പുതുതായി പുറത്തിറക്കിയ 2000 രൂപ നോട്ടുകള്‍ക്ക് ക്ഷാമം. എടി‌എമ്മുകളില്‍ നിന്ന് പഴയതുപോലെ 2000 രൂപ നോട്ടുകള്‍ ലഭിക്കുന്നില്ല. മാത്രമല്ല, സാധാരണ ക്രയവിക്രയങ്ങളിലും കൂടുതലായി ഉപയോഗിക്കപ്പെടുന്നത് 500 രൂപ നോട്ടാണ്. 2000 രൂപ നോട്ടുകളുടെ അച്ചടി നിര്‍ത്തിയതായും ചില സ്ഥിരീകരിക്കാത്ത റിപ്പോര്‍ട്ടുകള്‍ വരുന്നുണ്ട്.

2000 രൂപ നോട്ട് നിരോധിക്കുമെന്ന നിലയിലുള്ള അഭ്യൂഹങ്ങള്‍ക്ക് ധനമന്ത്രി അരുണ്‍ ജയ്‌റ്റ്‌ലി മറുപടി നല്‍കാത്തതും ആശങ്കയ്ക്ക് വകവച്ചിട്ടുണ്ട്. പാര്‍ലമെന്‍റില്‍ ഇതുസംബന്ധിച്ച പ്രതിപക്ഷത്തിന്‍റെ ചോദ്യങ്ങളില്‍ നിന്ന് അരുണ്‍ ജെയ്റ്റ്‌ലി ഒഴിഞ്ഞുമാറുകയായിരുന്നു.

സാധാരണ ജനങ്ങള്‍ക്ക് 2000 രൂപ നോട്ട് ഇപ്പോഴും ബുദ്ധിമുട്ട് തന്നെയാണ്. ചെറിയ ഇടപാടുകള്‍ക്ക് ഈ നോട്ട് ഇപ്പോഴും ‘പൊതിയാത്തേങ്ങ’യാണെന്നാണ് പലരുടെയും അഭിപ്രായം. 2000 രൂപ നോട്ടുകൊണ്ട് ഒരു കടയില്‍ കയറി സാധനങ്ങള്‍ വാങ്ങാന്‍ ശ്രമിച്ചാല്‍ പലപ്പോഴും ചില്ലറ കിട്ടാറില്ലെന്നും ജനം അഭിപ്രായപ്പെടുന്നു.