കൊച്ചി|
സജിത്ത്|
Last Modified ബുധന്‍, 28 ജൂണ്‍ 2017 (17:32 IST)
കൊച്ചിയില്‍ നടിയെ തട്ടിക്കൊണ്ടുപോയി ആക്രമിച്ച കേസിലെ മുഖ്യപ്രതിയായ പള്‍സര്‍ സുനിയുടെ വക്കാലത്ത് അഡ്വ ബി എ ആളൂര്‍ ഏറ്റെടുത്തു. സുനിയെ റിമാന്‍ഡ് ചെയ്തിരിക്കുന്ന കാക്കനാട് സബ് ജയിലില്‍ എത്തിയ ആളൂര്‍ സുനിയുമായി കൂടിക്കാഴ്ച്ച നടത്തുകയും ചെയ്തു.
തുടര്‍ന്നാണ് തന്റെ വക്കാലത്ത് നിലവിലെ അഭിഭാഷകനില്‍ നിന്ന് ആളൂരിന് കൈമാറണമെന്ന അപേക്ഷ സുനി ജയില്‍ സൂപ്രണ്ടിന് എഴുതി നല്‍കിയത്. ഈ അപേക്ഷ ജയില്‍ സൂപ്രണ്ട് നാളെയാണ് കോടതിയില്‍ അവതിരിപ്പിക്കുക. ഇത് കോടതി അനുവദിച്ചാല്‍ സുനിയ്ക്ക് വേണ്ടി ആളൂരായിരിക്കും കോടതിയില്‍ ഹാജരാവുക.
നടിയെ ആക്രമിച്ച സംഭവത്തില്‍ പല ഉന്നതര്‍ക്കും പങ്കുള്ളതായി പള്‍സര്‍ സുനി തന്നോട് പറഞ്ഞതായി ആളൂര്‍ വ്യക്തമാക്കി. വലിയ ഗൂഢാലോചനയാണ് ആ സംഭവത്തിന് പിന്നില്‍ നടന്നിരിക്കുന്നത്. ആവശ്യമെങ്കില്‍ 164 പ്രകാരം ഇക്കാര്യങ്ങളെല്ലാം സുനി കോടതിയില്‍ രഹസ്യമൊഴിയായി നല്‍കുമെന്നും ആളൂര്‍ വ്യക്തമാക്കി.
കുപ്രസിദ്ധമായ സൗമ്യവധക്കേസില്‍ പ്രതി ഗോവിന്ദചാമിയുടെ വക്കാലത്തേറ്റെടുത്ത് വാര്‍ത്തകളില്‍ ഇടംനേടിയ ബിഎ ആളൂര്‍ പിന്നീട് ജിഷവധക്കേസ് പ്രതി അമീറുല്‍ ഇസ്ലാമിനും സോളാര്‍ക്കേസില്‍ സരിത എസ് നായര്‍ക്കും വേണ്ടി കോടതിയില്‍ ഹാജരായിട്ടുണ്ട്.
