സംസ്ഥാന ചലച്ചിത്രപുരസ്‌കാര വിതരണ ചടങ്ങുമായി ബന്ധപ്പെടുത്തി അമ്മ പ്രസിഡന്റ് മോഹന്‍‌ലാലിനെതിരെ ഉയരുന്ന ആരോപണങ്ങള്‍ക്കെതിരെ സിനിമാ പ്രവര്‍ത്തകര്‍ രംഗത്ത്.

ഇടവേള ബാബുവിന്റെ നേതൃത്വത്തിലുള്ള സിനിമാ പ്രവര്‍ത്തകര്‍ പുറത്തിറക്കിയ വാര്‍ത്താക്കുറിപ്പിലാണ് മോഹന്‍‌ലാലിനെ പിന്തുണച്ച് താരങ്ങള്‍ എത്തിയിരിക്കുന്നത്. മോഹന്‍‌ലാലിനെതിരെ ചിലര്‍ ഗൂഢാലോചന നടത്തുകയാണ്. സംഘടിതമായിട്ടാണ് ഈ നീക്കം നടക്കുന്നതെന്നും വാര്‍ത്താക്കുറിപ്പിലൂടെ ഇവര്‍ വ്യക്തമാക്കി.

ചടങ്ങിലേക്ക് മോഹന്‍‌ലാലിനെ ക്ഷണിക്കുന്ന കാര്യം ആലോചിച്ചിട്ടില്ലെന്ന് സര്‍ക്കാര്‍ വ്യക്തമാക്കിയിട്ട്. എന്നിട്ടും ഈ വിഷയം ഉയര്‍ത്തിപ്പിടിച്ച് ചിലര്‍ പ്രവര്‍ത്തിക്കുന്നു. ഇത് ഗൂഢാലോചനയുടെ ഭാഗമായിട്ടുള്ളതാണെന്നും വാര്‍ത്താക്കുറിപ്പില്‍ വ്യക്തമാക്കുന്നു.

അതേസമയം, പരിപാടിയിലേക്ക് തന്നെ ആരും ക്ഷണിച്ചിട്ടില്ലെന്ന് മോഹന്‍‌ലാല്‍ പ്രതികരിച്ചതായുമുള്ള റിപ്പോര്‍ട്ടും പുറത്തുവരുന്നുണ്ട്. ക്ഷണിച്ചാല്‍ തന്നെ പോകണോ വേണ്ടയോ എന്ന് തിരുമാനിക്കേണ്ടത് താനാണ് എന്നതാണ് മോഹൻലാലിന്റെ നിലപാട്.