ഒരു കാലത്ത് മലയാള സിനിമയിലേക്ക് നടീ - നടന്മാർ വന്നിരുന്നത് മിമിക്രിയിൽ നിന്നായിരുന്നു. ഇപ്പോൾ മിന്നിനിൽക്കുന്ന പല താരങ്ങളും ഇങ്ങനെ വന്നവരായിരുന്നു. മിമിക്രിയുടെ ആദ്യനാളുകളിൽ സൂപ്പർസ്റ്റാർ ആയി നിന്നിരുന്ന താരമായിരുന്നു അബി. ആമിനതാത്തയായി വന്ന അദ്ദേഹം നിറഞ്ഞ സദസ്സിൽ കൈയ്യടി വാങ്ങിക്കൂട്ടി.

ആമിനതാത്തയെന്ന കഥാപാത്രത്തിലൂടെ അദ്ദേഹം സിനിമയിലേക്കും കടന്നുവന്നു. നാദിര്‍ഷാ-ദിലീപ് എന്നിവര്‍ക്കൊപ്പം തന്നെയായിരുന്നു അബിയുടെ പേരും മിമിക്രിയില്‍ ഉയര്‍ന്നു കേട്ടിരുന്നത്. പിന്നീട് ദിലീപ് സൂപ്പർസ്റ്റാർ പദവിയിലേക്ക് ഉയർന്നു. പതുക്കെ അബിയും. പക്ഷേ വേണ്ടത്ര ശ്രദ്ധ പിടിച്ചുപറ്റാൻ അബിയ്ക്ക് കഴിഞ്ഞില്ല. നായക വേഷത്തിലേക്ക് വന്നെങ്കിലും ഒരു നായക പരിവേഷം സൃഷ്ടിച്ചെടുക്കാന്‍ അദ്ദേഹത്തിന് സാധിച്ചിരുന്നില്ല.

സിനിമയില്‍ തനിക്ക് സാധിക്കാതെ പോയ നേട്ടം മകനിലൂടെ സ്വന്തമാക്കുകയായിരുന്നു അബി. അബിയുടെ മകൻ ഷെയ്ൻ നിഗം ഇപ്പോൾ മലയാള സിനിമയിലെ മുൻനിര യൂത്തന്മാരുടെ കൂട്ടത്തിലുണ്ട്. അന്നയും റസൂലും പോലെ വ്യത്യസ്തമായ ഒരു കഥാപ്രമേയത്തിലൂടെ അഭിനയം തുടങ്ങിയ ഷെയ്ന്‍ കിസ്മത്തിലൂടെ നായകനായി.

പിന്നീട് കെയര്‍ ഓഫ് സൈറാ ബാനുവില്‍ മഞ്ജു വാര്യര്‍ക്ക് തുല്യമായ കഥാപാത്രത്തെ അവതരിപ്പിച്ചു. അതിനുശേഷം പുറത്തിറങ്ങിയ പറവ എന്ന സിനിമയിലൂടെ ഷെയ്ൻ മലയാള സിനിമയിൽ തന്റേതായ സ്ഥാനം ഉറപ്പിച്ചു. കഴിഞ്ഞ കുറച്ചു കാലങ്ങളായി അബിയ്ക്ക് ശാരീരിക അസ്വാസ്ഥ്യങ്ങള്‍ ഉണ്ടായിരുന്നു.