ഇന്ത്യ-ശ്രീലങ്ക രണ്ടാം ഏകദിനത്തില്‍ പ്രശംസകള്‍ക്കപ്പുറമായിരുന്നു ഇന്ത്യന്‍ നായകന്‍ രോഹിത് ശര്‍മ്മയുടെ പ്രകടനം. ഡബിള്‍ സെഞ്ചുറിയില്‍ ട്രിപ്പിള്‍ തികച്ച താരത്തിന്റെ ഇന്നിങ്‌സിനെ എങ്ങനെ വാഴ്ത്തണമെന്ന കാര്യത്തില്‍ മത്സരിക്കുകയാണ് ട്വിറ്റര്‍ ലോകം. പലരും പല തരത്തിലുള്ള വിശേഷണവും ആ ഇന്നിങ്സിന് നല്‍കി. കൂട്ടത്തില്‍ ഏറ്റവും വലിയ ആവശ്യമാണ് ട്വിറ്റര്‍ ലോകം മുന്നോട്ട് വച്ചിരിക്കുന്നത്.

റിസര്‍വ് ബാങ്ക് പുതുതായി ഇറക്കിയ 200 രൂപയുടേ നോട്ടില്‍ രോഹിത് ശര്‍മ്മയുടെ ചിത്രവും ചേര്‍ക്കണമെന്നാണ് ട്വിറ്ററിലൂടെ ആരാധകര്‍ പങ്കുവച്ചിരിക്കുന്നത്. ആരാധകരുടെ ആവശ്യത്തോടൊപ്പം ഫോട്ടോഷോപ്പില്‍ രോഹിത്തിന്റെ ചിത്രം ചേര്‍ത്ത 200 രൂപ നോട്ടും വൈറലായി പ്രചരിക്കുന്നുണ്ട്. കഴിഞ്ഞ ദിവസത്തെ പ്രകടനത്തോടെ രോഹിത് ഏകദിന ക്രിക്കറ്റിലെ മികച്ച താരനിരയിലേക്ക് എത്തിയിരിക്കുകയാണ്.

രോഹിത് ഡബിള്‍ സെഞ്ചുറികള്‍ അടിച്ചുകൂട്ടുന്നതിനെ കാറുകള്‍ വാങ്ങുന്നതിനോട് താരതമ്യം ചെയ്തായിരുന്നു ഓപ്പണിങ് പങ്കാളിയായ ശിഖര്‍ ധവാന്‍ ട്വീറ്റ് ചെയ്തത്. നേരെ ഷോറൂമിലേക്ക് പോയി കാര്‍ വാങ്ങുന്നത് പോലെയാണ് രോഹിത് ക്രീസിലെത്തി ഇരട്ട സെഞ്ച്വറി നേടുന്നതെന്നാണ് ധവാന്‍ പറയുന്നത്