ട്രെയിനില്‍ നിന്നും വീണ് പരുക്കേറ്റ വല്യുമ്മയെ ആശുപത്രിയില്‍ എത്തിക്കുന്ന തിരക്കിനിടെയില്‍ മൂന്നു വയസുകാരി ട്രെയിനിൽ ഒറ്റയ്‌ക്കായി. ചെവ്വാഴ്‌ച കുറ്റിപ്പുറത്തിനു സമീപത്തുവച്ചാണ് മലപ്പുറം പണ്ടാരയ്ക്കൽ സുഹറാബി (65) ഓടിക്കൊണ്ടിരുന്ന ട്രെയിനിൽ നിന്നും വീണതും തുടര്‍ന്ന് കുട്ടി തനിച്ചായതും.

ചെന്നൈയിൽനിന്നു മകൾക്കും മൂന്നു വയസുകാരി റിഫയ്‌ക്കും ഒപ്പം തിരൂരിലേക്കു വരുന്നതിനിടെയാണ് കുറ്റിപ്പുറത്തിനു സമീപംവച്ച് സുഹറാബി ട്രെയിനിൽനിന്നു വീണത്. ഉടന്‍ തന്നെ മറ്റു യാത്രക്കാര്‍ ചങ്ങല വലിച്ച് ട്രെയിന്‍ നിര്‍ത്തി.

പാളത്തില്‍ വീണ സുഹറാബിയുടെ തലയ്ക്കു ഗുരുതരമായി പരുക്കേറ്റതിനാല്‍ ഉടന്‍ തന്നെ ആശുപത്രിയിലേക്ക് കൊണ്ടു പോകാന്‍ മറ്റു യാത്രക്കാര്‍ പറഞ്ഞു. ആശുപത്രിയിലേക്ക് പോകാന്‍ ശ്രമിക്കുന്നതിനിടെ ട്രെയിന്‍ വിട്ടുപോവുകയും ചെയ്തു. ഇതോടെ റിഫ ട്രെയിനിൽ തനിച്ചായത്.

ട്രെയിനില്‍ കുട്ടി തനിച്ചാണെന്നും മറ്റാരും ഇവര്‍ക്കൊപ്പമില്ലെന്നും മനസിലായ യാത്രക്കാര്‍ ഉടന്‍ തന്നെ വിവരം ആർപിഎഫ് ഉദ്യോഗസ്ഥരെ അറിയിച്ചു. തുടര്‍ന്ന് തിരൂരിലെത്തിയ കുട്ടിയെ ആർപിഎഫ് ഏറ്റെടുക്കുകയും മാതാവിനെ വിവരമറിയിച്ച് റിഫയെ കൈമാറുകയായിരുന്നു.