ക്രിക്കറ്റ് ആരാധകരെ മുഴുവന്‍ നിരാശയിലാഴ്‌ത്തുന്നതായിരുന്നു എബി ഡിവില്ലിയേഴ്സിന്റെ വിരമിക്കല്‍ പ്രഖ്യാപനം. ഈ വാര്‍ത്ത ഇന്ത്യന്‍ ക്രിക്കറ്റ് പ്രേമികളെയാണ് കൂടുതലായും വേദനിപ്പിച്ചത്. ഗ്രൌണ്ടില്‍ ബാറ്റ് കൊണ്ട് അത്ഭുതം തീര്‍ക്കുന്ന ഈ മനുഷ്യനെ അത്രമാത്രം ആരാധിക്കുകയും സ്‌നേഹിക്കുകയും ചെയ്യുന്നുണ്ട് ഇന്ത്യന്‍ ആരാധകര്‍.

ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലിയും ഡിവില്ലിയേഴ്‌സും തമ്മിലുള്ള അടുപ്പവും ആത്മബന്ധവും എല്ലാവര്‍ക്കും അറിയാവുന്ന രഹസ്യമാണ്. എന്നാല്‍ ഏറ്റവും ഇഷ്‌ടപ്പെട്ട ഇന്ത്യന്‍ താരം ആരാണെന്ന ചോദ്യത്തിന് എബി ഡിയില്‍ നിന്നുമുണ്ടായത് അപ്രതീക്ഷിത മറുപടിയാണ്.

വിക്രം സതായെയുടെ വാട്ട് ദ് ഡക്ക് ടോക് ഷോയിലാണ് തന്റെ ഇഷ്‌ട ഇന്ത്യന്‍ താരം ആരാണെന്ന് ഡിവില്ലിയേഴ്‌സ് പറഞ്ഞത്. വീരേന്ദര്‍ സെവാഗാണ് തന്റെ ഇഷ്‌ട കളിക്കാരന്‍ എന്നാണ് പ്രോഗ്രാമില്‍ എബി ഡി വ്യക്തമാക്കിയത്.

സെവാഗിന്റെ തട്ടുപൊളിപ്പന്‍ ബാറ്റിംഗാണ് അദ്ദേഹത്തിലേക്ക് തന്നെ ആ‍കര്‍ഷിച്ചതെന്നാണ് ഡിവില്ലിയേഴ്സ് വ്യക്തമാക്കിയത്. ഷോയില്‍ അദ്ദേഹത്തിനൊപ്പം മുന്‍ ദക്ഷിണാഫ്രിക്കന്‍ താരം ജോണ്ടി റോഡ്സും പങ്കെടുത്തു. സുരേഷ് റെയ്‌നയാണ് ജോണ്ടിയുടെ പ്രിയപ്പെട്ട ഇന്ത്യന്‍ താരം.