മറ്റൊരു സൌഹൃദ ദിനം കൂടി കടന്നുവരുന്നു. നമ്മുടെ കൂട്ടുകാരെയൊക്കെ ഓര്ക്കാന് ഒരു ദിനം ഇന്ന് ഞാന് ആരെ കുറിച്ച് എഴുതണം?
ഏതായാലും ആദ്യം മനസിലേക്കോടിയെത്തിയത് എന്നോടൊപ്പം പഠിച്ചിരുന്ന അതീവ സുന്ദരിയായ ഒരു പെണ്കുട്ടിയെയാണ്.
അവളുടെ സൌന്ദര്യമാണ് ആദ്യം എന്നെ ആകര്ഷിച്ചത്. ക്ലാസിലെ എന്നല്ല കലാലയത്തിലെ തന്നെ ഏറ്റവും സുന്ദരിയായിരുന്നു അവള്. അത്രയും സുന്ദരിയായ ഒരു പെണ്കുട്ടിയുമായി സൌഹൃദം സ്ഥാപിക്കാന് എനിക്കും ഇഷ്ടമായിരുന്നു. വെറുതെ ഒരു കൌതുകം.
അങ്ങനെ ഞങ്ങള് പരിചയപ്പെട്ടു. വെറുതെ കൌതുകത്തിന് തുടങ്ങിയ പരിചയപ്പെടലിന് ദിവസങ്ങള് കടന്നു പോകും തോറും ആത്മാര്ത്ഥതയും ഏറി വന്നു. കോളേജില് വരുന്നതും പോകുന്നതും ഒരുമിച്ചായി. അവധി ദിവസങ്ങളില് തമ്മില് കാണാന് കഴിയാത്തത് മനസിന് വിങ്ങലുണ്ടാക്കിയിരുന്നു. എങ്കിലും ഫോണുള്ളത് അനുഗ്രഹമായി.
‘എ പേഴ്സണ് ഈസ് നോണ് ബൈ ദി കമ്പനി ഹി കീപ്സ്’ (ഒരാള് അറിയപ്പെടുന്നത് അയാളുടെ കൂട്ടുകാരിലൂടെ ആണെന്ന്) പണ്ടാരോ പറഞ്ഞത് ഓര്മ്മ വരുന്നു. ഏതായാലും കലാലയത്തിലെ ഏറ്റവും സുന്ദരിയായ പെണ്കുട്ടിയുടെ ഏറ്റവും അടുത്ത സുഹൃത്തായ എനിക്കും ‘പബ്ലിസിറ്റി ’കിട്ടിത്തുടങ്ങി. അവളിലുടെ ഞാനും അറിയപ്പെട്ടു. ഇത്തരി ഗമയൊക്കെ എനിക്കും തോന്നിയിരുന്നു.
പക്ഷേ ഞങ്ങള് തമ്മില് പ്രണയത്തിലാണെന്നാണ് പലരും കരുതിയിരുന്നത്. ആള്ക്കാരെ കുറ്റം പറഞ്ഞിട്ട് കാര്യമില്ല. നമ്മുടെ നാട്ടില് ഒരാണ്കുട്ടിക്കും പെണ്കുട്ടിക്കും സുഹൃത്തുക്കളാകാന് കഴിയില്ലല്ലോ!