മുംബൈ|
jibin|
Last Modified ബുധന്‍, 5 ഏപ്രില്‍ 2017 (15:02 IST)
വാത്മീകി മഹര്‍ഷിക്കെതിരെ ആക്ഷേപകരമായി സംസാരിച്ചുവെന്ന പരാതിയില്‍ ബോളിവുഡ് നടി രാഖി സാവന്തിനെ അറസ്റ്റ് ചെയ്തുവെന്ന വാര്‍ത്തകള്‍ പ്രചരിച്ചതിന് പിന്നാലെ രാഖി ഒളിവിലാണെന്നു പഞ്ചാബ്‌ പൊലീസ്‌ അറിയിച്ചു.
ലുധിയാന കോടതിയാണ് താരത്തിനെതിരെ അറസ്റ്റ് വാറണ്ട് പുറപ്പെടുവിച്ചിരിക്കുന്നത്. കേസിൽ മാർച്ച് ഒമ്പതിന് രാഖിയോട് കോടതിയിൽ ഹാജരാകാൻ ആവശ്യെപ്പട്ടിരുന്നുവെങ്കിലും അതിൽ വീഴ്ച വരുത്തിയതിനെ തുടർന്നാണ് വാറണ്ട്.
കഴിഞ്ഞ വര്‍ഷം സ്വകാര്യ ചാനലിനു നൽകിയ അഭിമുഖത്തിൽ വാല്‍മീകിയെയും വാൽമീകി വിഭാഗത്തില്‍പ്പെട്ടവരുടെ മതവികാരത്തെ വ്രണപ്പെടുത്തുന്ന വിധം പരാമര്‍ശം നടത്തിയെന്ന പരാതിയെ തുടര്‍ന്നാണ് നടപടി.
ഏപ്രില്‍ 10ന് കേസ് വീണ്ടും പരിഗണിക്കും. വാല്‍മീകി വിഭാഗത്തില്‍പെട്ടവര്‍ രാഖിക്കെതിരെ നേരത്തെ പ്രതിഷേധ പ്രകടനങ്ങള്‍ നടത്തിയിരുന്നു.
ബിഗ്‌ ബോസ്‌, രാഖി കാ സ്വയംവര്‍ റിയാലിറ്റി ഷോകളിലൂടെ ആരാധകരെ കൈയിലെടുത്ത രാഖി, ഒട്ടേറെ ഹിന്ദി ചിത്രങ്ങളിലും ശ്രദ്ധേയ വേഷം ചെയ്‌തിട്ടുണ്ട്‌. 2014 പൊതുതെരഞ്ഞെടുപ്പില്‍ മുംബൈ നോര്‍ത്ത്‌ വെസ്‌റ്റില്‍നിന്നുള്ള സ്വതന്ത്ര സ്‌ഥാനാര്‍ഥിയായിരുന്നു.
