഏറെ നിരൂപക പ്രശംസ പിടിച്ചു പറ്റി.

ഇതിനിടയില്‍ മറ്റ് പല സംവിധായകര്‍ക്കും കോയന്‍ സഹോദരന്‍‌മാര്‍ തിരക്കഥ എഴുതി നല്‍കി. 1987ലാണ് റൈസിംഗ് അരിസോണ എന്ന വിഖ്യാത ചിത്രം ഇവരില്‍ നിന്ന് പിറവിയെടുക്കുന്നത്. ഈ കോമഡിച്ചിത്രം ഇവരുടെ പ്രശസ്തി വര്‍ദ്ധിപ്പിച്ചു. കോയന്‍ ചിത്രങ്ങള്‍ക്കായി ലോകം കാത്തിരിക്കാന്‍ തുടങ്ങുന്ന അവസ്ഥ സൃഷ്ടിക്കുകയും ചെയ്തു.

മില്ലേഴ്സ് ക്രോസിംഗ് എന്ന, അധോലോക കുടിപ്പകയുടെ കഥ പറഞ്ഞ സിനിമയോടെ തങ്ങള്‍ക്ക് ലോക സിനിമയുടെ നെറുകയിലേക്കുള്ള ദൂരം കുറയ്ക്കുകയാണ് ജോയല്‍ കോയനും എഥാന്‍ കോയനും ചെയ്തത്. ജോണ്‍ ടര്‍ട്ടറോ എന്ന നടന്‍റെ ഏറ്റവും മികച്ച പ്രകടനങ്ങളിലൊന്ന് മില്ലേഴ്സ് ക്രോസിംഗിലായിരുന്നു. 1991ല്‍ പുറത്തിറങ്ങിയ ബാര്‍ട്ടണ്‍ ഫിങ്ക് സംവിധാനം ചെയ്തതിന് മികച്ച സംവിധായകനുള്ള പുരസ്കാരം ജോയലിന് ലഭിച്ചു. കാന്‍ ഫെസ്റ്റിവലില്‍ ആ ചിത്രം ഗോള്‍ഡന്‍ പാം അവാര്‍ഡ് സ്വന്തമാക്കി. ജോണ്‍ ടര്‍ട്ടറോയ്ക്കും ആ സിനിമ പുരസ്കാരങ്ങള്‍ നേടിക്കൊടുത്തു. എന്നാല്‍ ഇവരുടെ അടുത്ത ചിത്രം, ഹഡ്‌സക്കര്‍ പ്രോക്സി എല്ലാ അര്‍ത്ഥത്തിലും ഒരു പരാജയമായിരുന്നു.

ചോദ്യം ചെയ്യപ്പെടാനാകാത്ത ഒരു വിജയമാണ് 1996ല്‍ ഫാര്‍ഗോ എന്ന ചിത്രത്തിലൂടെ കോയന്‍ സഹോദരങ്ങള്‍ സൃഷ്ടിച്ചെടുത്തത്. കുറ്റകൃത്യങ്ങളും വയലന്‍സും നിറഞ്ഞ ഒരു കറുത്ത ഫലിതമായിരുന്നു ആ സിനിമ. ലോകമെങ്ങും ഈ സംവിധായകര്‍ക്ക് ആരാധകരെ നേടിക്കൊടുക്കാന്‍ ഫാര്‍ഗോയ്ക്ക് കഴിഞ്ഞു. ബിഗ് ലബോവ്‌സ്‌കി, ഓ! ബ്രദര്‍,വേര്‍ ആര്‍ട്ട് ദൌ, ദി മാന്‍ ഹൂ വാസ് നോട്ട് ദേര്‍, ഇന്‍റോളറബിള്‍ ക്രുവല്‍റ്റി, ദി ലേഡി കില്ലേഴ്സ്, പാരിസ് ഐ ലവ് യു തുടങ്ങിയ സിനിമകളിലൂടെ ഈ അപൂര്‍വ്വസഹോദരങ്ങള്‍ സിനിമ എന്ന മാധ്യമത്തെ സ്വന്തം കൈപ്പിടിയിലൊതുക്കുകയായിരുന്നു. ഇവരുടെ സിനിമകളിലെ ഹാസ്യം കണ്ട് പ്രേക്ഷകര്‍ ആര്‍ത്തു ചിരിച്ചു. വയലന്‍സ് കണ്ട് നടുങ്ങിത്തരിച്ചു. ഹൃദയം ഹൃദയത്തോട് സംസാരിക്കുന്നതുപോലെയാണ് ജോയല്‍ കോയനും എഥാന്‍ കോയനും സിനിമകളുണ്ടാക്കിയത്.

കൊര്‍മാക് മക്കാര്‍ത്തിയുടെ നോ കണ്‍‌ട്രി ഫോര്‍ ഓള്‍ഡ് മെന്‍ എന്ന നോവല്‍ അതേ പേരില്‍ സിനിമയാക്കിയാണ് കോയന്‍ സഹോദരന്‍‌മാര്‍ ഇപ്പോള്‍ ഓസ്കാറില്‍ അത്ഭുതം സൃഷ്ടിച്ചിരിക്കുന്നത്. ഈ ചിത്രത്തില്‍ കാണാന്‍ കഴിയുന്ന കറുത്ത ജീവിത യാഥാര്‍ത്ഥ്യങ്ങള്‍ കാഴ്ചക്കാരനെ ഞെട്ടിക്കുന്നതാണ്. ഓസ്കാര്‍ നേട്ടത്തെ നിസാരവത്കരിക്കുന്ന ചെറുചിരിയുമായി ജോയല്‍ കോയനും എഥാന്‍ കോയനും അടുത്ത സംരംഭങ്ങളിലേക്ക് കടക്കുകയാണ്. ഗാംബിറ്റ്, സബര്‍ബികോണ്‍, ഹെയ്‌ല്‍ കാസര്‍ എന്നിവയാണ് അവരുടെ വരാന്‍ പോകുന്ന ചിത്രങ്ങള്‍.

ലൂയിസ് ലോക സിനിമയുടെ നെറുകയില്‍

Mon, 25 Feb 2008 15:11:17 +0530

PRO

ഡാനിയേല്‍ ഡേ ലൂയിസ് ഒരിക്കല്‍ കൂടി ലോക സിനിമയുടെ നെറുകയില്‍ എത്തിയിരിക്കുകയാണ്. അമ്പത്തൊന്നില്‍ എത്തി നില്‍ക്കുമ്പോഴും അഭിനയം എന്നും തന്‍റെ കൈകളില്‍ ഭദ്രമെന്ന് ഒരിക്കല്‍ കൂടി തെളിയിക്കുകയാണ് ഈ അതുല്യ പ്രതിഭ. എഴുപതുകളുടെ തുടക്കം മുതല്‍ സിനിമയില്‍ സജീവമായി തുടരുന്ന ലൂയിസിന് ചെറിയൊരു ഇടവേളയ്ക്ക് ശേഷമാണ് വീണ്ടും മികച്ച നടനുള്ള ഓസ്കാര്‍ ലഭിക്കുന്നത്.

അപ്ടോണ്‍ സിം‌ക്ലെയറിന്‍റെ ‘ഓയില്‍’ എന്ന കഥയെ ആസ്പദമാക്കി പോള്‍ തോമസ് ആന്‍ഡേഴ്സണ്‍ സംവിധാനം ചെയ്ത ‘ദേര്‍ വില്‍ ബി ബ്ലഡ്’ എന്ന ചിത്രത്തിലെ അഭിനയമാണ് ലൂയിസിനെ വീണ്ടും ഓസ്കാറിന് അര്‍ഹനാക്കിയത്. ഇതേ ചിത്രത്തിലെ അഭിനയത്തിന് ഈ വര്‍ഷത്തെ ഗോള്‍ഡന്‍ ഗ്ലോബ് പുരസ്കാരത്തിനും ലൂയിസ് അര്‍ഹനായിരുന്നു.
വ്യവസായത്തില്‍ പുതിയ ഉയരങ്ങള്‍ തേടിയുള്ള പ്രയാണത്തിനിടയില്‍ സ്വന്തം ജീവിതം പോലും മറന്നു പോകുന്ന വ്യവസായിയുടെ ജീവിതം അസാധാരണമായ മികവോടെ അവതരിപ്പിച്ചതിനാണ് ഇത്തവണ ലൂയിസിനെ തേടി ഓസ്കാര്‍ എത്തുന്നത്. 1989ല്‍ ‘മൈ ലെഫ്റ്റ് ഫൂട്ട്’ എന്ന ചിത്രത്തിലെ അഭിനയത്തിനും ലൂയിസിന് മികച്ച നടനുള്ള ഓസ്കാര്‍ ലഭിച്ചിരുന്നു.

1957 ഏപ്രില്‍ 29ന് ജനിച്ച ഡാനിയേല്‍ മൈക്കല്‍ ഡേ ലൂയിസിന് കുട്ടിക്കാലം മുതല്‍ അഭിനയം എന്ന കലയും പുരസ്കാരങ്ങളും കൂടെത്തന്നെയുണ്ട്. വളരെ സെലക്ടീവായി റോളുകള്‍ തെരഞ്ഞെടുക്കുന്ന നടനായാണ് ലൂയിസ് അറിയപ്പെടുന്നത്. കഴിഞ്ഞ പത്ത് വര്‍ഷങ്ങള്‍ക്കിടെ മൂന്ന് ചിത്രങ്ങളില്‍ മാത്രമാണ് ഈ നടന്‍ അഭിനയിച്ചിട്ടുള്ളത്. ഇതില്‍ ഒരു ചിത്രത്തിന് ഓസ്കാര്‍ ലഭിച്ചപ്പോള്‍ മറ്റൊന്നിന് ഓസ്കാര്‍ നാമനിര്‍ദ്ദേശവും ലഭിച്ചു.

1981ല്‍ ‘ഗാന്ധി‘ എന്ന ചിത്രത്തില്‍ തെരുവു മോഷ്ടാവിന്‍റെ റോളിലൂടെയാണ് ലൂയിസ് ശ്രദ്ധിക്കപ്പെടുന്നത്. തുടര്‍ന്ന് തൊണ്ണൂറുകളുടെ മദ്ധ്യം വരെ നിരവധി ശ്രദ്ധേയമായ വേഷങ്ങളിലൂടെ ലൂയിസ് ആരാധകരുടെ മനസില്‍ ഇടം നേടി. പിന്നീട് 1997ല്‍ ദി ബോക്സര്‍, 2002ല്‍ ഗ്യാങ്സ് ഓഫ് ന്യൂയോര്‍ക്ക്, 2007ല്‍ ദേര്‍ വില്‍ ബി ബ്ലഡ് എന്നീ ചിത്രങ്ങളില്‍ മാത്രമാണ് അഭിനയിച്ചത്.

1997ല്‍ ലൂയിസ് സിനിമയില്‍ നിന്ന് ഇടക്കാല പിന്‍‌വാങ്ങല്‍ നടത്തി ഇറ്റലിയില്‍ ഷൂ നിര്‍മ്മാണത്തില്‍ ഏര്‍പ്പെട്ടിരിക്കുകയായിരുന്നുവെന്ന് പറയപ്പെടുന്നു. ഈ സമയത്തുള്ള അദ്ദേഹത്തിന്‍റെ ജീവിതത്തെ കുറിച്ച് ആര്‍ക്കും കാര്യമായ അറിവില്ല. ഓസ്കാര്‍ കൂടാതെ ഗോള്‍ഡന്‍ ഗ്ലോബ്, ബി എ എഫ് ടി എ (ബ്രിട്ടീഷ് അക്കാഡമി ഓഫ് ഫിലിം ആന്‍റ് ടെലിവിഷന്‍ ആര്‍ട്സ്) തുടങ്ങി നിരവധി പുരസ്കാരങ്ങള്‍ ഈ പ്രതിഭയെ തേടിയെത്തിയിട്ടുണ്ട്.

‘വൃദ്ധര്‍ക്കായി ഒരു രാജ്യമില്ല‘

Mon, 25 Feb 2008 15:07:20 +0530

PRO

ലോസാഞ്ചല്‍സിലെ കൊഡാക് തിയറ്ററില്‍ ഞായറാഴ്ചത്തെ മഴയില്‍ കുതിര്‍ന്ന സന്ധ്യയില്‍ ഏറ്റവും കൂടുതല്‍ പരാമര്‍ശിക്കപ്പെട്ട ചിത്രമാണ് ‘നോ കണ്ട്രി ഫോര്‍ ഓള്‍ഡ് മെന്‍’. മികച്ച സംവിധാനം, മികച്ച ചിത്രം, മികച്ച സഹനടന്‍, ബെസ്റ്റ് അഡാപ്റ്റെഡ് സ്ക്രീന്‍ പ്ലേ എന്നീ പുരസ്കാരങ്ങളാണ് ഈ ചിത്രം വാരിക്കൂട്ടിയത്. 1980ല്‍ വെസ്റ്റ് ടെക്സാസില്‍ നടക്കുന്ന മയക്കുമരുന്ന് കള്ളക്കടത്തിനെയും ഇതുമായി ബന്ധപ്പെട്ട് നടക്കുന്ന സംഘര്‍ഷങ്ങളെയും കുറിച്ചാണ് ഈ ചിത്രം സംസാരിക്കുന്നത്.

ജോയല്‍ കോയനേയും എഥാന്‍ കോയനേയും മികച്ച സംവിധായകരാക്കിയ ‘നോ കണ്ട്രി ഫോര്‍ ഓള്‍ഡ് മെന്‍‘ കൊര്‍മാക് മക്കാര്‍ത്തിയുടെ ഇതേ പേരിലുള്ള പ്രശസ്തമായ നോവലിനെ ആധാരമാക്കി എടുത്ത ചിത്രമാണ്. വിധിയുടെ തീരുമാനങ്ങള്‍ നിര്‍ണായമാക്കുന്ന മക്കാര്‍ത്തിയുടെ ആശയം മൂല്യ ശോഷണം സംഭവിക്കാതെ തന്നെ ദൃശ്യവല്‍ക്കരിക്കാന്‍ കഴിഞ്ഞതാ‍ണ് ഈ സംവിധാന ജോഡികളുടെ ഏറ്റവും വലിയ വിജയം.

വെസ്റ്റ് ടെക്സാസിലെ മരുഭൂമിയില്‍ മയക്കുമരുന്ന് വ്യാപാരം നടത്തുന്ന മൂന്ന് പേരുടെ ജീവിതത്തിലെ സംഘര്‍ഷങ്ങളിലൂടെയും സംഘട്ടനങ്ങളിലൂടെയുമാണ് ചിത്രം കടന്നുപോകുന്നത്. 1980ല്‍ നടക്കുന്ന കഥയാണിത്. അമേരിക്കന്‍ പോപ് സംസ്കാരത്തെ വളരെ മനോഹരമായി ആവിഷ്കരിക്കാന്‍ സംവിധായകര്‍ക്ക് കഴിഞ്ഞിട്ടുണ്ട്. വിശാലവും എന്നാല്‍ ഇരുള്‍ നിറഞ്ഞതുമായ അമേരിക്കയിലെ ചില ഭൂപ്രദേശങ്ങളുടെ പശ്ചാത്തലം ചിത്രത്തെയും അത് കൈകാര്യം ചെയ്യുന്ന പ്രമേയത്തെയും കൂടുതല്‍ മികച്ചതാക്കുന്നു.

പല സംഭവങ്ങളിലും മക്കാര്‍ത്തിയുടെ കഥയിലെ സീനുകള്‍ അതേപടി പകര്‍ത്തിയിരിക്കുകയാണ് ചിത്രത്തില്‍. രാത്രിയില്‍ വിജനമായ പാതയോരത്ത് കുറെ ശവശരീരങ്ങള്‍ക്ക് സമീപത്ത് നിന്ന് ലഭിക്കുന്ന 20 ലക്ഷം ഡോളറുമായി കടക്കുന്നയാളെ പിന്തുടരുന്ന വാടകക്കൊലയാളിയുടെ റോള്‍ ഭംഗിയായി കൈകാര്യം ചെയ്ത ജവീര്‍ ബേര്‍ഡമാണ് മികച്ച സഹനടനായി തെരഞ്ഞെടുക്കപ്പെട്ടത്.

ഓസ്കര്‍ ഉയരത്തില്‍ ‘നോ കണ്ട്രി’

Mon, 25 Feb 2008 13:09:53 +0530

PRO

എണ്‍പതാം അക്കാദമി അവാര്‍ഡില്‍ ഏറെ പ്രകീര്‍ത്തിക്കപ്പെട്ട ചിത്രമായി “ നോ കണ്ട്രി ഫോര്‍ ഓള്‍ഡ് മെന്‍”. ഏറ്റവും നല്ല ചിത്രം, സംവിധാന മികവ്, സ്വീകരിക്കപ്പെട്ട ഏറ്റവും നല്ല തിരക്കഥ, മികച്ച സഹനടന്‍ എന്നിങ്ങനെ നാല് മികച്ച നേട്ടങ്ങളാണ് ഇത്തവണത്തെ ഓസ്കറില്‍ ഈ ചിത്രം കൈപ്പിടിയില്‍ ഒതുക്കിയത്.

“ നൊ കണ്ട്രി ഫോര്‍ ഓള്‍ഡ് മെന്‍” എന്ന ചിത്രം സംവിധാനം ചെയ്തത് സാധാരണ അനുഭമായിരുന്നു എന്നാണ് സഹോദരന്‍‌മാരായ ജോയല്‍ കോയനും എഥാം കോയനും അഭിപ്രായപ്പെട്ടത്. കുട്ടിക്കാലം മുതലേ മൂവി ക്യാമറ ഉപയോഗിച്ചു തുടങ്ങിയതിനാല്‍ ഓസ്കര്‍ നേടിയ ചിത്രത്തിന്‍റെ ജോലിയില്‍ പ്രത്യേകതയൊന്നും തോന്നിയിരുന്നില്ല എന്നും പ്രശസ്തരായ സഹോദരന്‍‌മാര്‍ പറഞ്ഞു.

‘വയലന്‍റ് ത്രില്ലര്‍’ എന്ന വിഭാഗത്തില്‍ പെടുത്താവുന്ന ഈ ചിത്രത്തെ മികച്ചതാക്കിയത് കോയന്‍ ‍(ജോയല്‍, എഥാം) സഹോദരന്‍‌മാരുടെ സംവിധാന മികവു തന്നെയാണെന്ന് നിസ്സംശയം പറയാം. മയക്കുമരുന്നിന്‍റെ ലോകത്തെ അവിശുദ്ധ ഉടമ്പടികള്‍ കൊലപാതകങ്ങളില്‍ അവസാനിക്കുന്ന കഥയാണ് “ നൊ കണ്ട്രി ഫോര്‍ ഓള്‍ഡ് മെന്‍” പറയുന്നത്. ഓസ്കര്‍ നോമിനേഷന്‍ ലഭിക്കും മുമ്പ് തന്നെ ഈ ചിത്രം ആസ്വാദകരുടെ കൈയ്യടി നേടിയിരുന്നു.

ഈ ചിത്രത്തില്‍ ലവലേശം ദയയില്ലാത്ത ഒരു കൊലപാതകിയെ അവതരിപ്പിച്ച ജാവിയര്‍ ബാര്‍ഡമിനാണ് മികച്ച സഹനടനുള്ള ഓസ്കര്‍ അവാര്‍ഡ് ലഭിച്ചത്.

അമേരിക്കന്‍ ജീവിതത്തിന്‍റെ നേര്‍ക്കാഴ്ച

Mon, 25 Feb 2008 12:15:18 +0530

PRO

ആദ്യ ഫ്രെയിം മുതല്‍ അവസാ‍ന ഫ്രെയിം വരെ വിസ്മയിപ്പിക്കുന്ന ചലച്ചിത്ര കാവ്യം - അതാണ് നോ കണ്‍‌ട്രി ഫോര്‍ ഓള്‍ഡ് മെന്‍. എമ്പതാം ഓസ്കാര്‍ അവാര്‍ഡ് ചടങ്ങില്‍ മികച്ച ചിത്രത്തിനും മികച്ച സംവിധാനത്തിനും മികച്ച സ്വീകൃത തിരക്കഥയ്ക്കും മികച്ച സഹനടനും അടക്കം നാല് പുരസ്കാരങ്ങള്‍ ഈ ചിത്രം വാരിക്കൂട്ടി.

കോര്‍മാക്ക് മെക് കാര്‍ത്തിയുടെ പുലിസ്റ്റര്‍ അവാര്‍ഡ് നേടിയ നോവലിന്‍റെ ചലച്ചിത്ര ഭാഷ്യമാണ് ഫാര്‍ഗോയോയിലൂടെ തിരക്കഥയുടെ ശക്തിയും ഓജസ്സും തെളിയിച്ച കോയന്‍ സഹോദരന്‍‌മാര്‍ ഇക്കുറി അവതരിപ്പിച്ചത്.

നോവലിന്‍റേ കരുത്ത് ഒട്ടും ചോര്‍ന്നുപോവാതെ കഥാ പാത്രങ്ങളുടെ മികവ് ഒട്ടും കുറയാതെ ഹൃദ്യമായ ചലച്ചിത്ര അനുഭവമാക്കുക എന്നത് ദുഷ്കരമായ പ്രവൃത്തിയാണ്. ഈ അത്ഭുത സഹോദരന്‍‌മാര്‍ അത് സാധിച്ചിരിക്കുന്നു.

സമകാലിക അമേരിക്കന്‍ ജീവിതത്തിന്‍റെ നേര്‍ പകര്‍പ്പാണ് ഈ ചിത്രം. നടുക്കത്തോടെ മാത്രമേ ആര്‍ക്കും അത് കണ്ടിരിക്കാനാവു. ഇങ്ങനെയാണ് നമ്മള്‍ പ്രത്യേകിച്ചും അമേരിക്കക്കാര്‍ ജീവിക്കുന്നത് എന്ന വിഹ്വലമായ ഒരു തിരിച്ചറിവ് ഇത് സമ്മാനിക്കുന്നു.

മൂന്ന് നടന്‍‌മാരുടെ അതുല്യമായ അഭിനയ പാടവമാണ് ഈ സിനിമയുടെ ശക്തി. ടോമി ലീ ജോണ്‍സ്, ജാവിയര്‍ ബാര്‍ഡെം, ജോഷ് ബ്രോലിന്‍ എന്നിവര്‍ മുഴുനീള കഥാപാത്രങ്ങളാണ്. അവര്‍ക്കൊപ്പം വൂഡി ഹാരല്‍‌സണ്‍, കെല്ലി മക് ഡൊണാള്‍ഡ്, ടെസ് ഹാര്‍പ്പര്‍ എന്നിവരും അഭിനയത്തിന്‍റെ സുന്ദര മുഹൂര്‍ത്തങ്ങള്‍ സമ്മാനിക്കുന്നു.

PRO

ദൃശ്യപരമായി ഉദാത്തമായ ഒരു അനുഭവമാണ് നോ കണ്‍‌ട്രി ഫോര്‍ ഓള്‍ഡ് മെന്‍. അതേപോലെ ശബ്ദമികവിലും ഇത് മുന്നില്‍ തന്നെ. ജാവിയര്‍ ബാര്‍ഡം അവതരിപ്പിക്കുന്നത് കരുണയില്ലാത്ത കൊലയാളിയെയാണ്. ചിത്രത്തിന്‍റെ ആദ്യത്തെ രംഗത്തില്‍ തന്നെ പിടിയിലായ ചികുര്‍ എന്ന കൊലയാളി സ്റ്റേഷനില്‍ എത്തിയയുടന്‍ കൈയാമം കൊണ്ട് പൊലീസ് ഓഫീസറെയും കൊന്ന് കാര്‍ തട്ടിയെടുക്കാന്‍ ഡ്രൈവറെയും കൊന്ന് രക്ഷപ്പെടുന്നതാണ്.

ടെക്സാസിലാണ് ചിത്രീകരണം പ്രധാനമായും നടന്നത്. കോയന്‍‌മാരുടെ പതിവ് ഛായാഗ്രാഹകന്‍ റോജര്‍ ഡീക്കിന്‍സ് പ്രകൃതിയുടെ മാത്രമല്ല ഫ്രെയിമുകളുടെയും മനോഹാരിത അപാരമാക്കി. നിശ്ശബ്ദതയുടെ സംഗീതമാണ് പലപ്പോഴും ചിത്രത്തെ വല്ലാത്തൊരു അനുഭവമാക്കുന്നത്. ആദ്യത്തെ ഒരു മണിക്കൂര്‍ ഏതാണ്ട് നിശ്ശബ്ദമാണെന്ന് തന്നെ പറയാം. അല്‍പ്പം ചില സംഭാഷണങ്ങള്‍ ഒഴിച്ചാല്‍.

ടോമി ലീ ജോണ്‍സ് പൊലീസ് ഉദ്യോഗസ്ഥന്‍റെ വേഷമാണ് അഭിനയിക്കുന്നത്. ലെവ്‌ലിന്‍ മോസ് എന്ന മയക്കുമരുന്ന് തലവനെയാണ് ജോഷ് ബ്രോലിന്‍ അവതരിപ്പിക്കുന്നത്.

ചിത്രം പലപ്പോഴും ഇരുണ്ടതാണ്. വളരെയധികം ഭീകരമാണ്. അങ്ങനെ നോവലിനോട് നൂറു ശതമാനം നീതിപുലര്‍ത്താനും കോയന്‍ ബ്രദേഴ്സ് ശ്രമിക്കുകയും ചെയ്തിരിക്കുന്നു.

നോ കണ്‍‌ട്രി ഫോര്‍ ഓള്‍ഡ് മാന്‍ മികച്ച ചിത്രം

Mon, 25 Feb 2008 11:54:18 +0530

PRO

നോ കണ്‍‌ട്രി ഫോര്‍ ഓള്‍ഡ്മാന്‍ മികച്ച സിനിമയ്‌ക്കുള്ള ഓസ്‌കര്‍ അവാര്‍ഡ് നേടി. ഇതിലെ സംവിധായകരായ ജോല്‍കോയന്‍, ഏതന്‍ കോയന്‍ എന്നിവര്‍ക്ക് മികച്ച സംവിധാനത്തിനുള്ള അവാര്‍ഡ് ലഭിച്ചു.

2005ല്‍ പുറത്തിറങ്ങിയ അമേരിക്കന്‍ നോവലിനെ ആസ്‌പദമാക്കിയാണ് ഈ സിനിമ നിര്‍മ്മിച്ചിരിക്കുന്നത്. 1980ല്‍ അമേരിക്കന്‍-മെക്‍സിക്കോ അതിര്‍ത്തിയില്‍ നടക്കുന്ന അനധികൃത മയക്കുമരുന്ന് കടത്തിന്‍റെ കഥയാണ് ഈ സിനിമ പറയുന്നത്.

നോ കണ്‍‌ട്രി ഫോര്‍ ഓള്‍ഡ്മാന്‍ ഓസ്കാര്‍ നോമിനേഷനുകളില്‍ ഏറെ ശ്രദ്ധിക്കപ്പെട്ടിരുന്നു. ഈ ചിത്രത്തിലെ അഭിനയത്തിന് ജാവിയര്‍ ബാര്‍ഡമിന് മികച്ച സഹനടനുള്ള ഓസ്കര്‍ അവാര്‍ഡും ലഭിച്ചു.

PRO

ഇതിന് രണ്ട് ഗോള്‍ഡണ്‍ ഗ്ലോബ് അവാര്‍ഡ് ലഭിച്ചിരുന്നു. ടോമി ലീ ജോണ്‍സ്, ജോഷ് ബ്രോലിന്‍ എന്നിവരാണ് ഇതിലെ അഭിനേതാക്കള്‍. 122 മിനിറ്റുള്ള ഈ സിനിമ നിര്‍മ്മിക്കുന്നതിന് 25 മില്യണ്‍ യു.എസ് ഡോളര്‍ ചെലവായി.

നാടക കരുത്തുള്ള ഡാനിയേല്‍

Mon, 25 Feb 2008 11:44:54 +0530

PRO

ഡാനിയേല്‍ മൈക്കേല്‍ ഡേ ലൂയിസ്. ബ്രിട്ടീഷ്-ഐറിഷ് പൌരത്വമുള്ള ഈ നടന്‍ നാടകാഭിനയ പാഠങ്ങള്‍ നല്‍കിയ കരുത്തില്‍ വെള്ളിത്തിരയിലേക്ക് എത്തിയവനാണ്. വളരെ ചിന്തിച്ച് മാത്രം സിനിമകള്‍ തെരഞ്ഞെടുക്കുന്ന അപൂര്‍വ്വം വ്യക്തികളില്‍ ഒരാള്‍. കഴിഞ്ഞ പത്തു വര്‍ഷത്തിനിടയില്‍ അദ്ദേഹം മൂന്നു സിനിമകളില്‍ മാത്രമേ അഭിനയിച്ചിട്ടുള്ളൂ.

സ്വന്തം കഥാപാത്രം മെച്ചപ്പെടുത്തുവാന്‍ പഠനം നടത്തുന്ന അനുഗൃഹീത നടനാണ് ലൂയിസ്. പ്രശസ്തമായ നിരവധി ഡോക്യുമെന്‍ററികള്‍ നിര്‍മ്മിച്ചിട്ടുള്ള താമസിന്‍ ഡോ ലൂയിസ് ഡാനിയേലിന്‍റെ സഹോദരിയാണ്. അദ്ദേഹത്തെ സഹോദരി വളരെയധികം സ്വാധീനിച്ചിട്ടുണ്ട്. റിച്ചാര്‍ഡ് ആറ്റന്‍ബോറോയുടെ ഗാന്ധിയില്‍ ചെറിയ വേഷം അഭിനയിച്ചിരുന്നു.

1987ല്‍ മിലേന്‍ കുന്ദേരയുടെ നോവലായ ‘ദി അണ്‍ബയറബില്‍ ലൈറ്റന്‍സ് ഓഫ് ബീയിങ്ങ്‘ സിനിമാരൂപത്തിലാക്കിയപ്പോള്‍ ലൂയിസ് ഇതില്‍ പ്രധാനകഥാപാത്രമായ ചെക്ക് ഡോക്‍ടറെ അവതരിപ്പിച്ചു.

ഡാനിയല്‍ ഡെ ലൂയിസ് മികച്ച നടന്‍

Mon, 25 Feb 2008 10:42:29 +0530

ലോകസിനിമയുടെ അത്യുന്നതിയില്‍ ഡാനിയല്‍ ഡെ ലൂയിസിന് ഒരിക്കല്‍ കൂടി സ്ഥാനം ലഭിച്ചു. ഡാനിയല്‍ “ദെയര്‍ വില്‍ ബി ബ്ലഡ്” എന്ന സിനിമയിലെ പ്രകടനത്തിലൂടെ ഓസ്കര്‍ പുരസ്കാരം രണ്ടാം തവണയും കൈപ്പിടിയില്‍ ഒതുക്കി.

ബ്രിട്ടീഷുകാരനായ ഡാനിയല്‍ അവതരിപ്പിച്ച ബുദ്ധിഭ്രമമുള്ള ഒരു എണ്ണ വ്യാപാരിയുടെ വേഷമാണ് അദ്ദേഹത്തിന് വീണ്ടും ഓസ്കര്‍ സമ്മാനിച്ചത്. അസാധ്യം എന്ന് തോന്നുന്ന കഥാപാത്രങ്ങളെ അവതരിപ്പിക്കുന്നതില്‍ ഇദ്ദേഹം എന്നും മിടുക്കുകാട്ടിയിരുന്നു. ഈ കഴിവിനെ സിനിമാലോകം അംഗീകരിക്കുകയും ചെയ്യുന്നു.

“മെ ലെഫ്റ്റ് ഫുട്ട് ; സ്റ്റോറി ഓഫ് ക്രിസ്റ്റി ബ്രൌണ്‍” എന്ന ചിത്രത്തില്‍ ബുദ്ധിക്ക് തകരാര്‍ സംഭവിച്ച കഥാപാത്രത്തെ അവതരിപ്പിച്ചതിനായിരുന്നു ഡെ ലൂയിസ് (50) ആദ്യം ഓസ്കര്‍ നേടിയത്. 1989 ല്‍ ആയിരുന്നു ആദ്യ ഓസ്കര്‍ ലഭിച്ചത്.

"കൌണ്ടര്‍ഫീറ്റേഴ്‌സ്” മികച്ച വിദേശ ചിത്രം

Mon, 25 Feb 2008 10:26:29 +0530

PRO

ഓസ്ട്രിയന്‍ ചിത്രം “ദ കൌണ്ടര്‍ ഫീറ്റേഴ്‌സ് മികച്ച വിദേശ ചിത്രത്തിനുള്ള ഓസ്കര്‍ ബഹുമതി സ്വന്തമാക്കി.

മനുഷ്യക്കുരുതിയുടെ യാഥാര്‍ത്ഥ്യ തലങ്ങളിലേക്ക് ഒരു തിരിവെട്ടം നല്‍കുന്ന സ്റ്റെഫാന്‍ റുറ്റ്സോവിസ്കി സംവിധാനം ചെയ്ത “ദ കൌണ്ടര്‍ ഫീറ്റ്സ്” ഓസ്ട്രിയയ്ക്ക് അഭിമാനമായി. ഈ വിഭാഗത്തില്‍ രാജ്യത്തിന് ആദ്യമായി ലഭിക്കുന്ന അംഗീകാരമാണിത്.

യഥാര്‍ത്ഥ ചരിത്രത്തെ അടിസ്ഥാനമാക്കി നിര്‍മ്മിച്ച ചിത്രം നിരൂപകശ്രദ്ധ പിടിച്ചുപറ്റിയിരുന്നു. നാസി തടങ്കല്‍പാളയങ്ങളില്‍ വിദേശ രാജ്യത്തിനു വേണ്ടി നോട്ടുകള്‍ നിര്‍മ്മിക്കുന്ന തടവുകാരാണ് മുഖ്യ ധാരയില്‍.

PRO

ഈ വ്യാജ നോട്ടുകള്‍ ഉപയോഗിച്ച് ബ്രിട്ടന്‍റെയും അമേരിക്കയുടെയും സാമ്പത്തിക സ്ഥിതിയെ തകര്‍ക്കുകയായിരുന്നു ജര്‍മ്മനിയുടെ ലക്‍ഷ്യം. എന്നാല്‍, തടവുകാര്‍ ഇതിനെ തകര്‍ക്കാനൊരുങ്ങുന്നു.

തിരക്കഥ:കോയെന്‍ സഹോദരന്മാര്‍ക്ക് ഓസ്കാര്‍

Mon, 25 Feb 2008 10:18:53 +0530

PRO

ലോസ് ആഞ്ചലസ്: ജോയെല്‍ എതന്‍ കോയെന്‍ സഹോദരന്മാര്‍ സ്വീകൃത തിരക്കഥക്കുള്ള ഓസ്കാര്‍ നേടി.ഏറെ വിഖ്യാതമായ “നോ കണ്ട്രി ഫോര്‍ ഓല്‍ഡ് മെന്‍” എന്ന സിനിമയുടെ തിരക്കഥക്കാണ് അവാര്‍ഡ്. എഠേ ചിത്രത്തിലെ അഭിഒനയത്തിന് ജാവിയര്‍ ബാര്‍ഡെം മികച്ച സഹ നടനായി.

സ്വന്തം തിരക്കഥയുടെ പേരിലാണ് കോയെന്‍ സഹോദരന്മാര്‍ പ്രസിദ്ധരായത്. ഗ്രീക് ഇതിഹാസമായ ഒഡീസിയെ ആധാരമാക്കി രചിച്ച “ ഓ ബ്രദര്‍ വേര്‍ ആര്‍ട്ട് ദൌ” ,പുലിസ്റ്റര്‍ അവാര്‍ഡ് നേടിയ മക് കാര്‍ത്തിയുടെ ‘ നോ കണ്ട്രി “ എന്നിവയാണ് അഡാപ്റ്റഡ് തിരക്കഥകള്‍.

ഠിരഞ്ഞെടുപ്പില്‍ കാണിച്ച മികവാണ് ഞങ്ങളുടെ നേട്ടത്തിനുകാരണമ്ം . ഹോമറെയും മക് കാര്‍ത്തിയേയും മാത്രമേ ഞ്ങ്ങള്‍ കടം കൊടിട്ടുള്ളൂ- ജോയെല്‍ പറഞ്ഞു.
1996ല്‍ ഫാര്‍ഗോ എന്ന ചിത്രത്തിന്‍റെ തിരക്കര്‍ഥക്ക് എവര്‍ക്ക് ഓസ്കാര്‍ ലഭിച്ചിരുന്നു. എഡിറ്റിങ്ങില്‍ പുരസ്കാരം നഷ്ടപ്പെട്ടതോറ്ടെ ഒരു ചിത്രത്തിനു 4 ഓസ്കാര്‍ എന്ന ബഹുമതി നെടാനുള്ള സാധ്യത ഇല്ലാതായി.

ദി ബൌര്‍നെ അള്‍ട്ടിമറ്റം എന്ന ചിത്രം എഡിറ്റിങ്ങ്, ശബ്ദലേഖനം ശബ്ദ മിശ്രണം എന്നിവക്കുള്ള ഓസ്കാര്‍ നേടി.

ഓസ്‌കാര്‍ തിളക്കത്തില്‍ ബാര്‍ഡം

Mon, 25 Feb 2008 09:47:00 +0530

‘ബിഫോര്‍ നൈറ്റ് ഫാല്‍‌സി‘ലെ അഭിനയത്തിലൂടെയാണ് അദ്ദേഹത്തിന് ആദ്യമായി അന്താരാഷ്‌ട്ര ശ്രദ്ധ ലഭിച്ചത്. കമ്മ്യൂണിസ്റ്റ് ആശയങ്ങളോട് ആഭിമുഖ്യം പുലര്‍ത്തുന്ന ബാര്‍ഡെം ആറാം വയസ്സിലാണ് ആദ്യമായി വെള്ളിത്തിരയിലെത്തിയത്. ‘ദി സൌണ്ട്രലെന്ന‘ സിനിമയിലൂടെ.

ബാര്‍ഡം അഭിനയിച്ച ആദ്യ ഇംഗ്ലീഷ് ഭാഷയിലുള്ള സിനിമ ‘ബിഫോര്‍ നൈറ്റ് ഫോല്‍‌സാണ്‘. 2007 ല്‍ ലാറ്റിനമേരിക്കന്‍ സാഹിത്യകാരനായ ഗ്രബ്രിയേല്‍ ഗാര്‍സിയ മാര്‍ക്വിസിന്‍റെ കോളറകാലത്തെ പ്രണയമെന്ന നോവലിനെ അടിസ്ഥാനമാക്കി നിര്‍മ്മിച്ച സിനിമയില്‍ ബാര്‍ഡം അഭിനയിച്ചിരുന്നു.

2008 ബാര്‍ഡമിനെ സംബന്ധിച്ച് ഭാഗ്യവര്‍ഷമായിരുന്നു. നോ കണ്‍‌ട്രി ഫോര്‍ ഓള്‍ഡ് മാനിലെ അഭിനയം മികച്ച സഹനടനുള്ള ഗോള്‍ഡന്‍ ഗ്ലോബ് അവാര്‍ഡും,ബാഫ്‌ത അവാര്‍ഡും, ബോര്‍ഡ്‌കാസ്റ്റ് ഫിലിം ക്രിറ്റിക്സ് അവാര്‍ഡും നേടി കൊടുത്തു.

മരിയന്‍ കോട്ട്ലാര്‍ഡ്:ഫ്രഞ്ച് വസന്തം

Mon, 25 Feb 2008 09:41:09 +0530

സൌന്ദര്യം കൊണ്ടും അഭിനയം കൊണ്ടും കോടികണക്കിന് ആരാധകരെ നേടിയെടുത്ത ഫ്രഞ്ച് നടിയാണ് മരിയന്‍ കോട്ടി‌ലാര്‍ഡ്.

പിതാവിന്‍റെ നാടകങ്ങളില്‍ അഭിനയിച്ചുകൊണ്ടാണ് അവര്‍ അഭിനയ ജീവിതം തുടങ്ങിയത്. 90 കളിലാണ് മരിയയുടെ സിനിമാ ജീവിതം ആരംഭിക്കുന്നത്. 1998 ല്‍ പുറത്തിറങ്ങിയ ടാക്സി അവര്‍ക്ക് ആരാധക ശ്രദ്ധ നേടി കൊടുത്തു.

ലാ വീ എന്‍ റോസിലെ അഭിനയത്തിന് അവര്‍ക്ക് 2008 ല്‍ ബാഫ്ത അവാര്‍ഡ് ലഭിച്ചിരുന്നു. ഈ പുരസ്‌കാരം നേടുന്ന ആദ്യ ഫ്രഞ്ച് നടിയാണ്. പരിസ്‌ഥി പ്രവര്‍ത്തനങ്ങളില്‍ സജീവമായി പ്രവര്‍ത്തിച്ചു വരുന്നു.

പ്രശസ്ത പരിസ്ഥിതി സംഘടനയായ ഗ്രീന്‍‌പീസിന്‍റെ വക്താവ് കൂടിയാണ്. ലോകപ്രശസ്ത കനേഡിയന്‍ ഗായകന്‍ ഹാവസ്‌കലി വര്‍ക്‍മാനെ അന്ധമായി ആരാധിക്കുന്ന കോട്ട്‌ലാര്‍ഡ് അദ്ദേഹത്തിന്‍റെ രണ്ട് ആല്‍ബങ്ങളില്‍ പ്രത്യക്ഷപ്പെട്ടിട്ടുണ്ട്.

2009 ല്‍ ഈ നടിയുടേതായി രണ്ട് സിനിമകള്‍ പുറത്തിറങ്ങും. ‘ നൈന്‍‘‍, ‘പബ്ലിക് എനിമീസ്‘.

മരിയന്‍ മികച്ച നടി

Mon, 25 Feb 2008 09:37:49 +0530

ഫ്രഞ്ച് താരം മരിയന്‍ കോറ്റിലാര്‍ഡ് മികച്ച നടിക്കുള്ള ഓസ്കര്‍ ബഹുമതി സ്വന്തമാക്കി. “ലാവിയേ എന്‍ റോസ്” എന്ന ചിത്രത്തില്‍ എഡിത്ത് പിയാഫ് എന്ന കഥാപാത്രത്തെ അനശ്വരമാക്കിയതിനാണ് ഈ ബഹുമതി.

ഈ ചിത്രത്തിന് മികച്ച ‘മേക്ക്-അപ്’ന് ഉള്ള ഓസ്കര്‍ ബഹുമതിയും ലഭിച്ചിട്ടുണ്ട്.

കോയന്‍ സഹോദരന്‍‌മാരുടെ “നോ കണ്ട്രി ഫോര്‍ ഓള്‍ഡ് മെന്‍” എന്ന ചിത്രവും രണ്ട് ഓസ്കര്‍ കരസ്ഥമാക്കി- സഹനടന്‍, സ്വീകരിച്ച തിരക്കഥ.

“മെക്കല്‍ ക്ലേടണി”ല്‍ ദയായില്ലാത്ത ഒരു അഭിഭാഷകയുടെ വേഷത്തില്‍ എത്തിയ ബ്രിട്ടീഷ് താരം ടില്‍ഡാ സ്വിന്‍റണ്‍ മികച്ച സഹനടിക്കുള്ള അവാര്‍ഡ് സ്വന്തമാക്കി.

ബാര്‍ഡം മികച്ച സഹനടന്‍

Mon, 25 Feb 2008 09:35:12 +0530

ജാവിയര്‍ ബാര്‍ഡമിനും റ്ടില്‍‌ഡാസ്വിന്‍റനും മികച്ച സഹനടനും നടിക്കുമുള്ള ഓസ്കര്‍ ലഭിച്ചു.

“നോ കണ്ട്രി ഫോര്‍ ഓള്‍ഡ് മെന്‍” എന്ന ചിത്രത്തില്‍ വതരിപ്പിച്ച നിഷ്ഠൂരനായ പരമ്പര കൊലപാതകിയുടെ വേഷമാണ് ബാര്‍ഡത്തെ ഉയരങ്ങളില്‍ എത്തിച്ചത്.

ബ്രിട്ടീഷ് നടി ടില്‍ഡാ സ്വിന്‍റനാണ് മികച്ച സഹനടിക്കുള്ള ഓസ്കര്‍ കരസ്ഥമാക്കിയത്. “മൈക്കല്‍ ക്ലേടണ്‍” എന്ന ചിത്രത്തിലെ എക്സിക്യൂട്ടീവിന്‍റെ വേഷമാണ് ഇവരെ സിനിമയുടെ മികച്ച അംഗീകാരം നേടാന്‍ അര്‍ഹയാക്കിയത്.

ഒരു എലിയുടെ കഥ പറയുന്ന “റാറ്റാറ്റൊയ്‌ലി” എന്ന പ്രേക്ഷകാംഗീകാരം നേടിയ ചിത്രം ഏറ്റവും മികച്ച അനിമേഷന്‍ സിനിമയ്ക്കുള്ള ഓസ്കാര്‍ സ്വന്തമാക്കി. ഹൃദയഹാരിയായ ദൃശ്യ അനുഭവങ്ങള്‍ നല്‍കിയ “ ഗോള്‍ഡന്‍ കോമ്പസ്” മികച്ച ദൃശ്യാനുഭവത്തിനുള്ള (വിഷ്വല്‍ ഇഫക്ട്) അവാര്‍ഡും “സ്വീനി ടോഡ്” കലാസംവിധാനത്തിനുള്ള ഓസ്കറും സ്വന്തമാക്കി.

“നോ കണ്ട്രി ഫോര്‍ ഓള്‍ഡ് മെന്‍” എന്ന ചിത്രമാണ് ഏറ്റവും കൂടുതല്‍ നിരൂപക ശ്രദ്ധ പിടിച്ചു പറ്റിയത്. ഇത് മികച്ച ചിത്രത്തിനുള്ള അവാര്‍ഡ് സ്വന്തമാക്കുമെന്നാണ് വിലയിരുത്തുന്നത്.

ഓസ്കാര്‍ മികച്ച നടിക്കുവേണ്ടി ശക്തമായ പോരാട്ടം

Sun, 24 Feb 2008 19:36:46 +0530

ലോക സിനിമയിലെ മികച്ച നടിയെ തെരഞ്ഞെടുക്കാന്‍ ശക്തമായ മത്സരമാണ് നടന്നത്. നാമനിര്‍ദ്ദേശം ലഭിച്ചിരുന്ന എലെന്‍ പേജ്, കെയ്റ്റ് ബ്ലാന്‍‌ചെറ്റ്, ജൂലി ക്രിസ്റ്റി, ലോറ ലിന്നി, മരിയന്‍ കോറ്റിലാര്‍ഡ് എന്നിവര്‍ എല്ലാവരും മികച്ച പ്രകടനത്തിലൂടെ മുന്നിലെത്തിയവരാണ്.

എങ്കിലും ‘എവേ ഫ്രം ഹേര്‍’ എന്ന ചിത്രത്തിലെ നായിക ജൂലി ക്രിസ്റ്റിയും ഫ്രഞ്ച്‌ ചിത്രമായ ‘ലാ വൈ എന്‍ റോസി’ലെ നായിക മാരിയന്‍ കോറ്റിലാര്‍ഡുമാണ് പട്ടികയുടെ മുന്‍‌നിരയില്‍ ഇടം പിടിച്ചിരിക്കുന്നത്‌.

എവേ ഫ്രം ഹേര്‍ എന്ന ചിത്രത്തില്‍ അല്‍‌ഷിമേഴ്സ് രോഗം ബാധിച്ച സ്ത്രീയുടെ കഥാപാത്രത്തിലൂടെ നടത്തിയ പ്രകടനമാണ് ക്രിസ്റ്റിയെ ഓസ്കാര്‍ നാമനിര്‍ദ്ദേശത്തിന് അര്‍ഹയാക്കിയത്. ഇതേ കഥാപാത്രത്തിനു തന്നെ ക്രിസ്റ്റിക്ക് ഈ വര്‍ഷത്തെ ഗോള്‍ഡന്‍ ഗ്ലോബ് പുരസ്കാരവും ലഭിച്ചിരുന്നു. 66കാരിയായ ക്രിസ്റ്റിയ്ക്ക് 1966ല്‍ മികച്ച നടിക്കുള്ള ഓസ്കാര്‍ ലഭിച്ചിരുന്നു. കൂടാതെ രണ്ട് തവണകൂടെ നാമനിര്‍ദ്ദേശം ലഭിച്ചിട്ടുമുണ്ട്.

‘ലാ വെ എന്‍ റോസ്’ എന്ന ഫ്രഞ്ച് ചിത്രത്തില്‍ ഇതിഹാസ ഗായികയായ എഡിത്ത് പിയാഫിനെ അവതരിപ്പിച്ചാണ് മരിയന്‍ കോറ്റിലാര്‍ഡ് ഓസ്കാര്‍ നാമനിര്‍ദ്ദേശ പട്ടികയിലെത്തിയത്. ഗോള്‍ഡന്‍ ഗ്ലോബ് പുരസ്കാരം ലഭിച്ചിട്ടുള്ള കോറ്റിലാര്‍ഡിന്‍റെ ആദ്യ ഓസ്കാര്‍ നാമനിര്‍ദ്ദേശമാണിത്. ‘എലിസബത്ത്: ദി ഗോള്‍ഡന്‍ ഏജി’ലെ നായിക ബ്ലാന്‍‌‌ചെറ്റ് ആണ് സാധ്യതാ പട്ടിയില്‍ ഇടം‌പിടിച്ചിട്ടുള്ള മറ്റൊരു നടി. ഇത്തവണ രണ്ട് ഓസ്കാര്‍ നാമനിര്‍ദ്ദേശങ്ങളാണ് ഈ നടിക്ക് ലഭിച്ചിരിക്കുന്നത്.

മികച്ച നടിക്കുള്ളത് കൂടാതെ ‘ഐ ആം നോട്ട് ദേര്‍’ എന്ന ചിത്രത്തിലെ പ്രകടനത്തിന് മികച്ച സഹ നടിക്കുള്ള മത്സരത്തിലും ബ്ലാന്‍‌ചെറ്റിന് നാമനിര്‍ദ്ദേശം ലഭിച്ചിട്ടുണ്ട്. 2005ല്‍ ഏവിയേറ്ററിലെ അഭിനയത്തിന് ബ്ലാന്‍‌ചെറ്റിന് മികച്ച സഹ നടിക്കുള്ള പുരസ്കാരം ലഭിച്ചിരുന്നു. കൂടാതെ രണ്ട് തവണ ഓസ്കാര്‍ നാമനിര്‍ദ്ദേശവും ലഭിച്ചിട്ടുണ്ട്.

ഇവരെ കൂടാതെ ‘ജുനോ’ എന്ന ചിത്രത്തില്‍ ഗര്‍ഭിണിയായ പതിനാറുകാരിയുടെ വേഷം കൈകാര്യം ചെയ്ത എലന്‍ പേജ്, ‘ദി സാവേജസി’ല്‍ അച്ഛനെ ശുശ്രൂഷിച്ച് കഴിയാന്‍ കൊതിക്കുന്ന മകളുടെ വേഷത്തിലെത്തുന്ന ലോറ ലിന്നി എന്നിവരും മികച്ച അഭിനയമാണ് കാഴ്ചവച്ചിരിക്കുന്നത്.

ഗോണ്‍ ബേബി ഗോണ്‍ ഭാഗ്യം കൊണ്ടു വരുമോ?

Sun, 24 Feb 2008 19:34:55 +0530

മികച്ച സഹനടിക്കുള്ള ഒസ്കാര്‍ നാമനിര്‍ദ്ദേശം ലഭിച്ച അമി റ്യാന്‍ ആഹ്ലാദത്തിലാണ്. ആദ്യമായാണ് ഈ ഭാഗ്യം തനിക്ക് ലഭിച്ചതെന്ന് അമി പറഞ്ഞു.

ഗോണ്‍ ബേബി ഗോണ്‍ എന്ന ചിത്രത്തിനാണ് അമിക്ക് നാമനിര്‍ദ്ദേശം ലഭിച്ചത്.ഭര്‍ത്താവില്ലാത്ത സ്ത്രീയായാണ് അമി അഭിനയിക്കുന്നത്. ഇവരുടെ നാല് വയസുള്ള മകളെ കാണാതാകുന്നു.

കുട്ടിയെ കാണാതാകുന്നതോടെ അമ്മാവനും അമ്മായിയും പൊലീസിനെ സഹായിക്കാന്‍ സ്വകാര്യ ഡിക്ടറ്റീവുമാരെ നിയമിക്കുന്നു.അന്വേഷണം പ്രദേശത്തെ മയക്ക് മരുന്ന് വ്യാപാരിയിലേക്ക് നീങ്ങുന്നു. അന്വേഷണം പുരോഗമിക്കുന്നതോടെ അസുഖകരമായ യാഥാര്‍ത്ഥ്യങ്ങള്‍ വെളിവാകുന്നു.

ജൂലി ക്രിസ്റ്റിക്ക് ഒരിക്കല്‍ കൂടി അംഗീകാരം

Sun, 24 Feb 2008 19:33:36 +0530

‘എവേ ഫ്രം ഹേര്‍’ എന്ന ചിത്രത്തില്‍ സ്മൃതിനാശം സംഭവിച്ച രോഗിയുടെ ചലനങ്ങള്‍ വളരെ മനോഹരമായി കൈകാര്യം ചെയ്താണ് ജൂലി ക്രിസ്റ്റി ഒരിക്കല്‍ കൂടി ലോക സിനിമയുടെ നെറുകയിലെത്തിയത്.

അറുപതുകളില്‍ ഹോളിവുഡ് സിനിമയില്‍ നിറഞ്ഞു നിന്നിരുന്ന ഈ അറുപത്താറുകാരിക്ക് ഇത് രണ്ടാം തവണയാണ് മികച്ച നടിക്കുള്ള ഓസ്കാര്‍ ലഭിക്കുന്നത്. അംഗീകാരം തേടിയെത്താന്‍ അല്‍‌പം വൈകിയെങ്കിലും പ്രായം പ്രതിഭയെ തളര്‍ത്തുന്നില്ലെന്ന സന്ദേശമാണ് ക്രിസ്റ്റി നമുക്ക് നല്‍കുന്നത്.

നാല് ദശാ‍ബ്ദങ്ങള്‍ക്ക് മുമ്പാണ് ജൂലി ക്രിസ്റ്റിക്ക് ആദ്യ ഓസ്കാര്‍ ലഭിക്കുന്നത്. ‘ഡോക്ടര്‍ ഷിവാഗോ’ എന്ന ചിത്രത്തിലെ അഭിനയമാണ് അന്ന് ക്രിസ്റ്റിയെ ഓസ്കാറിന് അര്‍ഹയാക്കിയത്. അടുത്തയിടെ തന്നേക്കാള്‍ പകുതിയില്‍ താഴെ മാത്രം പ്രായമുള്ള പത്രപ്രവര്‍ത്തകനെ വിവാഹം കഴിച്ച ക്രിസ്റ്റിയുടെ, ഒരുപക്ഷെ, അവസാന കഥാപാത്രമായിരിക്കും

‘എവേ ഫ്രം ഹേറി’ലെ അല്‍‌ഷിമേഴ്സ് രോഗി. ബ്രിട്ടനിലെ ഏറ്റവും ഗ്ലാമറസും ബുദ്ധിമതിയുമായ നടിയായി അറിയപ്പെടുന്ന ക്രിസ്റ്റി എവേ ഫ്രം ഹേര്‍ എന്ന ചിത്രത്തോടെ അഭിനയം നിര്‍ത്തുകയാണെന്ന് അടുത്തയിടെ സൂചന നല്‍കിയിരുന്നു.

ഫാര്‍ ഫ്രം മാഡിങ്ങ് ക്രൌഡ് (1967), ഡാര്‍‌ലിംങ് (1965), ഹീറ്റ് ആന്‍റ് ഡസ്റ്റ് (1983) എന്നീ ചിത്രങ്ങളില്‍ ശ്രദ്ധേയമായ പ്രകടനം കാഴ്ചവച്ചിട്ടുള്ള ക്രിസ്റ്റി അറുപതുകളില്‍ ബ്രിട്ടീഷ് സിനിമയിലെ ഐക്കണ്‍ ആയാണ് അറിയപ്പെട്ടിരുന്നത്.

ഒരുകാലത്ത് ലോകത്ത് ഏറ്റവും കൂടുതല്‍ ഫോട്ടോകള്‍ എടുക്കപ്പെട്ട നടി കൂടിയാണ് ക്രിസ്റ്റി. പിന്നീട് മനുഷ്യാവകാശ പ്രവര്‍ത്തനങ്ങളുടെയും പരിസ്ഥിതി പ്രസ്ഥാനങ്ങളുടെയും ശക്തമായ വക്താവായി മാറി ക്രിസ്റ്റി.

‘എവേ ഫ്രം ഹേറി’ലെ അഭിനയത്തിന് ഈ വര്‍ഷത്തെ ഗോള്‍ഡന്‍ ഗ്ലോബ് പുരസ്കാരവും ക്രിസ്റ്റിയ്ക്ക് ലഭിച്ചിരുന്നു. ക്രിസ്റ്റിക്ക് മുമ്പ് മൂന്ന് തവണ ഓസ്കാര്‍ നാമനിര്‍ദ്ദേശം ലഭിച്ചിട്ടുണ്ട്.

കനേഡിയന്‍ നടികൂടിയായ സാറാ പോളിയാണ് ചിത്രത്തിന്‍റെ സംവിധാനം നിര്‍വഹിച്ചിരിക്കുന്നത്‍. ആലിസ് മണ്‍‌റോയുടെ “ദി ബിയര്‍ കേം ഓവര്‍ ദി മൌണ്ടന്‍“ എന്ന ചെറുകഥയെ ആസ്പദമാക്കിയുള്ളതാണ് ചിത്രം.

കേറ്റ് ബ്ലന്‍ഷെറ്റ് മികച്ച സഹനടിയാകുമോ?

Sun, 24 Feb 2008 19:32:46 +0530

ഇപ്രാവശ്യത്തെ ഒസ്കാര്‍ അവാര്‍ഡിന് നാമനിര്‍ദ്ദേശം ചെയ്യപ്പെട്ട സഹനടിമാരില്‍ ഒരാള്‍ കേറ്റ് ബ്ലന്‍ഷെറ്റ് ആണ്.‘ അയാം നോട്ട് ഹിയര്‍ ’ എന്ന സിനിമയിലെ അഭിനയത്തിനാണ് ഇവര്‍ക്ക് ഒസ്കാര്‍ നാമ നിര്‍ദ്ദേശം ലഭിച്ചത്.

പുത്തന്‍ സംഗീത ശൈലികള്‍ അവിഷ്കരിക്കുന്ന ജൂഡ് എന്ന കഥാപാത്രത്തെ ആണ് ഇവര്‍ കേറ്റ് സിനിമയില്‍ അവതരിപ്പിക്കുന്നത്.ഈ ശൈലി കാരണം ഇംഗ്ലണ്ട് പര്യടനത്തില്‍ അവരുടെ പഴയ ആരാധകര്‍ക്കെല്ലാം അകല്‍ച്ച തോന്നുന്നു.

സഹനടിക്ക് പുറമെ ഏറ്റവും മികച്ച നടിക്കുള്ള നാമനിര്‍ദ്ദേശവും അവര്‍ക്ക് ലഭിച്ചിട്ടുണ്ട്.‘എലിസബത്ത്: ദി ഗോള്‍ഡന്‍ ഏജ്’ എന്ന സിനിമയിലെ അഭിനയത്തിനാണ് അവര്‍ക്ക് നാമനിര്‍ദ്ദേശം ലഭിച്ചത്.

നേരത്തേ, 2006, 2004, 1998 വര്‍ഷങ്ങളില്‍ മികച്ച സഹനടിക്കുള്ള ഒസ്കാര്‍ നാമനിര്‍ദ്ദേശം ലഭിച്ചിട്ടുണ്ട്.

ആഹ്ലാദത്തോടെ റൂബി

Sun, 24 Feb 2008 19:31:26 +0530

ആദ്യമായി മികച്ച സഹനടിക്കുള്ള ഒസ്കാര്‍ നാമനിര്‍ദ്ദേശം ലഭിച്ച റൂബി ഡീ അത്യധികം ആഹ്ലാദത്തിലാണ്.‘അമേരിക്കന്‍ ഗംഗ്സ്റ്റര്‍’ എന്ന ചിത്രത്തിലെ അഭിനയത്തിനാണ് ഇവരെ നാമനിര്‍ദ്ദേശം ചെയ്തിരിക്കുന്നത്.

മാമ ലൂകാസ് എന്നാണ് സിനിമയിലെ റുബിയുടെ കഥാപാത്രത്തിന്‍റെ പേര്. പാവപ്പെട്ട സ്ത്രീയായ ഇവരുടെ മകന്‍ മയക്ക് മരുന്ന് കടത്തിലൂടെ പണക്കാരനായി മാറുന്നു.

തായ്‌ലന്‍ഡില്‍ നിന്ന് മയക്ക് മരുന്ന് ന്യൂയോര്‍ക്കില്‍ എത്തിക്കുന്ന പണിയാണ് ഇയാള്‍ ചെയ്യുന്നത്. അഴിമതിക്കാരായ പൊലീസ് ഉദ്യോഗസ്ഥരുടെ സഹായത്താല്‍ റൂബിയുടെ മകന്‍ സമ്പന്നന്നായി മാറുന്നു.എന്നാല്‍, സത്യസന്ധനായ പൊലീസ് ഉദ്യോഗസ്ഥന്‍ റിച്ചി റോബര്‍ട്സ് ലുകാസിനെയും സഹപ്രവര്‍ത്തകരെയും പിന്തുടരുന്നു.

ആദ്യ ഒസ്കാര്‍ തേടി സവോറിസ്

Sun, 24 Feb 2008 19:30:37 +0530

ഇത്തവണത്തെ സഹനടിക്കുളള ഒസ്കാര്‍ അവാര്‍ഡ് പ്രഖ്യാപനം നടക്കുമ്പോള്‍ പ്രതീക്ഷയോടെ ഉറ്റ് നോക്കുകയാണ് സവോറിസ് റൊനന്‍.‘ അറ്റോണ്മെന്‍റ് ’ എന്ന ചിത്രത്തിലെ അഭിനയത്തിനാണ് റൊനനെ ഒസ്കാറിനായി നാമനിര്‍ദ്ദേശം ചെയ്തിരിക്കുന്നത്.

ആദ്യമായാണ് സവോറിസിന് ഒസ്കാര്‍ നാമനിര്‍ദ്ദേശം ലഭിക്കുന്നത്.

സാഹിത്യ രചനയില്‍ വലിയ സ്വപ്നങ്ങള്‍ ഉള്ള ബ്രയോണി ടാലിസ് എന്ന കഥാപാത്രത്തെ ആണ് റൊനന്‍ അവതരിപ്പിച്ചിരിക്കുന്നത്.തന്‍റെ സഹോദരിയുടെ ചെയ്തികളില്‍ സംശയാലുവായ ബ്രയോണിക്ക് ജീവിതത്തില്‍ ധാരാ‍ളം ദുരന്തങ്ങള്‍ ഉണ്ടാകുന്നു.

1935ലെ വേനല്‍ക്കാലത്ത് ഒരു ദിവസം ഉണ്ടാകുന്ന സംഭവങ്ങളും അതിന്‍റെ ദുര്‍വ്യാഖ്യാനങ്ങളും സഹോദരിമാരായ ബ്രയോണി, സെസിലിയ, വീട്ട് ജോലിക്കാരിയുടെ പുത്രന്‍ റോബി എന്നിവരുടെ ജീവിതത്തില്‍ ഉണ്ടാക്കുന്ന മാറ്റങ്ങളാണ് ചിത്രത്തിന്‍റെ ഇതിവൃത്തം.

മൈക്കല്‍ ക്ലേറ്റണുമായി ടില്‍ഡ

Sun, 24 Feb 2008 19:29:17 +0530

ഇത്തവണത്തെ ഒസ്കാര്‍ പ്രഖ്യാപിക്കുമ്പോള്‍ സഹനടിക്കുള്ള അവാര്‍ഡ് തന്നെ തേടി വരുമെന്ന പ്രതീക്ഷയിലാണ് ടില്‍ഡ സ്വിന്‍റ്റണ്‍. ‘മൈക്കല്‍ ക്ലേറ്റണ്‍’ എന്ന സിനിമയിലെ അഭിനയത്തിനാണ് ടില്‍ഡയ്ക്ക് സഹനടിക്കുള്ള നാമനിര്‍ദ്ദേശം ലഭിച്ചത്.

അദ്യമാ‍യാണ് ടില്‍ഡയ്ക്ക് ഒസ്കാര്‍ നാമനിര്‍ദ്ദേശം ലഭിക്കുന്നത്. അല്പം പോലും ദയയില്ലാത്ത കരന്‍ ക്രൌഡര്‍ എന്ന കഥാപാത്രത്തെ ആണ് ടില്‍ഡ സിനിമയില്‍ അവതരിപ്പിച്ചത്.

ഒരു കോര്‍പ്പൊറേറ്റ് നിയമസ്ഥാപനത്തിലെ ഉന്നത അറ്റോര്‍ണിക്ക് തെറ്റ് പറ്റുമ്പോള്‍ അത് നേരത്തേ പദ്ധതിയിട്ട ഒരു ലയനത്തിന് ഭീഷണി സൃഷ്ടിക്കുന്നു. തുടര്‍ന്ന് മൈകല്‍ ക്ലേറ്റണ്‍ എന്ന ആള്‍ സാഹചര്യം ഏറ്റെടുക്കുന്നു.

മികച്ച നടനുള്ള ഓസ്‌കാര്‍

Sun, 24 Feb 2008 19:22:24 +0530

FILE

1 ക്ലൂനിയെന്ന സര്‍വകലാവല്ലഭന്‍!

ജോര്‍ജ് തിമോത്തി ക്ലൂനി. കച്ചവട സിനിമയിലൂടെയും ആര്‍ട്ട് സിനിമകളിലൂടെയും ആത്മാവിഷ്‌കാര പ്രകടനങ്ങള്‍ നടത്തുന്ന നടന്‍;

അമേരിക്കക്കാരനായ ഈ നടന്‍ നിരവധി കച്ചവട സിനിമകള്‍ നിര്‍മ്മിക്കുകയും സംവിധാനം ചെയ്യുകയും ചെയ്തിട്ടുണ്ട്.

അതു പോലെ അദ്ദേഹം രാഷ്‌ട്രീയ, സാമൂഹിക സിനിമകളുടെ സംവിധായകനും നിര്‍മ്മാതാവുകയും ചെയ്തിട്ടുണ്ട്. ഇതിനു പുറമെ നിരവധി ശ്രദ്ധേയ ചിത്രങ്ങള്‍ക്ക് 46 വയസ്സുള്ള അദ്ദേഹം തിരക്കഥയെഴുതിയിട്ടുണ്ട്.

ലോകം ഇപ്പോള്‍ ശ്വാസം അടക്കി കാത്തിരിക്കുകയാണ്. ‘മൈക്കേല്‍ ക്ലെയ്ടണി‘ലെ അഭിനയത്തിന് അദ്ദേഹത്തെ ഓസ്‌കാര്‍ ദൈവം കടാക്ഷിക്കുമോയെന്ന്.

വാഹനപകടത്തില്‍ പരിക്കേറ്റപ്പോള്‍ അദ്ദേഹത്തിന്‍റെ സിനിമാ ജീവിതം അവസാനിക്കുമെന്ന് പലരും കരുതി. എന്നാല്‍, അദ്ദേഹം ഉയര്‍ത്തെഴുന്നേറ്റു. യു.എന്‍ സമാധാനദൌത്യ പ്രതിനിധിയായി അദ്ദേഹത്തെ തെരഞ്ഞെടുത്തിട്ടുണ്ട്.

2 ലൂയിസിന്‍റെ നാടക കരുത്ത്

നാടകാനുഭവത്തിന്‍റെ മൂശയില്‍ തെളിഞ്ഞവനാണ് ഡാനിയല്‍ ലേ ലൂയിസെന്ന ബ്രിട്ടീഷ് നടന്‍. ചപ്പു ചവറ് സിനിമകളില്‍ അഭിനയിക്കുവാന്‍ അദ്ദേഹം ആഗ്രഹിക്കുന്നില്ല. വളരെ ആലോചിച്ചതിനു ശേഷമേ ലൂയിസ് വേഷങ്ങള്‍ തെരഞ്ഞെടുക്കാറുള്ളൂ.

റിച്ചാര്‍ഡ് ആറ്റന്‍ ബോയുടെ ഗാന്ധിയിയില്‍ ചെറിയ വേഷം അഭിനയിച്ചിട്ടുണ്ട്. ‘ദേര്‍ വില്‍ ബി ബ്ലഡി‘ലെ അഭിനയത്തിനാണ് ലീയിസിനെ ഓസ്‌കാര്‍ അവാര്‍ഡിന് നാമനിര്‍ദേശം ചെയ്തിരിക്കുന്നത്. ഇതിലെ അഭിനയത്തിന് ലൂയിസിന് മികച്ച നടനുള്ള ഗോള്‍ഡന്‍ ഗ്ലോബ് അവാര്‍ഡ് ലഭിച്ചിരുന്നു.

ബ്രിട്ടീഷ് ഫുട്‌ബോള്‍ ക്ലബായ മില്‍വാല്ലിന്‍റെ കടുത്ത ആരാധകനായ ലീയിസ് തന്‍റെ വ്യക്തി ജീവിതത്തെക്കുറിച്ച് വളരെക്കുറച്ചേ തുറന്ന് പറയാറുള്ളൂ.

3 ടോമി 61 !

61 വയസ്സുക്കാരന്‍റെ കിതപ്പൊന്നും ടോമി ലീ ജോണ്‍സന്‍റെ അഭിനയത്തില്‍ നിങ്ങള്‍ക്ക് അനുഭവപ്പെടുകയില്ല. 1970 ലവ് സ്‌റ്റോറിയെന്ന സിനിമയിലാണ് അദ്ദേഹം അരങ്ങേറ്റം നടത്തിയത്.

FILE

‘ഇന്‍ ദ വാലി ഓഫ് എല്‍ഗി‘ലെ അഭിനയത്തിനാണ് അദ്ദേഹത്തെ മികച്ച നടനുള്ള അവാര്‍ഡിനായി നാമ നിര്‍ദേശം ചെയ്തിട്ടുള്ളത്. പ്രശസ്‌ത ജപ്പാന്‍ മദ്യ കമ്പനിയായ സണ്‍‌തൂറിയുടെ വക്താവ് കൂടിയാണ്.

90 കളില്‍ പുറത്തിറങ്ങിയ ‘ദി ഫിഗേറ്റീവ്‘, ബാറ്റ്സ്‌മാന്‍ ഫോര്‍വെര്‍,മെന്‍ ഇന്‍ ബ്ലേക്ക് തുടങ്ങിയ സിനിമകള്‍ അദ്ദേഹത്തെ ഹോളിവുഡിലെ വില പിടിപ്പുള്ള നടനാക്കി മാറ്റി.

4 ‘അരാഗോന്‍‘ നേടുമോ?

ടോല്‍കിയുടെ കഥയെ ആസ്‌പദമാക്കിയാണ് പീറ്റര്‍ ജാക്‍സന്‍ ‘ലോര്‍ഡ് ഓഫ് റിംഗ്സ് ‘ സിനിമാ പരമ്പരകള്‍ സംവിധാനം ചെയ്തത്. അതിലെ സാങ്കല്‍പ്പിക കഥാപാത്രമായ അരാഗോനിനെ അനശ്വരമാക്കിയത് വിഗോ മോര്‍ട്ടേന്‍സനായിരുന്നു.

FILE

49 വയസ്സുള്ള അമേരിക്കക്കാരനായ വീഗോ നടന്‍, കവി, ഫോട്ടോഗ്രാഫര്‍ തുടങ്ങിയ മേഖലകളില്‍ അദ്ദേഹം മുദ്ര പതിപ്പിച്ചിട്ടുണ്ട്. ‘ഈസ്‌റ്റേണ്‍ പ്രോമിസസി‘ലെ അഭിനയത്തിനാണ് വീഗോയ്‌ക്ക് ഓസ്‌കാര്‍ നാമനിര്‍ദേശം ലഭിച്ചിരിക്കുന്നത്

മോര്‍ട്ടേന്‍സന്‍ അഭിനയിച്ച ആദ്യത്തെ രണ്ട് സിനിമകളാണ് ‘സ്വിംഗ് ഷിഫ്റ്റും‘ ദി പര്‍പ്പിള്‍ റോസ് ഓഫ് കെയ്‌റോയും എന്നാല്‍, ദൌര്‍ഭാഗ്യവശാല്‍ അദ്ദേഹത്തിന്‍റെ അഭിനയഭാഗങ്ങള്‍ ഇവയില്‍ നിന്ന് നീക്കം ചെയ്തു.

പോരാട്ടരംഗങ്ങളില്‍ മികച്ച പ്രകടനം കാഴ്‌ചവെക്കുന്നവനാണ് വീഗോ. അതു കൊണ്ടാണ് ലോര്‍ഡ് ഓഫ് റിംഗ്സിലെ വാള്‍ പയറ്റ് രംഗങ്ങള്‍ പരിശീലിപ്പിച്ചിരുന്ന ബോംബ് ആന്‍ഡേഴ്‌സന്‍ തനിക്ക് ലഭിച്ച ഏറ്റവും മികച്ച ശിഷ്യനാണ് വീഗോയെന്ന് പറഞ്ഞത്.

ഓസ്കാര്‍ അവാര്‍ഡിന് 80

Sun, 24 Feb 2008 18:02:29 +0530

ഹോളിവുഡ്: അവാര്‍ഡുകളുടെ അവാര്‍ഡാണ് ഓസ്കാര്‍. ഹോളിവുഡിലെ നടീനടന്മാരും സാങ്കേതിക വിദഗ്ധരും ഓസ്കാര്‍ അവരുടെ പരമമായ ലക്ഷ്യമായി കാണുന്നു. ഓസ്കാര്‍ അവാര്‍ഡുകളെ സംബന്ധിച്ച് ഏറ്റവും പ്രധാനപ്പെട്ട ദിവസമാണ് മെയ് 16.

ലോക സിനിമയുടെ തലസ്ഥാനമായ ഹോളിവുഡില്‍ ഓസ്കാര്‍ അവാര്‍ഡ് ആദ്യമായി വിതരണം ചെയ്ത ദിവസമാണ് മെയ് 16. 1929ലായിരുന്നു അത്. 2008 മെയ് 16ന് ഓസ്കാര്‍ വിതരണത്തിന്‍റെ ചരിത്രത്തിന് 2008 ല്‍ 80 വയസ്സ് തികയുന്നു. ലൂയി ദ മേയര്‍ ആണ് അക്കാദമി ഓഫ് മോഷന്‍ പിക്ചര്‍ ആന്‍റ് സയന്‍സ് എന്ന ആശയത്തിന് പിന്നില്‍ പ്രവര്‍ത്തിച്ചത്.

ജര്‍മ്മന്‍ നടനായ എമില്‍ ജാനിംഗ്സ് ആയിരുന്നു ഏറ്റവും മികച്ച നടനുള്ള ആദ്യത്തെ ഓസ്കാര്‍ നേടിയത്. മികച്ച നടിക്കുള്ള ഓസ്കാര്‍ പുരസ്കാരം ജാനറ്റ് ഹേയ്നര്‍ കരസ്ഥമാക്കി.

മികച്ച സംവിധായകനുള്ള പുരസ്കാരം രണ്ടു പേര്‍ പങ്കിട്ടു. ഫ്രാങ്ക് ബോര്‍ഡേജും, ജൂം ലൂയി മൈല്‍സ്റ്റോണും ആയിരുന്നു അവര്‍. മികച്ച തിരക്കഥാകൃത്തിനുള്ള പ്രഥമ ഓസ്കാര്‍ ബെന്‍ ഹെക്ടിനായിരുന്നു.

ഓസ്കാര്‍ എന്ന് അക്കാദമി അവാര്‍ഡുകള്‍ക്ക് പേര് ലഭിച്ചത്1931ലാണ്. ഓസ്കാര്‍ അവാര്‍ഡ് ശില്പത്തിന് ഓസ്കാര്‍ പിയേഴ്സ് എന്നയാളുടെ ഛായയുള്ളതുകൊണ്ടാണ് ആ പേര് വീണത്.
2008ഫെബ്രുവരി 24 നു നടക്കുന്നത് എണ്‍പതാം ഓസകാര്‍ വിതരണ ചടങ്ങാണ്.

നിയമത്തിന്‍റെയും മനസ്സിന്‍റെയും നൂലാമാലകള്‍

Sun, 24 Feb 2008 17:58:10 +0530

ഒരു നിയമ ബന്ധ സിനിമയാണ് മൈക്കല്‍ ക്ലേറ്റണ്‍. സ്വന്തം സഹപ്രവര്‍ത്തകന്‍റെ മനോവിഭ്രാന്തിയേയും തന്‍റെ നിയമ സ്ഥാപനത്തിലെ പ്രധാന കക്ഷി നടത്തുന്ന അഴിമതിയുടേയും നൂലാമാലകളില്‍ പെട്ടുഴലുന്ന അറ്റോര്‍ണി മൈക്കല്‍ ക്ലേറ്റണിന്‍റെ കഥായാണ് ഈ സിനിമയില്‍ വിഖ്യാത നടന്‍ ജോര്‍ജ്ജ് ക്ലൂനി മൈക്കല്‍ ക്ലേറ്റണ്‍ എന്ന അറ്റോണിയും ചൂതാട്ട ആസക്തനുമായി അഭിനയിക്കുന്നത്.

കാല്‍നടക്കാരനെ കാറുകൊണ്ടിടിച്ച സഹപ്രവര്‍ത്തകന്‍റെ ഒരു പ്രധാന കക്ഷിയെ കണ്ടു മടങ്ങുമ്പോള്‍ ക്ലേറ്റണ്‍ കുറച്ചു കുതിരകളെ കാണുന്നു. അയാള്‍ കാര്‍ നിര്‍ത്തി കുതിരകളെ കാണായായി ഒരു കുന്നുകയറി പോകുന്നു. കുതിരകളെ കണ്ടുകൊണ്ടിരിക്കെ സ്വന്തം കാര്‍ ഒരു അഗ്നിഗോളമായി മാറുന്നത് കാണേണ്ടിവന്നു.

സുഹൃത്തിന്‍റെ മരണം ക്ലേറ്റണെ പല വിഷയങ്ങളിലേക്കും കൊണ്ടുചെന്നെത്തിക്കുന്നു. അദ്ദേഹത്തിന്‍റെ ജീവനു തന്നെ ഭീഷണിയാവുന്ന വിധം പല അപകടങ്ങളിലും ചെന്നു ചാടുന്നു.

വിധിയും അവസരങ്ങളും

Sun, 24 Feb 2008 17:55:18 +0530

പടിഞ്ഞാറന്‍ ടെക്സാസിലെ മരുപ്രദേശങ്ങളില്‍ എമ്പതുകളില്‍ നടക്കുന്ന മയക്ക് മരുന്ന് ഇടപാടുമായി ബന്ധപ്പെട്ടതാണ് ജോയല്‍ ഏഥന്‍ കോയെന്‍ സഹോദരന്‍‌മാര്‍ സംവിധാനം ചെയ്ത് അവതരിപ്പിക്കുന്ന നോ കണ്‍‌ട്രി ഫോര്‍ ഓഡ് മെന്‍. കോര്‍ മാക്ക് മക് കാര്‍ത്തിയുടെ നോവലിന്‍റെ ചലച്ചിത്ര രൂപാന്തരമാണിത്.

അവസരങ്ങളേയും വിധിയേയും സംബന്ധിക്കുന്നതാണ് ഇതിലെ ഇതിവൃത്തം. കോയന്‍ സഹോദരന്‍‌മാരുടെ ഏറ്റവും മികച്ച ചിത്രം ഇതാണെന്ന് നിരൂപകര്‍ വിലയിരുത്തുന്നു. മികച്ച സഹനടനും മികച്ച തിരക്കഥയ്ക്കുമുള്ള ഗോള്‍ഡന്‍ ഗ്ലോബ് അവാര്‍ഡ് ഈ ചിത്രം നേരത്തേ നേടിയിട്ടുണ്ട്.

മികച്ച സംവിധായകര്‍, മികച്ച ചിത്രം എന്നീ നിലകളിലാണ് നോ കണ്‍‌ട്രി ഫോര്‍ ഓഡ് മെന്‍ ഇത്തവണത്തെ ഓസ്കാര്‍ അവാര്‍ഡിന് നാമനിര്‍ദ്ദേശം ചെയ്യപ്പെട്ടിരിക്കുന്നത്.

ജാസന്‍ റേറ്റ് മാന്‍

Sun, 24 Feb 2008 17:30:39 +0530

ജൂനോ എന്ന സിനിമയുടെ പേരില്‍ ആദ്യമായാണ് ജാസന്‍ റേറ്റ് മാന് അക്കാഡമി അവാര്‍ഡിനുള്ള സംവിധായകനുള്ള നാമനിര്‍ദ്ദേശം ലഭിക്കുന്നത്.

മുപ്പത് കാരനായ റേറ്റ് മാന്‍ കാനഡക്കാരനാണ്. നടന്‍, എഴുത്തുകാരന്‍, നിര്‍മ്മാതാവ്, സംവിധായകന്‍ എന്നീ നിലകളിലെല്ലാം അറിയപ്പെടുന്ന അദ്ദേഹം താങ്ക് യൌ ഫോര്‍ സ്മോക്കിംഗ്, ജൂനോ എന്നീ ചിത്രങ്ങളുടെ പേരിലാണ് ഏറെ പ്രസിദ്ധനായത്.

ഗര്‍ഭിണിയാവുന്ന പതിനാറുകാരിയായ ജൂനോ എന്ന പൊട്ടിത്തെറിച്ച പെണ്‍കുട്ടിയുടെ കഥയാണ് റേറ്റ്മാന്‍ ജൂനോയില്‍ അവതരിപ്പിക്കുന്നത്. ഗര്‍ഭിണിയാണെന്ന് അറിഞ്ഞയുടന്‍ കുട്ടിയെ ദത്തെടുക്കാന്‍ നല്‍കാന്‍ ജൂനോ തീരുമാനിക്കുന്നു. ഗര്‍ഭം വളര്‍ന്നതോടുകൂടി ദത്തെടുക്കാന്‍ ഉദ്ദേശിക്കുന്ന മാതാപിതാക്കളോടൊപ്പം (മാര്‍ക്കും വെനേസയും) ജൂനോ താമസിക്കുന്നു. മാര്‍ക്കിനോട് ഈ പെണ്‍കുട്ടിക്ക് ഉണ്ടാവുന്ന ഇഷ്ടം എല്ലാ കണക്കുകൂട്ടലുകളും തെറ്റിക്കുന്നു.

മൈക്കിള്‍ ലീയാണ് റേറ്റ് മാന്‍റെ ഭാര്യ. ഹാര്‍വാര്‍ഡില്‍ നിന്ന് ഇംഗ്ലീഷ് രചനയില്‍ ബിരുദം നേടിയ റേറ്റ്മാന്‍ ഭാര്യയോടൊപ്പം കണ്‍സന്‍റ് എന്ന കോമഡി ചിത്രം സംവിധാനം ചെയ്തിട്ടുണ്ട്.

2005 ലെ താങ്ക് യു ഫോര്‍ സ്മോക്കിംഗ് ആയിരുന്നു റേറ്റ്മാന്‍റെ ആദ്യ കഥാചിത്രം. 2007 ലെ ടൊറന്‍റോ ഫിലിം ഫെസ്റ്റിവലിലാണ് ജൂനോ ആദ്യം റിലീസ് ചെയ്തത്. വലിയൊരു ഹോക്കി ഭ്രാന്തനാണ് റേറ്റ്മാന്‍.

ജൂലിയന്‍ സ്ക്നാബല്‍

Sun, 24 Feb 2008 17:28:47 +0530

അമേരിക്കന്‍ ആര്‍റ്റിസ്റ്റായ സ്ക്നാബലിന്‍റെ ആദ്യത്തെ അക്കാഡമി നോമിനേഷനാണ് ദി ഡ്രൈവിംഗ് ബെല്‍ ആന്‍റ് ദി ബട്ടര്‍ഫ്ലൈക്ക് ലഭിച്ചത്. 57 കാരനായ സ്ക്നാബലിന് നേരത്തെ ഗോള്‍ഡന്‍ ഗ്ലോബ് അവാര്‍ഡ് ലഭിച്ചിട്ടുണ്ട്. 2007 ലെ കാന്‍ ചലച്ചിത്ര മേളയിലെ അദ്ദേഹത്തെ മികച്ച ചലച്ചിത്ര സംവിധായകനായി തെരഞ്ഞെടുത്തിരുന്നു.

ചിത്രരചനയും സ്ലൈഡ് നിര്‍മ്മാണവും ഒക്കെയായിരുന്നു അദ്ദേഹത്തിന്‍റെ ആദ്യ ജോലികള്‍. അദ്ദേഹത്തിന്‍റെ പല രചനകളും പല ചിത്രകലാ മ്യൂസിയങ്ങളിലും പ്രദര്‍ശിപ്പിച്ചിട്ടുണ്ട്. ഇതോടൊപ്പം തന്നെ ചലച്ചിത്രങ്ങള്‍ക്ക് തിരക്കഥയെഴുതുകയും നിര്‍മ്മിക്കുകയും ചെയ്തുപോന്നു.

ചിത്രകാരനായ ജീന്‍ മൈക്കേല്‍ ബാസ്ക് വൈറ്റിനെ കുറിച്ച് നിര്‍മ്മിച്ച ജീവചരിത്ര സിനിമയായ ബാസ്ക് വൈറ്റാണ് (1996) അദ്ദേഹം ആദ്യം നിര്‍മ്മിച്ചത്. റെയ്നാള്‍ഡോ അരിനാസിന്‍റെ ആത്മകഥാപരമായ നോവലിനെ ആധാരമാക്കി ബിഫോര്‍ നൈറ്റ് ഫാള്‍സ് എന്നൊരു ചിത്രം 2000 ല്‍ അദ്ദേഹം സംവിധാനം ചെയ്തു.

ഡ്രൈവിംഗ് ബെല്‍ ആന്‍റ് ദി ബട്ടര്‍ഫ്ലൈ, ജീന്‍ ഡൊമിനിക് ബോബിയുടെ ഓര്‍മ്മക്കുറിപ്പിനെ ആധാരമാക്കിയുള്ള സിനിമയാണ്. ഇന്‍ഡിപ്പെന്‍ഡന്‍സ് സ്പിരിറ്റ് അവാര്‍ഡിനും അദ്ദേഹത്തിന് നാമനിര്‍ദ്ദേശം ലഭിച്ചിട്ടുണ്ട്.

കോയെന്‍ സഹോദരന്‍‌മാര്‍

Sun, 24 Feb 2008 17:28:22 +0530

നോ കണ്‍‌ട്രി ഫോര്‍ ഓള്‍ഡ് വുമണ്‍ എന്ന ചിത്രത്തിന്‍റെ സംവിധാനത്തിനാണ് ജോയെല്‍ കോയനും ഏഥന്‍ കോയെനും അക്കാഡമിയുടെ സംവിധായക പുരസ്കാരത്തിന് നാമനിര്‍ദ്ദേശം ലഭിച്ചത്. ‘അഡാപ്റ്റഡ്’ തിരക്കഥയ്ക്കും ഇവരുടെ പേര്‍ നാമനിര്‍ദ്ദേശം ചെയ്യപ്പെട്ടിട്ടുണ്ട്.

മുമ്പ് ഓ ബ്രദര്‍ ആര്‍ട്ട് ദൌ, ഫാര്‍ഗോ തുടങ്ങിയ ചിത്രങ്ങളുടെ തിരക്കഥയ്ക്കും ഏഥന്‍ കോയെന് നാമനിര്‍ദ്ദേശം ലഭിച്ചിരുന്നു. ഇരുപത് കൊല്ലമായി കോയെന്‍ ബ്രദേഴ്സ് ഹോളിവുഡില്‍ സജീവമാണ്. ഇരുവരും ചേര്‍ന്ന് സിനിമകള്‍ക്ക് തിരക്കഥ എഴുതുകയും സംവിധാനം നിര്‍വ്വഹിക്കുകയും ചെയ്തിട്ടുണ്ട്.

ഓ ബ്രദര്‍ ആര്‍ട്ട് ദൌ, റേസിംഗ് അരിസോണ, ദി ഹഡ് സക്കര്‍ പ്രോക്സി എന്നിവ മര്‍മ്മപ്രധാനമായ സിനിമകളാണ്.
ജോയെല്‍ 1954 ലും ഏഥന്‍ 1957 ലും മിന്നപൊലീസിലെ മിന്നസോട്ടയിലാണ് ജനിച്ചത്.

ജോയെല്‍ നടി ഫ്രാന്‍സസ് മക്‍ഡോമിനെയും ഏഥന്‍ ഫിലിം എഡിറ്റര്‍ ട്രിസിയ കുക്കിനെയുമാണ് വിവാഹം ചെയ്തത്.

ടോണി ഗില്‍‌റോയ്

Sun, 24 Feb 2008 17:28:11 +0530

മൈകേല്‍ ക്ലെയ്‌ടണ്‍ എന്ന സിനിമയുടെ സംവിധായകനായ ടോണി ഗില്‍‌റോയ് ആദ്യമായാണ് അക്കാഡമി അവാര്‍ഡിനായി നാമനിര്‍ദ്ദേശം ചെയ്യപ്പെട്ടത്. മാറ്റ് ഡാമന്‍ അഭിനയിക്കുന്ന ജാസന്‍ ബ്രോണി പരമ്പരയിലെ തിരക്കഥകളുടെ പേരിലാണ് ഇദ്ദേഹം ഏറെ ശ്രദ്ധിക്കപ്പെട്ടിരുന്നത്.

ചലച്ചിത്ര സംവിധായകന്‍ എന്ന പോലെ കൃതഹസ്തനായ എഴുത്തുകരന്‍ കൂടിയാണ് അദ്ദേഹം. തിരക്കഥാകൃത്തുക്കളായ ജോണ്‍ ഗില്‍‌റോയും ഡാന്‍ ഗില്‍‌റോയും സഹോദരന്‍‌മാരാണ്. അച്ഛന്‍ ഫ്രാങ്ക് ഗില്‍‌റോയും തിരക്കഥാകൃത്താണ്.

ജോര്‍ജ്ജ് ക്ലൂനിയെ നായകനാക്കി സ്വന്തം തിരക്കഥ സംവിധാനം ചെയ്താണ് അദ്ദേഹം ആദ്യമായി സംവിധായകന്‍റെ മേലങ്കി അണിയുന്നത്. തിരക്കഥയ്ക്കും സംവിധാനത്തിനും അദ്ദേഹത്തിന് നാമനിര്‍ദ്ദേശമുണ്ട്. ഡോളേഴ്സ് ക്ലൈബോണ്‍, ദി ഡെവിള്‍സ് അഡ്വക്കേറ്റ്, റൂഫ് ഓഫ് ലൈഫ് തുടങ്ങിയവയാണ് പ്രധാന തിരക്കഥകള്‍.

പോള്‍ തോമസ് ആന്‍ഡേഴ്സണ്‍

Sun, 24 Feb 2008 17:23:53 +0530

ദെയര്‍ വില്‍ ബീ ബ്ലഡ് എന്ന ചിത്രത്തിലെ സംവിധാനത്തിന്‍റെ പേരില്‍ ഓസ്കാര്‍ നാമനിര്‍ദ്ദേശം ലഭിച്ച പോള്‍ തോമസ് ആന്‍ഡേഴ്സണ് ഇത് അഞ്ചാമത്തെ അക്കാഡമി നാമനിര്‍ദ്ദേശമാണ്.

1999 ല്‍ മംഗോളിയ എന്ന ചിത്രത്തിനും 1997 ബൂഗി നൈറ്റ്സ് എന്ന സിനിമയ്ക്കും രചനയ്ക്ക് നാമനിര്‍ദ്ദേശം ലഭിച്ചിട്ടുണ്ട്.

പണത്തിനു വേണ്ടിയുള്ള അത്യാര്‍ത്തിയില്‍ ദാനിയേല്‍ പ്ലെയിന്‍‌വ്യൂ ഒരു കര്‍ഷകനെ ചതിക്കുന്നു. അപകടത്തില്‍ കേള്‍‌വി നഷ്ടപ്പെട്ട മകനെ കൈയൊഴിയുന്നു. ജീവിതത്തില്‍ പിന്നീട് ഒറ്റപ്പെട്ടുപോയ ദാനിയേല്‍ അദ്ദേഹത്തിന് തന്‍റെ അര്‍ദ്ധ സഹോദരന്‍ എന്ന് കരുതുന്ന ആളെ വിശ്വസിക്കേണ്ടി വരുന്നു. ഇതിനിടെ കൃഷിക്കാരന്‍റെ മകന്‍ ഒരു സുവിശേഷക പ്രസംഗകന്‍ എന്ന നിലയില്‍ പേരെടുത്ത് വലുതാവുന്നു. ഇതിനെ ചുറ്റിപ്പറ്റിയുള്ളതാണ് ദെയര്‍ വില്‍ ബീ ബ്ലഡിന്‍റെ ഇതിവൃത്തം.

ടെലിവിഷന്‍ അവതാരകയും നടനുമായ ഏര്‍ണി ആന്‍ഡേഴ്സണിന്‍റേയും എഡ്വിനയുടെയും മകനാണ് പോള്‍ തോമസ് ആന്‍ഡേഴ്സണ്‍. സ്കൂള്‍ വിദ്യാര്‍ത്ഥി ആയിരിക്കെ തന്നെ ആന്‍ഡേഴ്സണ്‍ ചലച്ചിത്ര സംവിധാനം നടത്തിയിരുന്നു. 1988 ല്‍ ദി ഡിര്‍ക്ക് ഡിഗ്ലര്‍ സ്റ്റോറി എന്ന പേരില്‍ ഒരു മോക്യുമെന്‍ററി അദ്ദേഹം സംവിധാനം ചെയ്തു.

രതിചിത്ര നായകനായ ഒരാളെ കുറിച്ചുള്ളതായിരുന്നു ഈ കഥ. പിന്നീട് ടെലിവിഷന്‍, വീഡിയോ ചിത്രനിര്‍മ്മാണ രംഗത്തേക്ക് ശ്രദ്ധ തിരിഞ്ഞു. വര്‍ഷങ്ങള്‍ക്ക് ശേഷം ഹാര്‍ഡ് എയിറ്റ് എന്ന പേരില്‍ അദ്ദേഹം മുഴുനീള കഥാചിത്രമെടുത്തു. ബൂഗി നൈറ്റ്സ് എന്ന പേരില്‍ ആന്‍ഡേഴ്സണ്‍ എടുത്ത ചിത്രം കുട്ടിക്കാലത്ത് എടുത്ത പഴയ സിനിമയുടെ പുതിയ രൂപമായിരുന്നു.

ഗര്‍ഭം, ദത്തെടുക്കല്‍, പ്രണയം

Sun, 24 Feb 2008 15:23:27 +0530

ജാസന്‍ റൈറ്റ്‌മാന്‍ സംവിധാനം ചെയ്ത നര്‍മ്മപ്രധാനമായ കഥാചിത്രമാണ് ജൂനോ. ജൂനോ എന്ന പതിമൂന്നുകാരിയായി എല്ലെന്‍ പേജ് ആണ് അഭിനയിക്കുന്നത്. അവിചാരിതമായി ഗര്‍ഭിണിയാവുന്ന പെണ്‍കുട്ടി ആ അവസ്ഥയെ നേരിടുന്നതാണ് ജൂനോയിലെ ഇതിവൃത്തം. മൈക്കെല്‍ സെര, ജെന്നിഫര്‍ ഗ്രാനര്‍, ജാസന്‍ ബാറ്റ്‌മാന്‍ എന്നിവരും പ്രധാന വേഷങ്ങളില്‍ അഭിനയിക്കുന്നു.

പ്രദര്‍ശിപ്പിച്ചിടത്തെല്ലാം വന്‍ വിജയം നേടിയ സിനിമയാണ് ഡയാബ്ലോ കോഡി തിരക്കഥയെഴുതിയ ജൂനോ. മികച്ച ചിത്രം, മികച്ച സംവിധായകന്‍, മികച്ച നടി (എല്ലെന്‍ പേജ്), മികച്ച തിരക്കഥാകൃത്ത് എന്നിവയ്ക്കാണ് ജൂനോയ്ക്ക് നാമനിര്‍ദ്ദേശം ലഭിച്ചത്.

ജൂനോ മക്‍ഗഫ് ഗര്‍ഭിണിയാണെന്ന് അറിഞ്ഞപ്പോള്‍ ആദ്യം അലസിപ്പിക്കാനാണ് ശ്രമിച്ചത്. കാമുകനായ പൌളി ബ്ലീക്കര്‍ ആണ് അതിനുത്തരവാദി എന്ന് അവള്‍ക്കറിയാമായിരുന്നു. പ്രസവം നടക്കാനായി സൌകര്യമുള്ള ഒരു വീട് കണ്ടെത്താനുള്ള തെരച്ചിലിന് ഒടുവില്‍ മാര്‍ക്ക് - വെനേസ ദമ്പതികളെ അവള്‍ കണ്ടെത്തുന്നു. കുട്ടിയെ ദത്തെടുക്കാന്‍ അവര്‍ തയ്യാറായി.

അതിനിടെ മാര്‍ക്കും ജൂനോയും സൌഹൃദം സ്ഥാപിക്കുന്നു. ഇത് വെനേസയ്ക്ക് ഇഷ്ടമാവുന്നില്ല. അതോടൊപ്പം കാമുകനോട് ജൂനോ അനിഷ്ടം ഭാവിക്കുകയും ചെയ്യുന്നു. മാര്‍ക്കും വെനേസയും വിവാഹബന്ധം വേര്‍പെടുത്താന്‍ ശ്രമിക്കുന്നത് പക്ഷെ ജൂനോയ്ക്ക് മനോവിഷമം ഉണ്ടാക്കുന്നു. കാമുകന്‍ പൌലിയുടെ അടുത്തേക്ക് ജൂനോ പോകുന്നു.
ജൂനോ പ്രസവിക്കുന്ന കുട്ടിയെ വളര്‍ത്താന്‍ വെനേസ തയ്യാറാവുന്നതോടെ ചിത്രം അവസാനിക്കുന്നു.

ഓസ്‌കാര്‍: ഇന്ന് പ്രഖ്യാപിക്കും

Sun, 24 Feb 2008 15:21:08 +0530

PRO

എണ്‍പതാമത് ഓസ്‌കാര്‍ ചലച്ചിത്ര അവാര്‍ഡ് ഞായറാഴ്‌ച പ്രഖ്യാപിക്കാനിരിക്കെ ലോകം പ്രാര്‍ത്ഥിയിക്കുകയാണ്; മഴ രസം കൊല്ലിയായി വരുതെന്ന്!.

അവാര്‍ഡ് പ്രഖ്യാപന ചടങ്ങുകള്‍ നടക്കുന്ന കാലിഫോര്‍ണിയയില്‍ അടുത്ത 48 മണിക്കൂറിനുള്ളില്‍ മഴ പെയ്യുമെന്ന് കാലാ‍വസ്ഥ വി‌ദഗ്‌ധരുടെ പ്രവചനം ചലച്ചിത്ര ആസ്വാദകരെ ആശങ്കയിലാക്കിയിരിക്കുകയാണ്.

അതേസമയം ചടങ്ങുകളുടെ മുഖ്യ സംഘാടകന്‍ ഗില്‍ കാറ്റ്സ് ശുഭാപ്തി വിശ്വാസത്തിലാണ്. ‘കാലാവസ്ഥ പ്രശ്‌നമുണ്ടാക്കില്ലെന്ന് ഞങ്ങള്‍ വിശ്വസിക്കുന്നു‘; ഗില്‍ കാറ്റ്സ് പറഞ്ഞു. അതേസമയം കോവന്‍ ബ്രദേഴ്‌സിന്‍റെ ‘നോ കണ്‍‌ട്രി ഫോര്‍ ഓള്‍ഡ് മേനിന്‘ ഈ വര്‍ഷത്തെ മികച്ച സിനിമയ്‌ക്കുള്ള അവാര്‍ഡ് ലഭിക്കുമെന്ന് ഭൂരിഭാഗം ആരാധകരും പ്രതീക്ഷിക്കുന്നു.

ഇതിനു പുറമെ ‘ദേര്‍ വില്‍ ബി ബ്ലഡ്‘, ജുനോ, മൈക്കേല്‍ ക്ലായറ്റോന്‍ എന്നിവയും മത്സര രംഗത്തുണ്ട്. മികച്ച നടനുള്ള അവാര്‍ഡ് ലഭിക്കുവാന്‍ മൈക്കേല്‍ ക്ലായിറ്റോണിലെ നായകന്‍ ജോര്‍ജ് ക്ലൂനി, ‘ദേര്‍ വില്‍ ബി ബ്ലഡി‘ലെ ഡാനിയല്‍ ഡേ ലൂവിസ് എന്നിവര്‍ക്കാണ് സാദ്ധ്യത കല്‍പ്പിക്കുന്നത്.

മികച്ച നടിക്കായിട്ടുള്ള മത്സരത്തിന്‍റെ മുന്‍ നിരയില്‍ ‘എലിസബത്ത്:ദി ഗോള്‍ഡന്‍ ഏജി‘ലെ നായിക കാത്ത് ബ്ലാന്‍‌ചെത്ത്, എവേ ഫ്രം ഹേറിലെ നായിക ജൂലിയെ ക്രിസ്റ്റി എന്നിവരാണ് ഉള്ളത്.

മാപ്പ് നല്‍കലിന്‍റെ മനോഹാരിത

Sun, 24 Feb 2008 15:18:48 +0530

അയഥാര്‍ഥ്യം എന്നു തോന്നാവുന്ന സന്തോഷകരമായ അവസാനമാണ് അറ്റോണ്‍‌മെന്‍റ് എന്ന ഹോളിവുഡ് സിനിമയ്ക്ക്.

പതിമൂന്നുകാരിയായ ഒരു പെണ്‍കുട്ടിയുടെ നിര്‍ദ്ദോഷം എങ്കിലും വിനാശകരമായ കുസൃതിമൂലം സഹോദരിയുടെ പ്രണയം നഷ്ടമാകുന്നതും ഒടുവില്‍ എഴുത്തുകാരിയായി വളര്‍ന്ന പതിമൂന്നുകാരി ചേച്ചിക്കും കാമുകനും മാപ്പ് നല്‍കി അവരെ ഒന്നിപ്പിക്കുന്ന രീതിയില്‍ കഥാന്ത്യം ചമയ്ക്കുന്നതുമാണ് ഇതിലെ ഇതിവൃത്തം.

ക്രിസ്ത്യാനികള്‍ക്കും ജൂതന്‍‌മാര്‍ക്കും പാപങ്ങളെ പൊറുത്ത് നല്‍കല്‍ എന്നൊരു തത്വം തന്നെയുണ്ട്. ഏതാണ്ട് അതേ മട്ടിലാണ് ഈ കഥയില്‍ കാര്യങ്ങളുടെ പോക്ക്. അറ്റോണ്‍‌മെന്‍റ് എന്ന പേരില്‍ ഇയാന്‍ മഖ് ഇവാന്‍ എഴുതിയ നോവലിന് ജോ റൈറ്റ് നല്‍കിയ ചലച്ചിത്ര ഭാഷ്യമാണിത്.

ക്രിസ്റ്റഫര്‍ ഹാം‌ടണിന്‍റേതാണ് തിരക്കഥ. ജെയിംസ് മക്കവോയ്, കെയ്‌റ നൈറ്റ്‌ലി എന്നിവര്‍ അഭിനയിക്കുന്ന ഈ ചിത്രം യൂണിവേഴ്സല്‍ സ്റ്റുഡിയോസാണ് പ്രദര്‍ശനത്തിനെത്തിച്ചത്. 2007 ലെ വെനീസ് അന്തര്‍ദ്ദേശീയ ചലച്ചിത്രോത്സവത്തില്‍ ഉദ്ഘാടന ചിത്രവും ഇതായിരുന്നു. വെനീസില്‍ ഉദ്ഘാടന ചിത്രത്തിന്‍റെ ഏറ്റവും പ്രായം കുറഞ്ഞ സംവിധായകന്‍ എന്ന ബഹുമതി റൈറ്റിനു ലഭിച്ചു.

വാന്‍‌കൂവര്‍ മേളയിലും ഇതായിരുന്നു ഉദ്ഘാടന ചിത്രം. എമ്പതാം ഓസ്കാര്‍ അവാര്‍ഡില്‍ മികച്ച ചിത്രം, മികച്ച രചന (അഡാപ്റ്റഡ് തിരക്കഥ), മികച്ച സഹനടി എന്നിവയ്ക്കാണ് അറ്റോണ്‍‌മെന്‍റിന് നാമനിര്‍ദ്ദേശം ലഭിച്ചത്. പതിനാലു ദിവസം മുമ്പ് അറ്റോണ്‍‌മെന്‍റ് മികച്ച ചിത്രം അടക്കമുള്ള രണ്ട് ബാഫ്റ്റ പുരസ്കാരങ്ങള്‍ നേടുകയുണ്ടായി.

നാലു ഭാഗങ്ങളായാണ് ഈ സിനിമ അവതരിപ്പിക്കുന്നത്. ഇതില്‍ ചില രംഗങ്ങള്‍ വിവിധ വീക്ഷണ കോണുകളില്‍ നിന്നായി പലതവണ ആവര്‍ത്തിക്കുന്നുമുണ്ട്.

എഴുത്തില്‍ താത്പര്യമുള്ള പതിമൂന്നുകാരി ബ്രയോണി ടാലിസ് തന്‍റെ സഹോദരി സിസിലിയയും കാമുകന്‍ റോബിയും തമ്മിലുള്ള ലൈംഗിക ബന്ധം കാണാനിടയായി. അവള്‍ അത് മോശമായ അര്‍ത്ഥത്തിലാണ് എടുക്കുന്നത്. പിന്നീട് റോബിയുടെ ഒരു പ്രണയ ലേഖനം ചേച്ചി കാണാതെ വായിക്കാന്‍ ഇടയായപ്പോഴും റോബിയെ ഒരു സെക്സ് മാനിയാക്ക് ആയി തെറ്റിദ്ധരിക്കുന്നു. ഈയൊരു പശ്ചാത്തലത്തിലാണ് കഥ പുരോഗമിക്കുന്നത്.

ചേച്ചിയുടേയും റോബിയുടേയും പ്രണയം പൂവണിയുന്നില്ല. സിസിലിയ മുങ്ങിമരിക്കുന്നു. ബ്രയോണി ടാലിസ് വലിയൊരു എഴുത്തുകാരിയായി മാറുന്നു. അവരും ഹൃദയസംബന്ധമായ അസുഖം മൂലം മരണാസന്നയാണ്. തന്നെയും ചേച്ചിയേയും കുറിച്ചുള്ള കഥയെഴുതിയ ബ്രയോണി കഥയില്‍ ചേച്ചിയേയും റോബിയെയും ഒരുമിപ്പിക്കുന്നു.

ഓസ്കാര്‍ തിരക്കഥാ മത്സരത്തിന് സ്ത്രീകളും

Sat, 23 Feb 2008 20:00:16 +0530

ഇത്തവണത്തെ ഓസ്കാര്‍ പുരസ്കാരങ്ങളില്‍ തിരക്കഥാ രംഗത്തേക്ക് നാലു സ്ത്രീകളേയും നാമനിര്‍ദ്ദേശം ചെയ്തിരിക്കുന്നു. സാധാരണയായി ഈ രംഗത്ത് പുരുഷന്‍‌മാരുടെ ആധിപത്യമാണുള്ളത്. ഇത്തവണ അതിനൊരു മാറ്റം ഉണ്ടാകട്ടേയെന്നാവും ഇത്തരമൊരു നീക്കത്തിനു പിന്നില്‍.

പ്രസിദ്ധമായ ജൂനോയുടെ തിരക്കഥ രചിച്ച ഡയാബ്ലോ കോഡി ഉള്‍പ്പെടെ നാലു സ്ത്രീകളെയാണ് ഇത്തവണ ഓസ്കാര്‍ തിരക്കഥാ പുരസ്കാരത്തിന് നാമനിര്‍ദ്ദേശം ചെയ്തിരിക്കുന്നത്. സ്ത്രീയാണ് എന്ന് പറഞ്ഞ് തള്ളിക്കളയാന്‍ നിങ്ങള്‍ ആഗ്രഹിക്കണ്ട എന്നാണ് നാമനിര്‍ദ്ദേശം ലഭിച്ചശേഷം ഡയാബ്ലോ കോഡി പറഞ്ഞത്.

ഈ രംഗത്ത് സ്ത്രീകളുടെ സാന്നിദ്ധ്യം കുറഞ്ഞ സാഹചര്യത്തില്‍ തന്നെ ഈ രംഗത്തേക്ക് നാമനിര്‍ദ്ദേശം ചെയ്തതറിഞ്ഞ് ശരിക്കും ത്രില്ലടിച്ചതായാണ് അവര്‍ പറഞ്ഞത്. കോഡിയെ ഓസ്കാര്‍ രംഗത്തേക്ക് ആദ്യമായാണ് നാമനിര്‍ദ്ദേശം ചെയ്തിരിക്കുന്നത്.

ദി സാവേജസിന്‍റെ തിരക്കഥ, സംവിധാനം എന്നിവ നിര്‍വഹിച്ച തമാര ജെന്‍‌കിന്‍സ്, ലാര്‍സ് ആന്‍റ് ദി റിയല്‍ ഗേളിന്‍റെ തിരക്കഥയെഴുതിയ നാന്‍സി ഒലിവര്‍ എന്നിവരും കോഡിക്കൊപ്പം നാമനിര്‍ദ്ദേശം ചെയ്യപ്പെട്ടരില്‍ പെടുന്നു. ഇവരെ കൂടാതെ എവേ ഫ്രം ഹര്‍ എന്ന ചിത്രത്തിനു വേണ്ടി സംവിധാനം, തിരക്കഥ എന്നിവ നിര്‍വഹിച്ച സാറ പോളിയുമുണ്ട്.

ഇത്തവണ തിരക്കഥയ്ക്ക് നാനനിര്‍ദ്ദേശം ചെയ്യപ്പെട്ട വ്യക്തികളില്‍ നാലു പേര്‍ സ്ത്രീകളാണ് എന്നത് ഒരു റിക്കോഡാണ്. അഡാപ്റ്റഡ് തിരക്കയ്ക്ക് സാറാ പോളി (എവേ ഫ്രം ഹെര്‍) ക്കും നാമനിര്‍ദ്ദേശമുണ്ട്. അങ്ങനെ നോക്കുമ്പോള്‍ തിരക്കഥാ രചനയില്‍ ഇരു വിഭാഗങ്ങളിലുമായി 10 നാമനിര്‍ദ്ദേശങ്ങള്‍ ഉള്ളതില്‍ അഞ്ച് സ്ത്രീകള്‍ക്കാണ്. ഒരിജിനല്‍ തിരക്കഥയിലാവട്ടെ അഞ്ചില്‍ നാലും സ്ത്രീകള്‍ക്കാണ്.