ഇനിയൊരു ജിഷ്ണു പ്രണോയ് ഉണ്ടാവരുതെന്ന് മുഖ്യമന്ത്രി പിണറായി വിജയന്‍. ജിഷ്ണുവിന്‍റെ കുടുംബത്തിന് നീതിക്കുള്ള മാര്‍ഗങ്ങളാണ് എല്‍ ഡി എഫ് സര്‍ക്കാര്‍ നടത്തുന്നതെന്നും മുഖ്യമന്ത്രി പറഞ്ഞു.

ഇനിയൊരു ജിഷ്ണു പ്രണോയ് ഉണ്ടാവരുതെന്ന് സര്‍ക്കാരിന് നിര്‍ബന്ധമുണ്ട്. ജിഷ്ണുവിന്‍റെ അമ്മയെ പൊലീസ് തെരുവില്‍ വലിച്ചിഴച്ചിട്ടില്ല. വലിച്ചിഴച്ചതായി വരുത്താന്‍ ശ്രമം നടന്നെങ്കിലും വീഡിയോ ദൃശ്യങ്ങള്‍ അങ്ങനെ നടന്നിട്ടില്ലെന്നതിന് തെളിവായി - പിണറായി വ്യക്തമാക്കി.

മകന്‍ നഷ്ടപ്പെട്ടാല്‍ ഒരു അമ്മ അനുഭവിക്കുന്ന വേദന നമുക്കെല്ലാവര്‍ക്കും അറിയാം. ആ കുടുംബത്തെ സഹായിക്കുന്നതിനായി എല്ലാ കരുതലും സര്‍ക്കാര്‍ എടുത്തെന്നും പിണറായി പറഞ്ഞു.

ജിഷ്ണു പ്രണോയ് കേസുമായി ബന്ധപ്പെട്ട് എല്ലാ പ്രതികളെയും പിടികൂടാനായി പ്രത്യേക അന്വേഷണ സംഘത്തെ നിയോഗിച്ചു. ക്രൈംബ്രാഞ്ച് എ ഡി ജി പിയുടെ നേതൃത്വത്തിലാണ് സംഘം. രണ്ടാഴ്ചയ്ക്കകം മുഴുവന്‍ പ്രതികളെയും പിടികൂടണമെന്നാണ് സംഘത്തിന് ലഭിച്ചിരിക്കുന്ന നിര്‍ദ്ദേശം.