Last Updated:
ബുധന്‍, 7 ജനുവരി 2015 (14:34 IST)
വിക്രം നായകനാകുന്ന 'ഐ' ജനുവരി 14ന് പ്രദര്‍ശനത്തിനെത്തും. കേരളത്തില്‍ 225 തിയേറ്ററുകളിലാണ് ചിത്രം റിലീസ് ചെയ്യുന്നത്. ഒരു അന്യഭാഷാചിത്രം കേരളത്തില്‍ ഇത്രയധികം സെന്‍ററുകളില്‍ പ്രദര്‍ശനത്തിനെത്തുന്നത് ഇതാദ്യമാണ്.
മൊത്തം റിലീസ് കേന്ദ്രങ്ങളുടെ എണ്ണവും സര്‍വകാല റെക്കോര്‍ഡാണ്. ലോകത്തെമ്പാടുമായി 25000 തീയേറ്ററുകളിലാണ്
ഐ പ്രദര്‍ശനത്തിനെത്തുക. 180 കോടി രൂപ മുതല്‍ മുടക്കില്‍ ഷങ്കര്‍ സംവിധാനം ചെയ്ത ഈ ബ്രഹ്‌മാണ്ഡചിത്രം ചൈനയില്‍ മാത്രം 12000 സെന്‍ററുകളില്‍ റിലീസ് ചെയ്യുന്നുണ്ട്. ചൈനയിലാണ് ഈ സിനിമയുടെ ഭൂരിഭാഗം ചിത്രീകരണവും നടന്നത്.
എമി ജാക്സണ്‍ നായികയാകുന്ന സിനിമയുടെ ഛായാഗ്രഹണം പി സി ശ്രീറാം. എ ആര്‍ റഹ്‌മാന്‍ ഈണമിട്ട രണ്ടാം ഗാനവും അണിയറപ്രവര്‍ത്തകര്‍ പുറത്തുവിട്ടിട്ടുണ്ട്. ഈ ഗാനരംഗത്തില്‍ വിക്രം മൃഗസമാനമായ വേഷത്തിലാണ് എത്തിയിരിക്കുന്നത്.
ആസ്കര്‍ ഫിലിംസ് നിര്‍മ്മിക്കുന്ന 'ഐ'യില്‍ സുരേഷ്ഗോപിയാണ് പ്രധാന വില്ലന്‍. ഉപന്‍ പട്ടേല്‍, സന്താനം തുടങ്ങിയവരും മുഖ്യകഥാപാത്രങ്ങളെ അവതരിപ്പിക്കുന്നു.
ജയാ ടി വി 20 കോടി രൂപ നല്‍കിയാണ് ഐയുടെ സാറ്റലൈറ്റ് അവകാശം സ്വന്തമാക്കിയിരിക്കുന്നത്.
