വെള്ളിയാഴ്ച ആരംഭിക്കാനിരിക്കുന്ന ലോക അത്‌ലറ്റിക് ചാംപ്യന്‍ഷിപ്പില്‍ പങ്കെടുക്കാന്‍ കഴിയുമെന്ന വിശ്വാസം അവസാന നിമിഷം വരെ തനിക്കുണ്ടായിരുന്നുവെന്ന് പി യു ചിത്ര. കോടതിവിധി അനുകൂലമായപ്പോള്‍ തനിക്കും അവസരം ലഭിക്കുമെന്ന് കരുതിയെന്നും ചിത്ര വ്യക്തമാക്കുന്നു. മീറ്റില്‍ പങ്കെടുക്കാന്‍ കഴിയില്ലെന്ന് വ്യക്തമായതോടെയാണ് ചിത്രയുടെ പ്രതികരണം.

ഒരു അത്‌ലറ്റിന്റെ ജീവിതത്തിലെ ഏറ്റവും വലിയ ആഗ്രഹങ്ങളില്‍ ഒന്നാണ് ലോക ചാംപ്യന്‍ഷിപ്പ് പോലെ വലിയ മീറ്റുകളില്‍ മത്സരിക്കുക എന്നത്. തന്റെ ഒരു അവസരമാണ് നഷ്ടപ്പെട്ടത്. ഇനിയൊരു അവസരം ലഭിക്കുമോ എന്നറിയില്ല. ഒരു ആപത്ത് വന്നപ്പോള്‍ എല്ലാവരും കൂടെ നിന്നതില്‍ അതിയായ സന്തോഷമുണ്ട്. കേരളത്തിലെ ജനങ്ങളുടെ പിന്തുണ എന്റെ വിജയമായി തന്നെ കാണുന്നുവെന്നും ചിത്ര വ്യക്തമാക്കി.

ലണ്ടനില്‍ നടക്കുന്ന മീറ്റില്‍ പങ്കെടുപ്പിക്കണമെന്നാവശ്യപ്പെട്ട് ഇന്ത്യന്‍ അത്‌ലറ്റിക് ഫെഡറേഷന്‍ അയച്ച കത്ത് അന്താരാഷ്ട്ര ഫെഡറേഷന്‍ തള്ളുകായിരുന്നു. സമയപരിധി കഴിഞ്ഞു എന്ന കാരണം ചൂണ്ടിക്കാട്ടിയാണ് അപേക്ഷ തള്ളിയത്. ഏഷ്യന്‍ അത്‌ലറ്റിക് ചാംപ്യന്‍ഷിപ്പില്‍ 1500 മീറ്ററില്‍ ചിത്ര സ്വര്‍ണം നേടിയിരുന്നു.