ബോളിവുഡിലെ മിന്നുംതാരമാണ് കങ്കറ റാണാവത്ത്. ദേശീയ പുരസ്കാരങ്ങള്‍ വെട്ടിപ്പിടിച്ച കങ്കണ തനിക്ക് നേരിടേണ്ടി വന്ന പീഡനങ്ങളെ കുറിച്ചും വെട്ടിത്തുറന്ന് പറഞ്ഞിട്ടുണ്ട്. തന്നെ പതിനാറാം വയസ്സില്‍ ഒരാള്‍ ലൈംഗികമായി പീഡിപ്പിച്ചിട്ടുണ്ടെന്ന് കങ്കണ പല അഭിമുഖങ്ങളിലും പരിപാടികള്‍ക്കിടയിലും പറഞ്ഞിരുന്നു. എന്നാല്‍, അന്നൊന്നും അതാരാണെന്ന് വെളിപ്പെടുത്തിയിരുന്നില്ല. ഇപ്പോഴിതാ, ആ വ്യക്തിയുടെ പേര് പറഞ്ഞിരിക്കുകയാണ് കങ്കണ.

തന്റെ പതിനാറാം വയസ്സില്‍ സിനിമയുടെ തുടക്കക്കാലത്ത് തന്നെ പീഡിപ്പിച്ചത് നടന്‍ ആദിത്യ പഞ്ചോളിയാണെന്ന് ഒരു ടെലിവിഷന്‍ ഷോയ്ക്കിടെ കങ്കണ വെളിപ്പെടുത്തി. മലയാളികള്‍ക്ക് സുപരിചിതയായ നടി സെറീന വഹാബിന്റെ ഭര്‍ത്താവാണ് ആദിത്യ പഞ്ചോളി.

എനിക്ക് അയാളുടെ മകളേക്കാള്‍ പ്രായം കുറവായിരുന്നു അന്ന്. അയാളെന്നെ മര്‍ദ്ദിച്ചു. കുറേ ഉപദ്രവിച്ചു. ഞാന്‍ ചെരുപ്പൂരി അടിച്ചു. ശരിക്കും ഒരു കെണിതന്നെയായിരുന്നു അത്. സംഭവത്തിനു ശേഷം അയാളുടെ ഭാര്യയെ കണ്ടപ്പോള്‍ ഞാന്‍ കാര്യങ്ങള്‍ പറഞ്ഞു. എന്നാല്‍ അവരുടെ മറുപടി തന്നെ ഞെട്ടിച്ചുവെന്ന് കങ്കണ പറയുന്നു.

‘അയാള്‍ ഇനി വീട്ടില്‍ വരില്ലല്ലോ’ എന്നായിരുന്നു അവരുടെ മറുപടിയെന്ന് കങ്കണ പറയുന്നു. അവര്‍ രക്ഷിക്കുമെന്ന് കരുതിയായിരുന്നു അവരോട് പറഞ്ഞത്. ആ മാര്‍ഗം അടഞ്ഞപ്പോള്‍ ആരോട് പറയുമെന്നായി. ഒടുവില്‍ ഒരുപാട് നാളുകള്‍ കഴിഞ്ഞു പരാതിപ്പെടാന്‍ ധൈര്യം വന്നു. അന്ന് അയാളെ വിളിച്ച് ശാസിക്കുക മാത്രമായിരുന്നു ചെയ്തതെന്ന് കങ്കണ പറയുന്നു.