ന്യൂഡൽഹി|
jibin|
Last Updated:
വെള്ളി, 20 നവംബര് 2015 (09:21 IST)
അടുത്തമാസം ഇന്ത്യയും പാകിസ്ഥാനും തമ്മിലുള്ള ക്രിക്കറ്റ് പരമ്പര നടക്കാനുള്ള സാദ്ധ്യതകൾ ബിസിസിഐ വീണ്ടും ആരായുന്നു. ഈയാഴ്ച ബിസിസിഐ പ്രസിഡന്റ് ശശാങ്ക മനോഹർ ഇന്റർനാഷണൽ ക്രിക്കറ്റ് കൗൺസിൽ ചെയർമാനായി സ്ഥാനമേൽക്കുന്നുണ്ട്. അതിനുശേഷം ഇക്കാര്യം അദ്ദേഹം പാക് ക്രിക്കറ്റ് ബോർഡുമായി ചർച്ച ചെയ്യും.
പരമ്പര സംബന്ധിച്ച തീരുമാനം രണ്ടുദിവസത്തിനുള്ളിലെന്ന് ബിസിസിഐ സെക്രട്ടറി അനുരാഗ് താക്കൂര് വ്യക്തമാക്കി. ഡിസംബറില് പരമ്പരക്കായി ബിസിസിഐ പാകിസ്താനെ ഔദ്യോഗികമായി ക്ഷണിച്ചെങ്കിലും ഇന്ത്യക്ക് യുഎഇയില് കളിക്കാന് സമ്മതമാണെങ്കില് മാത്രമേ പരമ്പര നടക്കൂവെന്ന് പാക് ക്രിക്കറ്റ് ബോര്ഡ് ചെയര്മാന് ശഹരിയാര് ഖാന് വ്യക്തമാക്കിയിരുന്നു. എന്നാല്, യുഎഇയില് കളിക്കുന്നത് സംബന്ധിച്ച് ഇന്ത്യ ഇതുവരെ ഔദ്യോഗിക നിലപാട് വ്യക്തമാക്കിയിട്ടില്ല.
ഐസിസി നടത്തുന്ന ഏതൊരു പരമ്പരയും പങ്കെടുക്കുന്ന രാജ്യങ്ങളുടെ താല്പര്യം പരിഗണിച്ചു മാത്രമേ വേദിയുടെ കാര്യത്തില് തീരുമാനമെടുക്കൂവെന്ന് താക്കൂര് മാധ്യമപ്രവര്ത്തകരുടെ ചോദ്യത്തിന് മറുപടിയായി പറഞ്ഞു. കമ്മിറ്റി റിപ്പോര്ട്ട് ഉടന് സമര്പ്പിക്കുമെന്നും അതിനുശേഷമാണ് ബിസിസിഐ അന്തിമ നിലപാട് വ്യക്തമാക്കുകയെന്നും താക്കൂര് പറഞ്ഞു. യുഎഇയിലേക്ക് ഇന്ത്യ വരാന് തയാറാണെങ്കില് പരമ്പരക്ക് തയാറാണെന്നാണ് ഇക്കാര്യത്തില് പാക് ക്രിക്കറ്റ് ബോര്ഡിന്റെ നിലപാട്.