പത്തനംതിട്ട: ശബരിമല സ്ത്രീപ്രവേശനത്തിനെതിരെ പൂജകൾ നിർത്തിവച്ച് പരികർമികൾ പ്രതിഷേധിച്ച സംഭവത്തിൽ ദേവസ്വം ബോർഡ് മേൽ‌ശാന്തിക്ക് നോട്ടീസ് അയച്ചു. പ്രതിഷേധിച്ച പരികർമ്മികളുടെ വിവരങ്ങൾ നൽകണമെന്നാവശ്യപ്പെട്ടാണ് നോട്ടീസ് നൽകിയിരിക്കുന്നത്.

വെള്ളിയാഴ്ച രാവിലെയോടെയായിരുന്നു പൂജകൾ നിർത്തിവച്ച് പരികർമ്മികൾ പ്രതിഷേധത്തിനിറങ്ങിയത്. സ്ത്രീകൾ നടപ്പന്തലിൽ എത്തിയതായി അറിഞ്ഞതോടെ പരികർമ്മികൾ പതിനെട്ടാം പടിയുടെ മുന്നിൽ കുത്തിയിരുന്ന് സമരം നടത്തുകയായിരുന്നു. ഇവർക്കെതിരെ നടപടി ഉണ്ടായേക്കും എന്ന് സൂചന നൽകുന്നതാണ് നോട്ടീസ്.