ഏകീകൃത മെഡിക്കല്‍ പ്രവേശന പരീക്ഷ ഈ വര്‍ഷം മുതല്‍ നടത്തേണ്ടതില്ലെന്ന് കേന്ദ്രസര്‍ക്കാര്‍ സുപ്രീംകോടതിയില്‍. നാഷനൽ എലിജിബിലിറ്റി കം എൻട്രൻസ്​ ടെസ്​റ്റ്​ (നീറ്റ്​) ഈ വര്‍ഷം മുതല്‍ നടപ്പാക്കാന്‍ കഴിഞ്ഞദിവസമായിരുന്നു സുപ്രീംകോടതി തീരുമാനിച്ചത്. മെയ് ഒന്ന്, ജൂലൈ 24 ദിവസങ്ങളിലായി രണ്ടു ഘട്ടമായി ഏകീകൃത പരീക്ഷ നടത്താനായിരുന്നു കോടതി നിര്‍ദ്ദേശം.

​എന്നാല്‍, രണ്ട്​ ഘട്ടത്തിന്​ പകരം ജൂലൈ 24 ന്​ ഒറ്റ ഘട്ടമായി പരീക്ഷ നടത്തിയാൽ മതിയെന്നും സംസ്ഥാനങ്ങൾ നടത്തുന്ന പ്രവേശന പരീക്ഷയിലൂടെ എം ബി ബി എസ്​, ബി ഡി എസ്​ പ്രവേശത്തിന്​ അനുമതി നൽകണമെന്നും കേ​ന്ദ്രസർക്കാർ സുപ്രീംകോടതിയെ അറിയിച്ചു. പ്രായോഗിക ബുദ്ധിമുട്ടുകൾ പരിഗണിച്ചാണ്​ നീറ്റ്​ ഈ വർഷം വേ​ണ്ടെന്ന്​ കേന്ദ്രസർക്കാർ നിലപാട് എടുത്തത്​.

മെഡിക്കൽ പ്രവേശത്തിന്​ പരീക്ഷ നടത്തുന്നതിന് സംസ്ഥാനങ്ങൾ തീയതി നിശ്ചയിക്കുകയോ പരീക്ഷ നടത്തുകയോ ചെയ്​തിട്ടുണ്ട്​. അതിനാൽ പ്രവേശന നടപടികളുമായി മുന്നോട്ട്​ പോകാൻ സംസ്ഥാനങ്ങളെ അനുവദിക്കണമെന്നാണ് സര്‍ക്കാരിന്റെ ആവശ്യം.