തിയേറ്ററുകൾ കീഴടക്കിക്കൊണ്ട് മുന്നേറുന്ന ചിത്രമാണ് പദ്‌മകുമാർ - ജോജു കൂട്ടുകെട്ടിലൊരുങ്ങിയ ജോസഫ്. അതേസമയം ചിത്രത്തിനെതിരെ പലതരത്തിലുള്ള വിമർശനങ്ങളും വരുന്നുണ്ട്. തന്റെ തിരക്കഥമോഷ്‌ടിച്ചാണ് ചിത്രമെടുത്തതെന്ന് ആരോപിച്ച് നന്ദകുമാർ എന്ന യുവാവ് കഴിഞ്ഞ ദിവസം രംഗത്തെത്തിയിരുന്നു.

ഫേസ്‌ബുക്കിൽ പോസ്‌റ്റിട്ടുകൊണ്ടാണ് നന്ദകുമാർ രംഗത്തെത്തിയത്. എന്നാൽ ഇതിനെതിരെ ശക്തമായി പ്രതികരിച്ചിരിക്കുകയാണ് ജോസഫിന്റെ തിരക്കഥാകൃത്ത്. ചെയ്ത കാര്യങ്ങളില്‍ നൂറ്റൊന്നു ശതമാനം ഉറപ്പുണ്ടായിരുന്നതിനാല്‍ അയാള്‍ക്കെതിരെ നിയമനടപടി സ്വീകരിക്കും എന്നാണ് തിരക്കഥാകൃത്ത് ഷാഹി പറഞ്ഞിരിക്കുന്നത്.

ആരോപണം വാർത്താശ്രദ്ധ പിടിച്ചുപറ്റിയതോടേ നന്ദകുമാർ ഫേസ്‌ബുക്ക് പോസ്‌റ്റ് പിൻവലിച്ചിരുന്നു. ‘ജോസഫ് പരാജയപ്പെട്ടിരുന്നെങ്കില്‍ ഇങ്ങിനെയൊരു ആരോപണം അയാള്‍ ഉന്നയിക്കുമായിരുന്നോ?’ എന്ന് ഷാഹി ചോദിക്കുന്നു. അയാള്‍ മാപ്പു പറഞ്ഞ് ഫെയ്‌സ്ബുക്ക് പോസ്റ്റ് പിന്‍വലിച്ചെങ്കിലും കേസുമായി മുന്നോട്ട് പോകാനാണ് ഷാഹിയുടെ തീരുമാനം ഇനി മറ്റൊരു സിനിമയ്ക്കും ഇതു പോലെ സംഭവിക്കരുതെന്നും അദ്ദേഹം കൂട്ടിച്ചേർത്തു.

മനോരമയ്‌ക്ക് നൽകിയ അഭിമുഖത്തിലാണ് ഷാഫി ഇക്കാര്യം വ്യക്തമാക്കിയത്.