പാകിസ്ഥാന്‍ ക്രിക്കറ്റ് താരം ഉമര്‍ അക്മല്‍ കൊല്ലപ്പെട്ടു ?. പാകിസ്ഥാന്റെ വിവിധ ഭാഗങ്ങളിലും ഇസ്ലാമാബാദിലും സര്‍ക്കാരിനെതിരെ നടന്ന പ്രതിഷേധത്തിനിടെയാണ് സംഭവം ?. കഴിഞ്ഞ ദിവസങ്ങളില്‍ സോഷ്യല്‍മീഡിയയില്‍ വന്നതാണ് ഇത്തരമൊരു പ്രചാരണം. സോഷ്യല്‍ മീഡിയയില്‍ ഇത്തരമൊരു പ്രചാരണം ശക്തമായതിനെ തുടര്‍ന്ന് പ്രാദേശിക ക്രിക്കറ്റ് താരങ്ങളും കായിക പ്രേമികളുമെല്ലാം തങ്ങളുടെ ആശങ്ക പങ്കുവെയ്ക്കാന്‍ തുടങ്ങി. ഒടുവില്‍ തനിക്കൊന്നും പറ്റിയിട്ടില്ലെന്ന് പറഞ്ഞ് ഉമര്‍ അക്മല്‍ തന്നെ രംഗത്തെത്തി.

പാകിസ്ഥാന്‍ നിയമമന്ത്രി രാജിവെയ്ക്കണമെന്നും മതനിന്ദാപരമായ തെരഞ്ഞെടുപ്പ് സത്യവാചകം തിരുത്തി പഴയപോലെയാക്കണമെന്നും ആവശ്യപ്പെട്ട് രാജ്യത്ത്മൂന്നാഴ്ചയോളം സര്‍ക്കാര്‍ വിരുദ്ധ പ്രക്ഷോഭം നടന്നിരുന്നു. പ്രക്ഷോഭത്തില്‍ ആറ് പേര്‍ കൊല്ലപ്പെട്ടിരുന്നു. ഇതില്‍ ഒരാള്‍ ഉമര്‍ അക്മലാണെന്നായിരുന്നു പ്രചാരണം. മാത്രമല്ല, മരിച്ചു കിടക്കുന്നവരില്‍ ഒരാളുടെ ഫോട്ടോ സോഷ്യല്‍ മീഡിയയില്‍ വൈറലായിരുന്നു. ഇയാള്‍ക്ക് ഉമര്‍ അക്മലിന്റെ ഛായ ഉണ്ടായിരുന്നതാണ് പ്രചാരണം ശക്തിപ്പെടാന്‍ കാരണം.

ഈ സംഭവത്തിന്റെ തുടക്കത്തില്‍ താരം അത് വലിയ കാര്യമാക്കിയില്ല. എന്നാല്‍ സംഗതി കൈവിടുമെന്ന് തോന്നിയ സമയത്താണ് ഉമര്‍ നേരിട്ടെത്തി വിശദീകരണം നല്‍കിയത്. പ്രചരിക്കുന്ന വാര്‍ത്തകള്‍ വ്യാജമാണെന്നും തനിക്കൊന്നും സംഭവിച്ചിട്ടില്ലെന്നും നൂറ് ശതമാനം താന്‍ ആരോഗ്യവാനാണെന്നും സമൂഹ മാധ്യമങ്ങളിലൂടെ പ്രചരിക്കുന്നത് മറ്റാരുടേയോ ഫോട്ടോയാണെന്നും താരം വ്യക്തമാക്കി. താന്‍ ഇപ്പോള്‍ ലാഹോറില്‍ ക്രിക്കറ്റ് പരിശീലനത്തിലാണെന്നുള്ള ഒരു വീഡിയോയും താരം പുറത്തിറക്കുകയും ചെയ്തു.