ജയറാമിന്റെ മകന്‍ കാളിദാസ് നായകനാകുന്ന ‘പൂമരം’ സിനിമ ഉടന്‍ എത്തുമെന്ന് പറഞ്ഞെങ്കിലും ഇതുവരെ ചിത്രത്തെ കുറിച്ച് പുതിയ വാര്‍ത്തകള്‍ ഒന്നും അണിയറ പ്രവര്‍ത്തകര്‍ പുറത്തുവിട്ടിട്ടില്ല. ചിത്രത്തിന്റെ ട്രയിലറിനും ടീസറിനുമായുള്ള ആരാധകരുടെ കാത്തിരിപ്പിന് തുടക്കം കുറിച്ച് കുറേയായി.

നിവിന്‍ പോളി നായകനായ ആക്ഷന്‍ ഹീറോ ബിജുവിന് ശേഷം എബ്രിഡ് ഷൈന്‍ സംവിധാനം ചെയ്യുന്ന ചിത്രമാണ് പൂമരം. ചിത്രത്തിലെ രണ്ട് പാട്ടുകള്‍ ഇതിനോടകം റിലീസ് ചെയ്തിട്ടുണ്ട്. രണ്ടിനും വന്‍‌വരവേല്‍പ്പാണ് സോഷ്യല്‍ മീഡിയ നല്‍കിയത്. കപ്പലുകൊണ്ടുണ്ടാക്കിയ പൂമരം എവിടെപ്പോയി എന്നാണ് ആരാധകര്‍ ചോദിക്കുന്നത്.

ചിത്രത്തിനൊന്നും സംഭവിച്ചിട്ടില്ല, ചിത്രീകരണം പുരോഗമിക്കുകയാണ് എന്നാണ് അണിയറ പ്രവര്‍ത്തകര്‍ പറയുന്നത്. വലിയ കാന്‍‌വാസിലുള്ള ചിത്രമായതിനാല്‍ കുറച്ച് സമയമെടുക്കുമെന്നാണ് അണിയറ പ്രവര്‍ത്തകര്‍ പറയുന്നത്. കാളിദാസിനൊപ്പം ചിത്രത്തില്‍ അഭിനയിക്കുന്നവര്‍ എല്ലാം പുതുമുഖങ്ങള്‍ ആണ്. നിലവില്‍ ഇറങ്ങിയ രണ്ട് ഗാനങ്ങള്‍ കൂടതെ ഇനിയും പാട്ടുകള്‍ ചിത്രത്തില്‍ ഉണ്ടെന്നാണ് അണിയറ പ്രവര്‍ത്തകര്‍ പറയുന്നത്.