പ്രേക്ഷകർ ഇരുകയ്യും നീട്ടി സ്വീകരിച്ച കഥാപാത്രമാണ് ബാഹുബലിയിലെ ദേവസേന. ദേവസേനയെ അവതരിപ്പിച്ച അനുഷ്ക അത് മനോഹരമാക്കുകയും ചെയ്തു. രാജകുമാരിയുടെ റോളിൽ നിറഞ്ഞാടാൻ അനുഷ്‌കയെ കഴിഞ്ഞേ ആരുമുള്ളൂ എന്നൊരു ഖ്യാതിയും പ്രചരിക്കാൻ തുടങ്ങി. ഏതായാലും അത് ഏറക്കുറെ സത്യമാവുകയാണ്.

ഇതിഹാസ കഥാപാത്രങ്ങളോട് അനുഷ്‌കയക്ക് എന്നും പ്രത്യേക താല്പര്യമുണ്ട്. അരുന്ധതി, രുദ്രമ്മാ ദേവി, ദേവസേന എന്നിവ അനുഷ്‌ക മനോഹരമാക്കിയ കഥാപാത്രങ്ങളാണ്. അതേ ഗണത്തിലുള്ള കഥാപാത്രവുമായാണ് അനുഷ്‌ക വീണ്ടുമെത്തുന്നത്. ഭാഗ്മതി എന്ന് പേരിട്ടിരിക്കുന്ന ചിത്രത്തിൽ രാജകുമാരി ആയിട്ടാണ് അനുഷ്ക എത്തുന്നത്.

ഭാഗ്മതിയുടെ ചിത്രീകരണം പൂര്‍ത്തിയായി. എന്നാല്‍ ചിത്രത്തിന്റെ റിലീസ് തിയതി സംബന്ധിച്ച് വ്യക്തമായ അറിയിപ്പ് അണിയറ പ്രവര്‍ത്തകര്‍ ഇതുവരെ പുറത്തുവിട്ടിട്ടില്ല. അരുന്ധതി എന്ന ചിത്രത്തിന് സമാനമായ ഹൊറര്‍ ത്രില്ലര്‍ വിഭാഗത്തില്‍ പെടുന്ന ചിത്രമാണ് ഭാഗ്മതി എന്നാണ് റിപ്പോർട്ടുകൾ.

തമിഴ്, ഹിന്ദി ഭാഷകളിലും ചിത്രം മൊഴിമാറ്റി പ്രദര്‍ശനത്തിനെത്തിക്കും. അനുഷ്‌കയുടെ ജോഡിയായി ചിത്രത്തില്‍ പ്രഭാസും എത്തുമെന്നാണ് ലഭിക്കുന്ന വിവരം. ജി അശോക് സംവിധാനം ചെയ്യുന്ന ചിത്രം പ്രമോദ്, വി വംശി കൃഷ്ണ റെഡ്ഡി എന്നിവരാണ് നിര്‍മിക്കുന്നത്. ജനതാ ഗാരേജിന് ശേഷം ഉണ്ണി മുകുന്ദന്‍ വീണ്ടും തെലുങ്കിലേക്ക് എത്തുകയാണ് ഭാഗ്മതിയിലൂടെ. ജയറാം, ആശാ ശരത് എന്നിവരും ചിത്രത്തില്‍ പ്രധാന വേഷങ്ങള്‍ കൈകാര്യം ചെയ്യുന്നു.