പ്രണവ് മോഹന്‍ലാലിന്‍റെ ആദ്യചിത്രം ‘ആദി’ അണിയറയില്‍ ഒരുങ്ങുകയാണ്. ജീത്തു ജോസഫ് സംവിധാനം ചെയ്യുന്ന സിനിമ ഒരു ആക്ഷന്‍ ത്രില്ലറാണ്. പ്രണവിനെ നായകനായി ലോഞ്ച് ചെയ്യുന്ന ചിത്രം എന്ന നിലയില്‍ ‘ആദി’ മലയാള സിനിമാലോകവും പ്രേക്ഷകരും ഒരുപോലെ കാത്തിരിക്കുന്ന ഒരു പ്രൊജക്ടായി മാറിയിരിക്കുകയാണ്.

2018 ജനുവരി 26നാണ് ‘ആദി’ റിലീസ് ചെയ്യുന്നത്. റിപ്പബ്ലിക് ദിനമായ അന്നത്തെ ദിവസത്തിന് മറ്റൊരു പ്രത്യേകത കൂടിയുണ്ട്. 18 വര്‍ഷം മുമ്പ്, കൃത്യമായി പറഞ്ഞാല്‍ 2000 ജനുവരി 26നാണ് മോഹന്‍ലാലിന്‍റെ കരിയറിലെ തന്നെ ഏറ്റവും വലിയ ഹിറ്റുകളില്‍ ഒന്നായ ‘നരസിംഹം’ റിലീസായത്.

നരസിംഹം റിലീസായ അതേ നാളില്‍ പ്രണവ് മോഹന്‍ലാലിന്‍റെ ആദ്യചിത്രം പ്രദര്‍ശനത്തിനെത്തുമ്പോള്‍ അത് നരസിംഹത്തേക്കാള്‍ വലിയ വിജയമായിരിക്കണമെന്ന ആഗ്രഹവും നിര്‍ബന്ധവും മോഹന്‍ലാലിനും ആന്‍റണി പെരുമ്പാവൂരിനും ജീത്തു ജോസഫിനുമുണ്ട്. അതുകൊണ്ടുതന്നെ ‘ആദി’യെക്കുറിച്ചുള്ള പ്രതീക്ഷകളും ഏറുകയാണ്.

ആദിയുടെ അവസാന ഷെഡ്യൂള്‍ ഉടന്‍ എറണാകുളത്ത് ആരംഭിക്കും. ജഗപതി ബാബുവാണ് ഈ സിനിമയിലെ പ്രധാന വില്ലന്‍. തകര്‍പ്പന്‍ ആക്ഷന്‍ രംഗങ്ങളാണ് ആദിയുടെ ഹൈലൈറ്റ്.